កីឡា

ក្រុម Al Nassr បង្កើតប្រវត្តិសាស្ត្រដំបូងឡើងវគ្គផ្តាច់ព្រ័ត្រក្នុងពាន Arab Cup ជួប Al Hilal (វីដេអូ)

បានផុស

៣ ខែ មុន

នៅ

ថ្ងៃព្រហស្បតិ៍ ១០ សីហា ២០២៣

ដោយ

ក្រុម Al Nassr FC បានបង្កើតប្រវត្តិសាស្ត្រដំបូងក្នុងការឡើងដល់វគ្គផ្តាច់ព្រ័ត្រពានរង្វាន់ Arab Club Championship Cup ឆ្នាំ២០២៣ បន្ទាប់ពីបានយកឈ្នះក្រុម Al Shorta ដោយលទ្ធផល ១-០ នៅវគ្គពាក់កណ្តាលផ្តាច់ព្រ័ត្រកាលពីយប់មិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតពិតរវាង Al Shorta និង Al Nassr FC ពិតជាតឹងតែងខ្លាំងមែនទែន ដោយសារ Al Shorta បានការពារយ៉ាងល្អមែនទែន បើទោះបីជាក្រុមដែលដឹកនាំដោយប្រធានក្រុម Ronaldo សម្រុកយ៉ាងណាក៏ដោយ។

ផ្ទុយទៅវិញ Al Shorta បានវាយបកម្តងម្កាលក៏គ្រោះថ្នាក់។ ដល់នាទី៧៥ ទើបអាជ្ញាកណ្តាលសម្រេចផ្តល់បាល់ពិន័យ១១ម៉ែត្រដល់ Al Nassr FC ដែលប្រធាន Ronaldo ស៊ុតបានសម្រេចដើម្បីនាំមុខ ១-០។ បន្ទាប់ពីដៃគូនាំមុខ Al Shorta ទទួលបានឱកាសបាល់ដាច់មាត់ទៅហើយ ប៉ុន្តែអ្នកចាំទី Al Nassr FC សង្គ្រោះបាល់បានជោគជ័យ។

ចំណែកក្រុម Al Hilal ទទួលបានជ័យជម្នះដោយលទ្ធផល ៣-១ លើក្រុម Al Shabab បើទោះបីជាសមាជិករបស់ខ្លួន១រូបត្រូវបានពិន័យកាតក្រហម។ Al Hilal បើកការនាំមុខ ១-០ នៅនាទីទី៩ដោយកីឡាករ Kanno ប៉ុន្តែសមាជិករបស់ខ្លួន Muaiouf ទទួលបានកាតក្រហមនៅនាទីទី២៥ដើម្បីចេញពីលាន។

ទោះបីជាសមាជិកសល់តែ១០រូប ក៏ Al Hilal នៅតែបន្តធ្វើបានល្អដោយរកបាន១គ្រាប់ទៀតដោយកីឡាករ Malcom នៅនាទីទី៤៥+៣។ នៅវគ្គទី២ Al Shabab វាយបកបាន១គ្រាប់វិញដោយកីឡាករ Guellar នៅនាទី៥៦ ដើម្បីតាមពីក្រោយ ២-១។ យ៉ាងណា ជិតចប់ការប្រកួតកីឡាករ Hamdan ស៊ុតបាន១គ្រាប់ជួយឲ្យ Al Hilal ទទួលបានជ័យជម្នះ ៣-១។

ដូច្នេះនៅវគ្គផ្តាច់ព្រ័ត្រ ក្រុម Al Nassr FC ជួប Al Hilal នៅវគ្គផ្តាច់ព្រ័ត្រ នាយប់ថ្ងៃសៅរ៍ ទី១២ ខែសីហា ឆ្នាំ២០២៣។

តារាជើងស៊ុត Ronaldo បានក្លាយជាកីឡាករល្អប្រចាំការប្រកួតកាលពីយប់មិញ និងជាកីឡាកររកបានគ្រាប់បាល់នាំមុខគេ (៤គ្រាប់) ខណៈ Kamrim Benzima រកបាន៣គ្រាប់ ប៉ុន្តែក្រុមរបស់ខ្លួនបានធ្លាក់នៅវគ្គ៨ក្រុមចុងក្រោយបាត់ហើយ។

នេះជាលើកដំបូងដែល Al Nassr FC បានឡើងដល់វគ្គផ្តាច់ព្រ័ត្រចចាប់តាំងពីពានរង្វាន់ធំប្រចាំតំបន់អារ៉ាប់មួយនេះត្រូវបានបង្កើតឡើងតាំងពីឆ្នាំ១៩៨១ ខណៈ Al Hilal ធ្លាប់ឈ្នះជើងឯកពីរដង ឆ្នាំ១៩៩៤ ១៩៩៥ និងជើងឯករងពីរដង ឆ្នាំ១៩៨៩ ២០១៩៕