ប្រាក់​ មុន្នីឧត្តម កំពុងឈរ​លើគេជាបេក្ខភាពឈ្នះស្បែកជើងមាស ពាន«Hun Sen Cup»

ខ្សែបម្រើប្រយុទ្ធរបស់ព្រះខ័នរាជស្វាយរៀង កីឡាករ ប្រាក់ មុន្នីឧត្តម កំពុងស្ថិតជាបេក្ខភាពឈ្នះស្បែកជើងមាស ក្នុងពានរង្វាន់សម្តេចអគ្គមហាសេនាបតីតេជោ ហ៊ុន សែន លើក​ទី​១៨​ រដូវកាល ២០២៤-២០២៥។

ការប្រកួតពាន Hun Sen Cup បានឈានមកដល់វគ្គផ្តាច់ព្រ័ត្រហើយ ខណៈក្រុមការពារតំណែងជើងឯក ព្រះខ័នរាជស្វាយរៀង នឹងត្រូវជួបគ្នាជាមួយក្រុម ភ្នំពេញក្រោន នៅពហុកីឡដ្ឋានជាតិមរតកតេជោ ថ្ងៃ អាទិត្យ ទី ២៥ ខែ ឧសភា វេលាម៉ោង ៧ យប់។ ចំណែកក្រុមដណ្តើមចំណាត់ថ្នាក់លេខ ៣ វិញ ក៏ធ្វើនៅថ្ងៃនោះផងដែរ ដោយក្រុម បឹងកេត នឹងត្រូវជួបគ្នាជាមួយក្រុម វិសាខា។

នៅក្នុងពានរង្វាន់​សម្តេច​តេជោ ហ៊ុន សែន រដូវកាលនេះ កីឡាករ​ ប្រាក់មុន្នី ឧត្តម កំពុងឈរនៅលើគេ ជាអ្នកស៊ុតបញ្ចូលទីច្រើនជាងគេ ហើយក៏អាចនឹងក្លាយជាបេក្ខភាពឈ្នះស្បែករដូវកាលនេះផងដែរ ដោយបច្ចុប្បន្នមាន ៦ គ្រាប់ក្នុងដៃ។

ទោះបីជាយ៉ាងណា ខ្សែបម្រើប្រយុទ្ធវ័យ ៣១ ឆ្នាំ គឺត្រូវប្រជែងជាមួយកីឡាករមួយចំនួនទៀតនៅថ្ងៃប្រកួតចុងក្រោយ ជាពិសេស គឺខ្សែប្រយុទ្ធ បឹងកេត កីឡាករ សៀង ចន្ធា ដោយរូបគេមានចំនួន ៥ គ្រាប់ តាមពីក្រោយត្រឹមតែ ១ គ្រាប់ប៉ុណ្ណោះ។

ចំណែកកីឡាករ ៤ នាក់ទៀត ក៏អាចមានឱកាសប្រជែងស្បែកជើងមាសដែរ ដោយពួកគេសុទ្ធតែមាន ៤ គ្រាប់ដូចគ្នា ដូចជា ម៉ាត់ នូរុណ, Andres Nieto, ស៊ិន កក្កដា និង ណារ៉ុង កក្កដា ៕

អត្ថបទ៖ សេម កុសល