រោគសញ្ញាកូវីដ១៩ Archives - Kampuchea Thmey Daily

អូមីក្រុង កើតលើទារក មានរោគសញ្ញាអ្វីខ្លះ? គួរការពារបែបណា?

សាង ស្រីល័ក្ខ — Thu, 17 Mar 2022 04:26:48 +0000

ពិតណាស់ ទារកទើបកើត និងក្មេងតូចៗ មានប្រព័ន្ធភាពស៊ាំនៅខ្សោយនៅឡើយ។ ហេតុនេះហើយ ទើបប៉ាម៉ាក់ចាំបាច់ត្រូវប្រុងប្រយ័ត្នចំពោះសុខភាពកូនឲ្យបានដិតដល់ ដើម្បីជៀសវាងការឆ្លងជំងឺផ្សេងៗ ជាពិសេសគឺវីរុសកូវីដ-១៩ តែម្ដង។ យ៉ាងណាមិញ តើអូមីក្រុងបង្កផលប៉ះពាល់អ្វីខ្លះដល់ទារកទើបកើត ហើយវីរុសបំប្លែងថ្មីនេះមានរោគសញ្ញាយ៉ាងម៉េចខ្លះចំពោះអាអូនតូចៗ?

ឥទ្ធិពលនៃអូមីក្រុងចំពោះទារកទើបកើត

ទារកក្រោមអាយុ ១ឆ្នាំ ងាយនឹងឆ្លងវីរុសកូវីដបំប្លែងថ្មី អូមីក្រុង ព្រមទាំងអាចធ្លាក់ខ្លួនឈឺធ្ងន់ធ្ងរជាងកុមារធំៗ។ ប៉ុន្តែ ប៉ាម៉ាក់អាចអនុវត្តវិធីសាស្ត្រមួយចំនួន ដើម្បីការពារកូនពីវីរុសនេះ ដោយ៖

ប៉ាម៉ាក់ និងអ្នកមើលថែទាំទារកគួរពាក់ម៉ាស នៅពេលបី លេង ឬបញ្ចុកអាហារដល់ទារកទើបកើត។ ជាមួយគ្នានេះដែរ គួរលាងដៃឲ្យបានញឹកញាប់មុនពេលចូលជិតកូន។
ការចាក់វ៉ាក់សាំងបង្ការជំងឺកូវីដ-១៩ ឲ្យគ្រប់ដូសមានសារសំខាន់ណាស់ចំពោះប៉ាម៉ាក់ និងអ្នកមើលថែទាំក្មេង
គួរតម្លើងឧបករណ៍បន្សុទ្ធខ្យល់នៅក្នុងបន្ទប់បិទជិតដែលអាអូនស្នាក់នៅភាគច្រើន ដើម្បីកាត់បន្ថយហានិភ័យនៃវីរុសកូវីដ-១៩។
ប្រសិនបើប៉ាម៉ាក់មានរោគសញ្ញាដូចជាក្អក ផ្ដាសាយ កណ្ដាស់ អស់កម្លាំង គ្រុនក្ដៅ ឬមានបញ្ហាផ្លូវដង្ហើម ជាដើម យកល្អត្រូវនៅឲ្យឆ្ងាយពីកូនរហូតទាល់តែខ្លួនបានជាសះស្បើយទាំងស្រុង។
គួរកាត់បន្ថយការទៅលេងផ្ទះសាច់ញាតិ បងប្អូន ពីព្រោះទារកទើបកើតមានប្រព័ន្ធភាពស៊ាំខ្សោយ។
ម៉ាក់ៗដែលបំបៅដោះកូន គួរជៀសវាងនៅកន្លែងដែលមានមនុស្សច្រើន។

រោគសញ្ញានៃវីរុសបំប្លែងថ្មីអូមីក្រុងចំពោះទារកទើបកើត

គ្រុនក្ដៅ
ក្អក
ហៀរសំបោរ
តឹងច្រមុះ
រាករូស
អស់កម្លាំង
ដកដង្ហើមខ្លីៗ
ក្អួត
មិនឃ្លានអាហារឬបៅ

