កីឡា

ស្ថានភាពរបួស ជូន ចាន់ចាវ អាចអវត្តមានពីទីលានដល់ចប់រដូវកាល២០២៣-២៤

បានផុស

១ year មុន

នៅ

ថ្ងៃចន្ទ ២៥ ធ្នូ ២០២៣

ដោយ

សមាជិកក្លិបភ្នំពេញក្រោន និងជម្រើសជាតិកម្ពុជា ជូន ចាន់ចាវ ត្រូវអវត្តមានពីពានរង្វាន់ AFC Cup និងអាចរហូតដល់ចប់លីគកំពូលកម្ពុជារដូវកាល២០២៣-២៤ បន្ទាប់ពីរងរបួសកជើងក្នុងសប្តាហ៍ទី១៥នៃលីគកំពូលកម្ពុជានៅពេលភ្នំពេញក្រោនបានឈ្នះ អាយអេសអាយ ដង្កោសែនជ័យ ដោយលទ្ធផល ០-២ នៅកីឡដ្ឋានខេអិមអេកផាក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បន្ទាប់ពីដួលរបួសភ្លាម ក្រុមការងារបានបញ្ជូនទៅកាន់មន្ទីរពេទ្យភ្លាមៗ ដោយសារស្ថានភាពរបួសធ្ងន់ធ្ងរ តម្រូវធ្វើការវះកាត់ជាបន្ទាន់ទាំងយប់ថ្ងៃអាទិត្យ ទី២៤ ខែធ្នូ ជាថ្ងៃប្រកួតតែម្តង។

នៅព្រឹកថ្ងៃចន្ទ ទី២៥ ខែធ្នូនេះ លោក កែវ សុខង៉ន អ្នកចាត់ការរបស់ក្លិបភ្នំពេញក្រោនបានប្រាប់«កម្ពុជាថ្មី»ថា ៖«ការវះកាត់របួសជើងរបស់ ជូន ចាន់ចាវ កាលពីយប់មិញទទួលបានជោគជ័យ។ ត្រូវការពេលវេលាព្យាបាល និងមើលថែយូរទៀត។ ប្រហែលជាត្រូវការពេលវេលាចន្លោះពី៣ទៅ៦ខែទើបគាត់អាចវិលត្រឡប់ចូលទីលានវិញ»។

ខេមបូឌានព្រីមៀរលីគបានចាប់ផ្តើមកាលពីថ្ងៃទី៥ ខែសីហា ឆ្នាំ២០២៣ និងគ្រោងបញ្ចប់នៅពាក់កណ្តាលឆ្នាំ២០២៤ ដូច្នេះ ជូន ចាន់ចាវ អាចនឹងអវត្តមានពីលានរហូតដល់ចប់រដូវកាល ប្រសិនបើស្ថានភាពរបួសមិនទាន់ជាសះស្បើយ១០០%មុន៦ខែដំបូងនៃឆ្នាំថ្មី។

ជាមួយគ្នានេះ រូបគេនឹងមិនបានធ្វើដំណើរជាមួយក្រុមជម្រើសជាតិកម្ពុជាទៅប្រកួតមិត្តភាពបិទទ្វារជាមួយម្ចាស់ផ្ទះ ជម្រើសជាតិកាតារនាចុងខែធ្នូនេះទេ ហើយក៏មិនបានចូលរួមប្រកួតក្នុងពានរង្វាន់ AFC Cup វគ្គពាក់កណ្តាលផ្តាច់ព្រ័ត្រប្រចាំតំបន់អាស៊ាននាខែកុម្ភៈ ឆ្នាំ២០២៤ដែរ៕