កីឡា

លោក Oleg ៖«ប៉ះព្រះខ័នរាជស្វាយរៀងត្រូវហ៊ានលេង បើមិនហ៊ាន កុំចូលទីលានល្អជាង»

បានផុស

៤៥ នាទី មុន

នៅ

ថ្ងៃសុក្រ ១៧ វិច្ឆិកា ២០២៣

ដោយ

លោក Oleg Starynskyi គ្រូបង្វឹកភ្នំពេញក្រោនកំពុងត្រៀមខ្លួនយ៉ាងសកម្មដើម្បីប្រកួតក្នុងសប្តាហ៍ទី១១នៃលីគកំពូលកម្ពុជា២០២៣-២៤ជាមួយក្រុមខ្លាំងព្រះខ័នរាជស្វាយរៀងដែលមិនទាន់ស្គាល់បរាជ័យក្នុង១០សប្តាហ៍កន្លងទៅ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសញ្ញាតិអ៊ុយក្រែនបានយល់ឃើញថា សម្រាប់ការប្រកួតជាមួយព្រះខ័នរាជស្វាយរៀងនៅពេលខាងមុខនេះគឺជាការប្រកួតដ៏លំបាកបំផុតមួយសម្រាប់ក្រុម លោក ប៉ុន្តែលោកបានប្រាប់កូនក្រុមឲ្យហ៊ានលេងដោយមិនខ្លាចចាញ់ឡើយ។ ជាពិសេសត្រូវហ៊ានលេងគ្រប់គ្រងបាល់ឲ្យច្រើនពោលគឺមិនបណ្តោយឲ្យព្រះខ័នរាជស្វាយរៀងលេងតាមចិត្តនោះទេ។

លោក Oleg Starynskyi បានលើកឡើងថា ៖«នេះជាការលេងនៅដីរបស់យើង អីចឹងខុសប្លែកគ្នាហើយធៀបនឹងជើងទី១។ ពួកគេជាក្រុមពូកែលេងគ្រប់គ្រងបាល់ លេងបុកខ្លាំង ដូចយើងដែរ។ យើងត្រូវតែហ៊ានលេង យើងត្រូវតែគ្រប់គ្រងបាល់ ជាពិសេសត្រូវផ្តោតអារម្មណ៍លើការសម្រុកឲ្យបានច្រើនដើម្បីបង្កើតឱកាសរកគ្រាប់បាល់»។

«ខ្ញុំសង្កេតមើលការប្រកួតកន្លងមករបស់ព្រះខ័នរាជស្វាយរៀង ក្រុមមួយចំនួនអត់សូវហ៊ានលេងជាមួយព្រះខ័នរាជស្វាយរៀងទេ។ ពួកគេលេងការពារច្រើន ព្យាយាមលេងការពារ តែចុងបញ្ចប់នៅតែរបូតគ្រាប់បាល់ដដែល។ ខ្ញុំគិតថា បើលេងរបៀបនេះ មិនបាច់ចូលទីលានល្អជាង។ យើងត្រូវតែហ៊ានលេងជាមួយគេ។ យើងត្រូវតែគ្រប់គ្រងការប្រកួតឲ្យបានច្រើន បង្កើតឱកាស និងរកគ្រាប់បាល់»។

តាមការគ្រោងទុក ភ្នំពេញក្រោនត្រូវបើកទ្វារកីឡដ្ឋានរបស់ខ្លួនទទួលស្វាគមន៍ក្រុមកំពូលតារាង ព្រះខ័នរាជស្វាយរៀង នៅថ្ងៃទី២៥ ខែវិច្ឆិកា ឆ្នាំ២០២៣ ដែលជាសប្តាហ៍ទី១១នៃលីគកំពូលកម្ពុជា។ កាលពីជើងទី១ ភ្នំពេញក្រោនចាញ់ព្រះខ័នរាជស្វាយរៀង ២-១ នៅកីឡដ្ឋានខេត្តស្វាយរៀង។ ១០ប្រកួតកន្លងទៅរបស់ ព្រះខ័នរាជស្វាយរៀងគឺឈ្នះទាំង១០ប្រកួត ខណៈភ្នំពេញឈ្នះ៧ ស្មើ១ និងចាញ់២៕