ក្នុងករណីដែលប៉ាម៉ាក់ឃើញកូនមានរោគសញ្ញាខាងលើ គួរពិគ្រោះជាមួយនឹងគ្រូពេទ្យកុមារជាបន្ទាន់ និងមិនត្រូវប្រើប្រាស់ថ្នាំផ្ដេសផ្ដាសឡើយ ពីព្រោះវាអាចបង្កគ្រោះថ្នាក់ដល់អាអូនបាន៕

អត្ថបទផ្ដល់ដោយ៖ Hello Krupet

ចុចអាន៖សព្វថ្ងៃ អ្នកឆ្លង អូមីក្រុង អាចដោយសារមូលហេតុទាំងនេះ

ចុចអាន៖ដុកទ័របកស្រាយលម្អិត Omicron ឆ្លងប៉ុន្មានថ្ងៃ ទើបបង្ហាញរោគសញ្ញាឲ្យដឹងខ្លួន

The post អូមីក្រុង កើតលើទារក មានរោគសញ្ញាអ្វីខ្លះ? គួរការពារបែបណា? appeared first on Kampuchea Thmey Daily.

គ្រូពេទ្យព្រមានជាថ្មី! អ្នកឆ្លងកូវីដពីមុន អាចអូសបន្លាយជិតមួយឆ្នាំ ប្រសិនបើប្រហែសខ្លួន

សាង ស្រីល័ក្ខ — Tue, 01 Mar 2022 00:35:00 +0000

សាស្ត្រាចារ្យសាកលវិទ្យាល័យ Chulalongkorn បាននិយាយនៅក្នុងហ្វេសប៊ុក កាលពីថ្ងៃចន្ទថា អ្នកដែលបានឆ្លងកូវីដពីមុន ទំនងជាទទួលរងនូវរោគសញ្ញាក្រោយកូវីដ ឬ អាចយូររហូតដល់មួយឆ្នាំ។

ដោយលើកឡើងពីការសិក្សានៅអឺរ៉ុប លើមនុស្ស ៧៣,៧២៧ នាក់ ដែលត្រូវបានបោះពុម្ពនៅក្នុងទស្សនាវដ្ដីនៃរោគរាតត្បាត កាលពីថ្ងៃសុក្រ លោក Thira Worathanarat គ្រូពេទ្យនៅថៃ បាននិយាយថា អតីតអ្នកជំងឺកូវីដ ទំនងជាទទួលរងនូវភាពអស់កម្លាំង ៤.៨ ដងច្រើនជាងអ្នកដែលមិនធ្លាប់ឆ្លង។

រោគសញ្ញាផ្សេងទៀតរួមមាន ដង្ហើមខ្លីៗ, តឹងក្នុងទ្រូង ,អ័ព្ទខួរក្បាល ,គេងមិនលក់ ,ញ័រទ្រូង ,ធ្លាក់ទឹកចិត្ត និងថប់បារម្ភ។ល។ ដូច្នេះហើយ គ្រូពេទ្យរូបនេះបាននិយាយថា វាជារឿងសំខាន់ ក្នុងការការពារខ្លួនយើង ហើយវិធីតែមួយគត់ដែលត្រូវធ្វើ គឺត្រូវពាក់ម៉ាស់ជានិច្ច រក្សាចម្ងាយ និងចៀសវាងការចែករំលែកអាហារ ឬភេសជ្ជៈជាមួយអ្នកដទៃ។

លោកក៏បាននិយាយដែរថា មនុស្សមិនគួរចំណាយពេលជាមួយអ្នកដទៃយូរពេកទេ ហើយជួបតែពេលចាំបាច់។ លោកក៏បានណែនាំឲ្យប្រជាពលរដ្ឋឈប់សម្រាកពីសាលា ឬការងារពេលឈឺផងដែរ៕

