កីឡា

លោក ថោន ខុន៖ NOCC និងសមាជិកត្រូវសាមគ្គីដាច់ខាតដើម្បីជោគជ័យស៊ីហ្គេម-អាស៊ានប៉ារ៉ាហ្គេម២០២៣

បានផុស

៣ years មុន

នៅ

ថ្ងៃសុក្រ ៣០ ធ្នូ ២០២២

ដោយ

លោក ថោង ខុន រដ្ឋមន្ត្រីក្រសួងទេសចរណ៍និងជាប្រធានគណៈកម្មាធិការជាតិអូឡាំពិកកម្ពុជា (NOCC) បានប្តេជ្ញាឯកភាពគ្នាជាធ្លុងមួយ ឆ្ពោះទៅគោលដៅអភិវឌ្ឍ និងការពារផលប្រយោជន៍កីឡាជាតិទាំងអស់គ្នា ពិសេសពង្រឹងសាមគ្គីភាពផ្ទៃក្នុងរឹងមាំ ឱ្យបានដាច់ខាត ដើម្បីធានា និងផ្តល់ការជឿជាក់ការធ្វើជាម្ចាស់ផ្ទះកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ប្រកបដោយជោគជ័យ។

ក្នុងមហាសន្និបាតបញ្ចប់អាណត្តិទី៧ និងបន្តអាណត្តិទី៨ ឆ្នាំ២០២២-២០២៦ នារសៀលថ្ងៃសុក្រ ទី៣០ ខែធ្នូ ឆ្នាំ២០២២នេះនៅពហុកីឡដ្ឋានជាតិមរតកតេជោ លោក ថោន ខុន បានលើកឡើងថា អាណត្តិទី៧របស់ NOCC កន្លងទៅនេះ ពិតជាមានសារសំខាន់ណាស់ក្នុងការត្រៀមរៀបចំធ្វើជាម្ចាស់ផ្ទះការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ប៉ុន្តែអាណត្តិទី៨ រឹតតែសំខាន់ថែមទៀត ក្នុងដំណាក់កាលរៀបចំការប្រកួតឱ្យទទួលបានជោគជ័យដ៏ត្រចះត្រចង់តាមការគ្រោងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបញ្ជាក់ថា ៖«ដើម្បីធានាបាននូវជោគជ័យក្នុងឆ្នាំប្រតិបត្តិ គណៈកម្មាធិការជាតិអូឡាំពិកកម្ពុជា រួមជាមួយសហព័ន្ធកីឡាជាតិជាសមាជិកទាំងអស់មានឆន្ទៈតែមួយ ស្មារតីតែមួយ ឯកភាពគ្នាជាធ្លុងមួយ ឆ្ពោះទៅគោលដៅអភិវឌ្ឍ និងការពារផលប្រយោជន៍កីឡាជាតិទាំងអស់គ្នា ពិសេសពង្រឹងសាមគ្គីភាពផ្ទៃក្នុងរឹងមាំ ឱ្យបានដាច់ខាត ដើម្បីធានា និងផ្តល់ការជឿជាក់ថា SEA Games-ASEAN Para Games យើងពិតជាធ្វើបានគឺ ខ្មែរធ្វើបាន»។

មហាសន្និបាតបញ្ចប់អាណត្តិចាស់ និងបោះឆ្នោតជ្រើសរើសគណៈកម្មាធិការប្រតិបត្តិអាណត្តិថ្មីទី៨របស់ NOCC នៅពេលនេះបញ្ចូលសមាជិកប្រតិបត្តិថ្មី២រូបគឺលោកនាយឧត្តមសេនីយ៍សន្តិបណ្ឌិត នេត សាវឿន ប្រធានសហព័ន្ធកីឡាបាល់ទះ និង លោកស្រី ញ៉ែម មរកត ប្រធានសហព័ន្ធកីឡារាំ ជាសមាជិកគណៈកម្មាធិការប្រតិបត្តិអាណត្តិថ្មី តាមនីតិវិធីបោះឆ្នោតជាកញ្ចប់៕

អត្ថបទ៖ វីរបុត្រ

Related Topics:កីឡាស៊ីហ្គេម