ក្នុងនាមជាកីឡាករបាល់ទាត់ដែលមានចំនួនអ្នកតាមដានច្រើនជាងគេលើពិភពលោក រាល់សកម្មភាពរបស់ Cristiano Ronaldo សុទ្ធតែជាចំណាប់អារម្មណ៍នៃប្រព័ន្ធផ្សព្វផ្សាយនានាទូទាំងពិភពលោក។

ចាប់តាំងពីរដូវកាល World Cup ឆ្នាំ២០២២ បានចាប់ផ្តើម ឈ្មោះកីឡាករបាល់ទាត់ Cristiano Ronaldo កាន់តែមានភាពលេចធ្លោ ជាពិសេសបន្ទាប់ពីខ្សែប្រយុទ្ធសញ្ជាតិព័រទុយហ្គាល់រូបនេះ បានចាកចេញពីក្លឹប MU និងបានប្រកាសចូលរួមជាមួយក្រុមថ្មី។

ជាក់ស្តែងកាលពីរសៀលថ្ងៃទី៣០ ខែវិច្ឆិកា កាសែត Marca របស់អេស្ប៉ាញ បានរាយការណ៍ផ្តាច់មុខលើការបញ្ជាក់របស់កំពូលតារាបាល់ទាត់ Cristiano Ronaldo ថា លោកត្រៀមនឹងចុះកុងត្រាជាមួយក្លឹប Al Nassr របស់ប្រទេសអារ៉ាប៊ីសាអូឌីត។ យោងតាមព័ត៌មានពី Marca បានឱ្យដឹងថា Ronaldo ត្រូវបានជ្រើសរើសដោយទទួលបានប្រាក់ខែ ២០០លានអឺរ៉ូក្នុងមួយឆ្នាំ (ប្រហែល ២១០លានដុល្លារអាមេរិក) សម្រាប់រយៈពេល ២ឆ្នាំកន្លះ។  ប្រាក់ខែនេះ បើរាប់បញ្ចូលទាំងប្រាក់បៀវត្សរ៍ ប្រាក់រង្វាន់ និងកិច្ចព្រមព្រៀងផ្សាយពាណិជ្ជកម្ម វាអាចកើនឡើងដល់ប្រមាណ ៥០០លានអឺរ៉ូក្នុងមួយឆ្នាំ (ប្រហែល ៥២៦លានដុល្លារអាមេរិក)។

ប្រសិនបើការចុះហត្ថលេខានេះទទួលបានជោគជ័យ នេះនឹងក្លាយជាប្រាក់បៀវត្សរ៍ខ្ពស់បំផុតក្នុងប្រវត្តិសាស្ត្របាល់ទាត់ពិភពលោក ដែលកីឡាករម្នាក់ទទួលបានពេលលេងឱ្យក្លឹបបរទេស។ ជាមួយគ្នាដែរ ក្លឹប Al Nassr ជឿជាក់ថា វត្តមានរបស់កំពូលតារាបាល់ទាត់សញ្ជាតិព័រទុយហ្គាល់ នឹងជួយឱ្យក្រុមរបស់ពួកគេ បង្កើនតំណែងខ្ពស់នៅក្នុងចំណាត់ថ្នាក់ពិភពលោក។

យ៉ាងណាមិញ កាលពីពីរសប្តាហ៍មុន ក្នុងបទសម្ភាសន៍ជាមួយប្រព័ន្ធផ្សព្វផ្សាយ Ronaldo បាននិយាយថា ខ្លួនបានបដិសេធការអញ្ជើញពីក្លឹបអារ៉ាប៊ីសាអូឌីត បើទោះបីជាប្រាក់ខែខ្ពស់ដល់ ៣៦៦លានដុល្លារក៏ដោយ។ ប៉ុន្តែពេលនេះ គេនៅតែរំពឹងថា ក្រោយចប់ការប្រកួត World Cup 2022 កីឡាករ Ronaldo នឹងហោះទៅកាន់ប្រទេសអារ៉ាប៊ីសាអូឌីត ដើម្បីចុះកុងត្រាជាមួយក្លឹប Al Nassr។

គួរបញ្ជាក់ថា ចាប់តាំងពី Ronaldo បញ្ចប់កុងត្រាជាមួយ MU មក ក្លឹបជាច្រើនផ្សេងទៀតបានទាក់ទងកីឡាករវ័យ ៣៧រូបនេះ ដើម្បីជ្រើសរើសរូបលោកឱ្យក្លាយជាសមាជិករបស់ពួកគេ។ យ៉ាងណាក្ដី ពេលនេះ Ronaldo មិនទាន់សម្រេចចិត្តជាផ្លូវការនៅឡើយទេ៕

ប្រែសម្រួល៖ សន្យា

ចុចអាន៖ World Cup 2022 ធ្វើឲ្យពិភពអារ៉ាប់ រួបរួមគ្នាសាជាថ្មី (មានវីដេអូ)

ចុចអាន៖ ចាប់បានភស្តុតាងបញ្ជាក់ថា អនាគតស្ដេចស្រី អេស្ប៉ាញ ចាប់ចិត្តប្រតិព័ទ្ធកីឡាករ Gavi