ប្រែសម្រួល៖ សាង ស្រីល័ក្ខ

ចុចអាន៖ប៉ាម៉ាក់ត្រូវច្បាស់ មុននាំកូនតូចៗ អាយុ ៣-៥ ឆ្នាំ ទៅចាក់វ៉ាក់សាំង Sinovac

ចុចអាន៖ក្រោយបាត់ខ្លួន ៣ ថ្ងៃ ពេលនេះ រកឃើញសាកសព តារាស្រី ថៃ Tangmo ហើយ

The post គ្រូពេទ្យព្រមានជាថ្មី! អ្នកឆ្លងកូវីដពីមុន អាចអូសបន្លាយជិតមួយឆ្នាំ ប្រសិនបើប្រហែសខ្លួន appeared first on Kampuchea Thmey Daily.

ដុកទ័របកស្រាយលម្អិត Omicron ឆ្លងប៉ុន្មានថ្ងៃ ទើបបង្ហាញរោគសញ្ញាឲ្យដឹងខ្លួន

សាង ស្រីល័ក្ខ — Thu, 24 Feb 2022 00:40:00 +0000

ខណៈការកើនឡើងនៃ Omicron កំពុងតែក្លាយជាពូជចម្លងលឿន ដែលធ្វើឲ្យមនុស្សជាច្រើនព្រួយបារម្ភ ពីសុខភាពផ្ទាល់ខ្លួនជាខ្លាំង។

ទន្ទឹមនោះ កាន់តែមានភាពមិនស្រួលនោះគឺ ជំងឺផ្ដាសាយ ។ ដូច្នេះសម្រាប់អ្នកមិនច្បាស់លាស់ អាចសាកល្បងពិនិត្យមើលថា តើយើងបានឆ្លង Omicron ដែរឬទេ? តើរោគសញ្ញាដែលអាចសង្កេតបាន នៅពេលណា? តើអ្នកឆ្លងភាគច្រើន មានរោគសញ្ញាអ្វីខ្លះ នៅដំណាក់កាលដំបូង ?

ចំពោះបញ្ហានេះ វេជ្ជបណ្ឌិត Teera Woratanarat មកពីមហាវិទ្យាល័យវេជ្ជសាស្ត្រ សាកលវិទ្យាល័យ Chulalongkorn ដោយយោងទៅលើរបាយការណ៍សិក្សា SARS-CoV-2 ដែលកំពុងស៊ើបអង្កេតនៅប្រទេសអង់គ្លេស HSA បានបង្ហាញតាមរយៈទំព័រហ្វេសប៊ុកផ្ទាល់ខ្លួនថា Omicron មានរយៈពេលភ្ញាស់ខ្លីជាងពូជមុនៗ។ ជាមធ្យម រោគសញ្ញាចាប់ផ្តើមក្នុងរយៈពេល ៣-៤ ថ្ងៃបន្ទាប់ពីការឆ្លង ឬអាចមានរោគសញ្ញាក្នុងរយៈពេល៩ថ្ងៃ អាស្រ័យលើស្ថានភាពរាងកាយរបស់មនុស្សម្នាក់ៗ ។

ដូច្នេះបើមាននរណាម្នាក់ បានទាក់ទងអ្នកដែលឆ្លងកូវីដពីមុនមក គួរតែមើល និងសង្កេតអាការដោយខ្លួនឯង រយៈពេល១០ថ្ងៃទៀត ទើបដឹងច្បាស់។ ជាពិសេស Omicron មានទំនោរទៅតាំងនៅកោសិកាក្នុងជញ្ជាំងនៃបំពង់ក នៅពេលនិយាយ ស្រែក ក្អក កណ្ដាស់ អាចរីករាលដាលយ៉ាងងាយស្រួល និងឆាប់រហ័ស។ អ្នកឆ្លងអាចចម្លងមេរោគបាន ទោះបីជាពួកគេមិនបង្ហាញរោគសញ្ញាអ្វីក៏ដោយ។ រយៈពេលឆ្លងច្រើនបំផុតគឺ ១-២ ថ្ងៃ មុនពេលរោគសញ្ញាលេចឡើង។ ម៉្យាងទៀត ប្រសិនបើរោគសញ្ញាត្រូវបានបង្ហាញ ការឆ្លងគឺឆ្លងច្រើនបំផុតក្នុងរយៈពេល ២-៣ ថ្ងៃ បន្ទាប់ពីការចាប់ផ្ដើមនៃជំងឺ។

