កីឡា

Jesús Navas ជាកីឡាករទី១ក្នុងប្រវត្តិសាស្រ្តឈ្នះពានធំៗ៣ផ្សេងគ្នាជាមួយអេស្ប៉ាញ

បានផុស

៣ years មុន

នៅ

ថ្ងៃអង្គារ ២០ មិថុនា ២០២៣

ដោយ

កីឡាករ Jesús Navas បានបង្កើតកំណត់ត្រាប្រវតិ្តផ្ទាល់ខ្លួនថ្មីមួយជាមួយក្រុមជម្រើសជាតិ អេស្ប៉ាញ បន្ទាប់សមរភូមិវាលស្មៅក្នុងពានរងា្វន់ UEFA Nation League នៅទឹកដីប្រទេស ហូឡង់បានបញ្ចប់ទៅកាលពីចុងសប្តាហ៍នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមគោជល់ អេស្ប៉ាញ បានក្លាយជាម្ចាស់ពានរង្វាន់ UEFA Nation League ឆ្នាំ២០២៣ តាមរយៈជ័យជម្នះលើជម្រើសជាតិ ក្រូអាត ក្នុងលទ្ធផលយ៉ាងតានតឹងដោយបាល់ប៉េណាល់ទីកាត់សេចក្តី ៥-៤។

Jesús Navas ជាកីឡាករជម្រើសជាតិ អេស្ប៉ាញ ដំបូងគេក្នុងប្រវត្តិសាស្ត្រដែលបានឈ្នះពានរង្វាន់ធំៗ៣ផ្សេងគ្នាជាមួយក្រុមជម្រើសជាតិ។ ទី១ អេស្ប៉ាញបានឈ្នះជើងឯកពិភពលោក (World Cup) ឆ្នាំ២០១០។ ទី២ ឆ្នាំ២០១២ អេស្ប៉ាញបានឈ្នះជើងឯកទ្វីបអឺរ៉ុប (European Championship) និងទី៣ចុងក្រោយបំផុតបានឈ្នះជើងឯកអឺរ៉ុប UEFA Nation League ឆ្នាំ២០២៣។

ស្ថិតក្នុងវ័យ៣៧ ឆ្នាំ Navas បានលេងពេញមួយប្រកួតក្នុងវគ្គពាក់កណ្តាលផ្តាច់ព្រ័ត្រជាមួយ អ៉ីតាលី ហើយត្រឹមតែ៧២ម៉ោងក្រោយ រូបគេបានលេងជាង៩០នាទីទៀតក្នុងវគ្គផ្តាច់ព្រ័ត្រជាមួយក្រុមក្រូអាតនៅទីក្រុង Rotterdam។ រូបគេត្រូវបានដូរចេញ និងជំនួសវិញដោយខ្សែការពារស្លាបស្តាំ Carvajal នៅនាទី៩៧សម្រាប់ម៉ោងបន្ថែម១៥នាទីពីរដង។

ក្នុងវគ្គជម្រុះក្នុងពូល ក្រុមជម្រើសជាតិ អេស្ប៉ាញ ស្ថិតក្នុង ពូល A2 ដោយប្រកួត៦ លើក ឈ្នះ៣ ស្មើ២ ចាញ់១ មាន១១ពិន្ទុ ឈរនៅលេខ១។ ចំណែក្រុមជម្រើសជាតិ ក្រូអាត ស្ថិតក្នុង ពូល A1 ដោយប្រកួត៦លើក ឈ្នះ៤ ស្មើ១ ចាញ់១ មាន១៣ពិន្ទុ ឈរនៅលេខ១។ មុនឡើងមកដល់វគ្គផ្ដាច់ព្រ័ត្រ ក្រុមជម្រើសជាតិ អេស្ប៉ាញបានទម្លាក់ ក្រុមជម្រើសជាតិ អ៊ីតាលី ដោយលទ្ធផល ២-១ ហើយ ក្រុមជម្រើសជាតិ ក្រូអាត បានទម្លាក់ក្រុមជម្រើសជាតិ ហូឡង់ ដែលជាម្ចាស់ផ្ទះ ដោយលទ្ធផល ៤-២។

សម្រាប់កីឡាករ Jesús Navas បានបង្ហាញខ្លួនបាន ៦២៨ លើកឲ្យក្លិបក្នុងអាជីពជាកីឡាករបាល់ទាត់ដោយផ្តើមចេញពីយុវជនរបស់ក្លិប Sevilla។ រូបគេក៏ជាសមាជិកដ៏សំខាន់ដែលជួយឲ្យក្លិប Sevilla ឈ្នះពានរង្វាន់ Europa League ២០២៣ ផងដែរ។ សម្រាប់ក្លិប និងជម្រើសជាតិ Navas បានសម្រេចសមិទ្ធផលជាច្រើនក្នុងអាជីពជាកីឡាករបាល់ទាត់៕