ចាប់បានភស្តុតាងបញ្ជាក់ថា អនាគតស្ដេចស្រី អេស្ប៉ាញ ចាប់ចិត្តប្រតិព័ទ្ធកីឡាករ Gavi

ថ្មីៗនេះ បណ្តាញទំនាក់ទំនងសង្គមពិភពលោកហាក់មានការរំជើបរំជួលដោយសារលេចឮព័ត៌មាន ព្រះនាងម្ចាស់ Leonor អនាគតមហាក្សត្រីអេស្ប៉ាញ បានលង់ស្នេហ៍លើតារាវ័យបាល់ទា​ត់វ័យក្មេងនៃក្លឹប Barcelona លោក Pablo Martín Páez Gavira ។

កាលពីល្ងាចថ្ងៃទី២៩ ខែវិច្ឆិកា កាសែតអេស្ប៉ាញ Diario AS បានទម្លាយព័ត៌មានមួយចំនួនដែលបង្ហាញថា ព្រះនាងម្ចាស់ Leonor ព្រះជន្ម ១៧វស្សា បានលង់ចិត្តប្រតិព័ទ្ធចំពោះខ្សែបម្រើ Pablo Gavi ដែលបច្ចុប្បន្នមានវ័យ ​១៨ឆ្នាំ។

កាសែតអេស្ប៉ាញបានរកឃើញភ័ស្តុតាងមួយចំនួនគឺថា នៅក្នុងឯកសារនៅសាលារបស់ព្រះនាងម្ចាស់មានរូបភាពជាច្រើនរបស់កីឡាករ Gavi។ លើសពីនេះទៀត កាលពីថ្ងៃទី២៣ ខែវិច្ឆិកា កន្លងទៅ ស្តេច Felipe VI ដែលជាព្រះបិតារបស់ព្រះនាងម្ចាស់ Leonor មានឱកាសយាងទៅលេងក្រុមកីឡាករអេស្ប៉ាញ ហើយទ្រង់បានសុំហត្ថលេខាពី Pablo Gavi ឱ្យចុះនៅលើព្រះពស្ត (អាវ) របស់បុត្រី ខណៈរបាយការណ៍បង្ហាញថា ព្រះនាងម្ចាស់គឺជាហ្វេនរបស់កីឡាករវ័យក្មេងនៃក្លឹប Barcelona រូបនេះ។

ព័ត៌មាននេះបានបង្ហាញឱ្យឃើញថា ព្រះនាងម្ចាស់បានធ្លាក់ក្នុងអន្លង់ស្នេហ៍ជាមួយនឹងខ្សែបម្រើដ៏សង្ហា ដែលកំពុងចូលរួមប្រកួតបាល់ទាត់ពិភពលោក ឆ្នាំ២០២២ ស្របពេលដែលទទួលដំណឹងនេះរួចមក អ្នកគាំទ្រនាំគ្នាអបអរព្រោងព្រាត ហើយគ្រប់គ្នាពិតជារំពឹងថា អ្នកទាំងពីរអាចក្លាយជាគូស្នេហ៍ពិត នាពេលឆាប់ៗខាងមុខនេះ។

គួររំលឹកថា ព្រះនាងម្ចាស់ Leonor គឺជាបុត្រីច្បងរបស់ស្តេច Felipe VI និងម្ចាស់ក្សត្រី Letizia នៃប្រទេសអេស្ប៉ាញ។ បច្ចុប្បន្ន ព្រះនាងរាជបុត្រីដែលនឹងត្រូវស្នងរាជ្យបល្ល័ង្កនៃប្រទេសអេស្ប៉ាញនាពេលអនាគត៕

ប្រែសម្រួល៖ សន្យា

ចុចអាន៖ កីឡាករក្មេងបំផុត នៅក្នុងការប្រកួត World Cup 2022 កំពុងទាក់ទាញហ្វេនស្ទើរពាសពេញពិភពលោក

ចុចអាន៖ ព្រះជន្ម ១៧វស្សា ព្រះនាងម្ចាស់ Leonor មានសមត្ថភាពពេញប្រៀប សក្តិសមជាអនាគតមហាក្សត្រីអេស្ប៉ាញ