ដើម្បីកាន់តែច្បាស់បន្ថែមទៀត សូមសង្កេតមើលពីរោគសញ្ញា omicron ទូទៅគឺ៖

– ហៀរសំបោរ

– កណ្តាស់

– ឈឺក្បាល

– អស់កម្លាំង

– ឈឺសាច់ដុំស្រាល

– ឈឺក

– អាចមានការបែកញើសពេលយប់។

ទោះយ៉ាងណាក៏ដោយ មនុស្សមួយចំនួនអាចមានការឈឺចាប់នៅផ្នែកខាងក្រោមខ្នង ហើយកម្រនឹងបាត់បង់រសជាតិ ឬក្លិន ដូចជាប្រភេទវីរុសបំប្លែងខ្លួនផ្សេងទៀតណាស់។ ប្រសិនបើអ្នកណាម្នាក់ មានប្រវត្តិប្រឈមមុខនឹងហានិភ័យខ្ពស់ ឬនៅក្នុងតំបន់ដែលមានហានិភ័យ គួរតែមានការពិនិត្យ RT-PCR ជាប្រញាប់ ៕

ប្រែសម្រួល៖ សាង ស្រីល័ក្ខ

ចុចអាន៖វេជ្ជបណ្ឌិតប្រាប់មូលហេតុ អ្នកខ្លះប៉ះពាល់អ្នកជំងឺកូវីដ តែមិនឆ្លង ឬមិនចេញរោគសញ្ញាទាល់តែសោះ

ចុចអាន៖ពិនិត្យមើលអាការឲ្យច្បាស់ ភាពខុសគ្នា រវាង Omicron គ្រុនផ្ដាសាយ និង គ្រុនឈាម

The post ដុកទ័របកស្រាយលម្អិត Omicron ឆ្លងប៉ុន្មានថ្ងៃ ទើបបង្ហាញរោគសញ្ញាឲ្យដឹងខ្លួន appeared first on Kampuchea Thmey Daily.

រោគសញ្ញានៃជំងឺទូទៅមួយលើក្មេង អាចជាវីរុស អូមីក្រុង ប៉ាម៉ាក់មិនគួរមើលរំលង

សាង ស្រីល័ក្ខ — Tue, 22 Feb 2022 07:30:00 +0000

សព្វថ្ងៃនេះ ករណីវីរុសអូមីក្រុងមិនទាន់ស្រាកស្រាន្តទេ នៅតែកើនមានច្រើលរាល់ថ្ងៃ បណ្ដាលឲ្យភាពភ័យខ្លាចនៃការឆ្លងនៅតែកើតមាន ពិសេសខ្លាចសមាជិកគ្រួសារចាស់ៗ និងកូនក្មេង។ ភាគច្រើន វីរុសអូមីក្រុងងាយឆ្លងទៅកាន់កូនក្មេងច្រើនជាងមនុស្សពេញវ័យ ហើយថ្មីៗនេះ គ្រូពេទ្យជំនាញថា ជំងឺទូទៅមួយអាចជារោគសញ្ញានៃវីរុសអូមីក្រុងលើកុមារ។

