U-15 ព្រះខ័នរាជស្វាយរៀង បានកៅអីឡើងវគ្គ ១៦ក្រុមចុងក្រោយពានយុវជន ខណៈ U-18 អស់ឱកាសត្រឹមព្រឹកមិញ

ក្រុមយុវជនថ្នាលរបស់ក្លិបបាល់ទាត់ព្រះខ័នរាជស្វាយរៀង ២ក្រុម U-15 និង U-18 បានបញ្ចប់ការប្រកួត​ពានរង្វាន់​ជ្រើសរើសជើងឯកយុវជន U-15 & U-18 ដែលរៀបចំដោយសហព័ន្ធកីឡាបាល់ទាត់កម្ពុជា ប្រចាំឆ្នាំ២០២២ រៀងខ្លួនៗហើយគិតត្រឹមថ្ងៃទី១៧ ខែកក្កដា ឆ្នាំ២០២២ នេះ។

ជាលទ្ធផល ក្រុម U-15 យុវជនព្រះខ័នរាជស្វាយរៀង បានកៅអីឡើងវគ្គ ១៦ក្រុមចុងក្រោយពានរង្វាន់ជ្រើសរើសជើង​ឯកយុវជន U-15 ខណៈ ក្រុម U-18 យុវជនព្រះខ័នរាជស្វាយរៀង បានជ្រុះចេញពីកម្មវិធីពានរង្វាន់ជ្រើសរើសជើង​ឯកយុវជន U-18 បន្ទាប់ពីចំណាយពេលប្រកួតជាង ៤ខែរួចមក។

ក្រុម U-15 យុវជនព្រះខ័នរាជស្វាយរៀង បានឡើងទៅវគ្គ១៦ក្រុមចុងក្រោយ ក្នុងនាមជាក្រុមកំពូលតារាងពូល A ដែលរួមជាមួយភ្នំពេញក្រោន, អគ្គិសនីកម្ពុជា, អាយអេសអាយដង្កោរសែនជ័យ និងយុវជនសាលាតម្រង់ទិស​រាជធានីភ្នំពេញ។ ពួកគេប្រកួត ៤ដង ឈ្នះ៣ដង មិនដែលស្មើ និងចាញ់១ដង មាន ៩ពិន្ទុ។ 

សម្រាប់វគ្គ១៦ក្រុមចុងក្រោយ U-15 ព្រះខ័នរាជស្វាយរៀង នឹងត្រូវជួបក្រុមលេខ២ ពូល B គឺក្រុម U-15 សមាគមកីឡាកងយោធពលខេមរភូមិន្ទ (U-15 Tiffy Army) ដែលការប្រកួតថ្ងៃឡើងចំនួន២ជើង ជើងទី១នៅថ្ងៃទី០៧ ខែសីហា និងជើងទី២ នៅថ្ងៃទី១៤ ខែសីហា ឆ្នាំ២០២២។

លទ្ធផលរបស់ក្រុម U-18 យុវជនព្រះខ័នរាជស្វាយរៀង ដែលទើបតែបញ្ចប់ការប្រកួតក្នុងពូលព្រឹកមិញនេះ គឺបានត្រឹម​ឈរនៅលេខ៤ ក្នុងពូល B ក្រោយប្រកួត ៤ដង មិនដែលឈ្នះ ស្មើ៣ និងចាញ់១ មាន ៣ពិន្ទុ។ ក្នុងពូល B នេះមាន U-18 បឹងកេត, សាលាតម្រង់ទិសរាជធានីភ្នំពេញ, អគ្គិសនីកម្ពុជា និង សមាគមកីឡាកងយោធពលខេមរភូមិន្ទ (U-18 Tiffy Army)។

សូមបញ្ជាក់ថា ពានរង្វាន់ជ្រើសរើសជើងឯកយុវជននេះធ្វើឡើងជារៀងរាល់ឆ្នាំ ដោយក្លិប និងក្រុមមកពីគ្រប់រាជធានីខេត្ត ចូលរួមប្រកួត៕ អត្ថបទ៖ មន្នីរ័ត្ន