កីឡា

គ្រូ Madura United ថា របូត២គ្រាប់លឿនពេកធ្វើឲ្យខូចផែនការអស់

បានផុស

១ សប្តាហ៍ មុន

នៅ

ថ្ងៃសុក្រ ១១ មេសា ២០២៥

ដោយ

លោក Afredo Vera គ្រូបង្វឹក Madura United ចាត់ទុក២គ្រាប់ដែលម្ចាស់ផ្ទះ ព្រះខ័នរាជស្វាយរៀង រកបានយ៉ាងលឿននៅដើមវគ្គទី១បានបំផ្លាញផែនការរបស់លោកទាំងស្រុង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះខ័នរាជស្វាយរៀង បានយកឈ្នះ Madura United ដោយលទ្ធផល ៣-០ ជើងទី១ វគ្គពាក់កណ្តាលផ្តាច់ព្រ័ត្រ ពានរង្វាន់ AFC Challenge League យប់ថ្ងៃទី១០ ខែមេសា ឆ្នាំ២០២៥ នៅពហុកីឡដ្ឋានជាតិមរតកតេជោ។ ៣គ្រាប់របស់ព្រះខ័នរាជស្វាយរៀង រកបានដោយកីឡាករសញ្ជាតិប្រេស៊ីល Breno Caetano នៅនាទីទី៤, កីឡាករសញ្ជាតិឡាវ Bounkong នៅនាទីទី៦ និងគ្រាប់ចុងក្រោយដោយកីឡាករកម្ពុជា មិន រតនៈ នៅនាទី៩០។

ក្នុងសន្និសីទសារព័ត៌មាន ក្រោយចប់ការប្រកួត លោក Afredo Vera បានលើកឡើងថា ៖«យើងរបូតគ្រាប់បាល់លឿនពេក២គ្រាប់នៅដើមវគ្គទី១ ដូច្នេះហើយធ្វើឲ្យការលេងរបស់យើងអត់បានធ្វើទៅតាមផែនការរបស់យើងរៀបចំនោះទេ»។

លោកបានបន្តឆ្លើយសំណួរអ្នកសារព័ត៌មានថា ៖«ទោះបីជាយ៉ាងណា យើងនៅមានពេល៩០នាទីទៀត សម្រាប់ការប្រកួតនៅក្នុងដី ដែលមានអ្នកគាំទ្រ។ យ៉ាងហោចណាស់ ក៏យើងបានលទ្ធផលស្មើ។ ចំពោះគុណភាពស្មៅនៅពហុកីឡដ្ឋានជាតិមរតកតេជោ ខ្ញុំអត់មានគំនិតអ្វីទេ។ បើគិតអ្វីម្យ៉ាងនោះ មានន័យថា យើងយកជាលេស»។

នៅចាំបានថា ក្នុងសន្និសីទសារព័ត៌មានមុនការប្រកួត លោក Afredo Vera បានឲ្យកូនក្រុមរបស់លោកលេងដោយភាពឆ្លាតវៃ ធ្វើឲ្យមានលទ្ធផលល្អ ពីព្រោះការប្រកួតមានពីរជើងដើម្បីមានទំនុកចិត្តជើងទី២ក្នុងដីរបស់ខ្លួន ប៉ុន្តែបែរជាមិនធ្វើតាមផែនការនៅជើងទី១៕