លោកវេជ្ជបណ្ឌិត Wassim Ballan អ្នកឯកទេសជំងឺឆ្លងកុមារបានឲ្យដឹងថា លោក និងសហការីបានកត់សម្គាល់ពីការកើនឡើងនៃជំងឺ croup ជាបណ្ដុំនៃការឈឺបំពង់កក្នុងចំណោមក្មេងៗដែលធ្វើតេស្ដវិជ្ជមានជំងឺកូវីដ ១៩ ជាពិសេសនៅក្នុងក្រុមក្មេងអាយុ ៥ឆ្នាំ និងតិចជាងនេះ ដែលមិនទាន់អាចចាក់វ៉ាក់សាំងការពារបាន។

ជំងឺ Croup ជាជំងឺទូទៅកើតលើក្មេងមួយ ដែលជាធម្មតាបណ្ដាលមកពីការឆ្លងមេរោគតាមរដូវនាំឲ្យមានការរលាក ឬហើមនៅក្នុងផ្លូវដង្ហើមផ្នែកខាងលើរបស់កុមារ ដែលមានទំហំតូចជាងមនុស្សពេញវ័យ និងក៏ជារោគសញ្ញាមួយរបស់វីរុសអូមីក្រុងកើតឡើងលើក្មេង។

លោក Ballan ពន្យល់បន្ថែមថា croup អាចចែកចេញជារឿងពីរ។ ទីមួយ គឺការក្អកដែលស្ដាប់ទៅដូចព្រុស។ រឿងមួយទៀតនោះគឺ ការដកដង្ហើមឮសំឡេងខ្សឺត ទោះបីជាអាអូនមិនក្អក ប៉ុន្តែពេលដកដង្ហើមចូលមានឮសំឡេង។ ការក្អក និងការដកដង្ហើមចេញចូលឮៗ គឺដោយសារតែខ្យល់ដែលត្រូវបានបង្ខំចេញតាមរយៈការហើមជុំវិញប្រអប់សំឡេង បំពង់ខ្យល់ និងបំពង់សួត។

បើគ្រាន់តែជាជំងឺ Croup តែឯងនោះវាមិនមែនជារឿងថ្មីៗទើបតែជួបនោះទេ ប៉ុន្តែវាអាចគំរាមកំហែងដល់អាយុជីវិត ដោយសារផ្លូវដង្ហើមរបស់កូនអាចបិទ បណ្ដាលឲ្យពិបាកដកដង្ហើមបាន។ ភាគច្រើនជំងឺនេះ អាចព្យាបាលនៅផ្ទះបាន ប៉ុន្តែបើអាអូនមានអាការពិបាកដកដង្ហើម ក្អកខ្លាំង បបូរមាត់ ស្បែក ឬក្រចកដៃឡើងពណ៌ស្វាយ ត្រូវប្រញាប់ទៅជួបពេទ្យ ព្រោះនេះជាសញ្ញាកូនទទួលបានអុកស៊ីសែនមិនគ្រប់គ្រាន់៕

អត្ថបទផ្ដល់ដោយ៖ Hello Krupet

ចុចអាន៖រោគសញ្ញា អូមីក្រុង ២ អាចលេចចេញ សូម្បីកំពុងញ៉ាំអាហារ ក៏អាចមើលដឹង

The post រោគសញ្ញានៃជំងឺទូទៅមួយលើក្មេង អាចជាវីរុស អូមីក្រុង ប៉ាម៉ាក់មិនគួរមើលរំលង appeared first on Kampuchea Thmey Daily.

