កីឡា

២ប្រទេសមកប្រកួតមិត្តភាពជាមួយកម្ពុជា បើកពានបាល់ទះសម្តេចតេជោ

បានផុស

៤ years មុន

នៅ

ថ្ងៃព្រហស្បតិ៍ ១៣ តុលា ២០២២

ដោយ

ក្រុមបាល់ទះជម្រើសជាតិសិង្ហបុរី និងគុយបា នឹងមកប្រកួតមិត្តភាពអន្តរជាតិជាមួយក្រុមបាល់ទះជម្រើសជាតិកម្ពុជា ក្នុងខែតុលានេះ ដើម្បីចូលរួមអបអរសាទរពិធីបើកការប្រកួតបាល់ទះពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២២។

ក្រុមបាល់ទះជម្រើសជាតិកម្ពុជា នឹងទទួលស្វាគមន៍ក្រុមបាល់ទះជម្រើសជាតិសិង្ហបុរី នាថ្ងៃសៅរ៍ ទី១៥ ខែតុលានេះ នៅកីឡដ្ឋានព្រីនស៍ វេលាម៉ោង៧យប់ ដែលជាថ្ងៃចាប់ផ្តើមបើកការប្រកួតបាល់ទះពានរង្វាន់សម្តេចតេជោ ហ៊ុន សែន។ បន្ទាប់មកនៅថ្ងៃព្រហស្បតិ៍ ទី២០ ខែតុលា ក្រុមបាល់ទះកម្ពុជាត្រូវទទួលស្វាគមន៍ក្រុមគុយបា វេលាម៉ោង៧យប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតមិត្តភាពអន្តរជាតិនេះជាការត្រៀមខ្លួនរបស់ក្រុមបាល់ទះជម្រើសជាតិកម្ពុជាសម្រាប់កីឡាស៊ីហ្គេម ឆ្នាំ២០២៣ ដែលកម្ពុជាធ្វើជាម្ចាស់ផ្ទះជិតមកដល់ហើយ។ តាមការគ្រោងទុក ក្រុមបាល់ទះកម្ពុជាអាចនឹងចេញដំណើរប្រកួតលក្ខណៈទេសចរណ៍ជាមួយជម្រើសជាតិមួយចំនួននៅតំបន់អាស៊ានដើម្បីជាការត្រៀមខ្លួនដែរ។

ទន្ទឹមជាមួយគ្នានេះ ការប្រកួតបាល់ទះពានរង្វាន់សម្តេចតេជោឆ្នាំ២០២២ ក៏ជាផ្នែកមួយដើម្បីជំរុញ ពង្រឹង និងអភិវឌ្ឍកីឡាករកម្ពុជាដើម្បីជ្រើសរើសកីឡាករដែលមានសមត្ថភាពត្រៀមស៊ីហ្គេមផងដែរ។

ម្ចាស់ជើងឯកបាល់ទះពានរង្វាន់សម្តេចតេជោ ហ៊ុន សែន នឹងចាប់ពីថ្ងៃ ១៥ ដល់ថ្ងៃទី៣០ ខែតុលា ឆ្នាំ២០២២ ដែលមានក្រុមខ្លាំង១១ក្រុមចូលរួមប្រកួត។ ពូល A មានក្រុម រដ្ឋបាលរាជធានីភ្នំពេញ, សមាគមបាល់ទះវិសាខា, ស្នងការដ្ឋាននគរបាលខេត្តបាត់ដំបង។ ពូល B មានក្រុម បញ្ជាការដ្ឋានកងអង្គរក្ស, ស្នងការដ្ឋាននគរបាលខេត្តត្បូងឃ្មុំ, សមាគមបាល់ទះខេត្តសៀមរាប។ ពូល C មាន ក្លិបកងពលធំអន្តរាគមន៍លេខ៣, ក្លិបកូននាគឧត្តរ, ស្នងការដ្ឋាននគរបាលខេត្តព្រះសីហនុ និងពូល D មាន សមាគមបាល់ទះក្រសួងមហាផ្ទៃ និង ស្នងការដ្ឋាននគរបាលខេត្តស្វាយរៀង។

ជាមួយគ្នានេះ ក៏មានពានឯកត្តជនជាច្រើនដែរដូចជា កីឡាករល្អប្រចាំព្រឹត្តិការណ៍ កីឡាករលើកបាល់ល្អ កីឡាករធ្វើរនាំងល្អ និងកីឡាករវាយសេវាល្អជាងគេជាដើម៕

អត្ថបទ៖ វីរបុត្រ

Related Topics:កីឡាបាល់ទះ