វេជ្ជបណ្ឌិតប្រាប់មូលហេតុ អ្នកខ្លះប៉ះពាល់អ្នកជំងឺកូវីដ តែមិនឆ្លង ឬមិនចេញរោគសញ្ញាទាល់តែសោះ

សាង ស្រីល័ក្ខ — Tue, 22 Feb 2022 01:10:00 +0000

ប្រព័ន្ធផ្សព្វផ្សាយបរទេសជាច្រើន បានព្យាយាមដោះស្រាយការសង្ស័យនោះ។ ហេតុអ្វីបានជាសមាជិកគ្រួសារខ្លះ រស់នៅក្រោមដំបូលផ្ទះតែមួយ នឹងអ្នកឆ្លងកូវីដ តែមិនបានឆ្លងមេរោគ ឬគ្មានរោគសញ្ញាទាល់តែសោះ។

វេជ្ជបណ្ឌិត Lucy McBride ដែលជាគ្រូពេទ្យជំងឺឆ្លងនៅទីក្រុង Washington DC បានប្រាប់ Yahoo News ថា ការឆ្លងមេរោគក្នុងគ្រួសារគឺ “មិនគួរឲ្យជឿ” ។ វាអាស្រ័យទៅលើកត្តាជាច្រើន រួមទាំងបរិមាណនៃមេរោគឆ្លងពីសមាជិកដែលឆ្លងមេរោគ ស្ថានភាពផ្ទះរួម ប្រព័ន្ធភាពស៊ាំគ្រួសារ និងស្ថានភាពនៃការចាក់វ៉ាក់សាំងរបស់អ្នកឆ្លងមេរោគ និងសមាជិកគ្រួសាររបស់ពួកគេ។

មនុស្សម្នាក់ៗដកដង្ហើមខ្យល់អាកាស ដែលនាំមេរោគផ្សេងៗចូលទៅក្នុងខ្លួន ហើយរាងកាយនឹងឆ្លើយតបខុសគ្នាទៅនឹងមេរោគ នេះអាស្រ័យលើផ្ទៃខាងក្រោយសុខភាព និងប្រព័ន្ធការពាររាងកាយ ។

លោកវេជ្ជបណ្ឌិត Lucy បាននិយាយ អ្នកដែលបានទទួលវ៉ាក់សាំងទាំងបីដូស បើនៅក្មេង និងមានសុខភាពល្អ ប្រហែលមិនមានរោគសញ្ញាអ្វីទេ ហើយប្រសិនបើផ្ទះមានផ្ទៃដីធំទូលាយ បើកបង្អួច ដើម្បីឲ្យខ្យល់ចេញចូលគ្រប់ពេល។ លទ្ធភាពនៃការឆ្លងមេរោគ អាចមានចំនួនតិចជាងផ្ទះដែលមានតំបន់តូចចង្អៀត។

ទន្ទឹមនោះ របាយការណ៍ថ្មីៗនេះ ពីមជ្ឈមណ្ឌលគ្រប់គ្រងជំងឺរបស់សហរដ្ឋអាមេរិក (CDC) បង្ហាញថា ឱកាសរបស់សមាជិកគ្រួសារ ក្នុងការឆ្លងវីរុសកូវីដ មានប្រហែល ៥៣ភាគរយ នៅក្នុងផ្ទះដែលគ្មានមនុស្សច្រើន។ ការសិក្សាដែលត្រូវបានចេញផ្សាយនៅក្នុងទស្សនាវដ្តី JAMA Internal Medicine កាលពីចុងខែមករា បានរកឃើញថា អ្នកដែលបានចាក់ដូសជំរុញ មានហានិភ័យទាបនៃការឆ្លង omicron ដល់ទៅ ៦៦ភាគរយ បើប្រៀបធៀបទៅនឹងអ្នកដែលទទួលបានតែពីរដូស។ ការចាក់ថ្នាំបង្ការ អាចកាត់បន្ថយឱកាសនៃការឈឺនៅក្នុងបន្ទប់សង្គ្រោះបន្ទាន់ និងលទ្ធភាពនៃការស្លាប់បាន ៨០ភាគរយ។

សាស្ត្រាចារ្យ Tony Cunningham អ្នកឯកទេសជំងឺឆ្លង និងអ្នកជំនាញខាងមេរោគ មកពីសាកលវិទ្យាល័យស៊ីដនីបាននិយាយតាមរបៀបដូចគ្នាថា មានកត្តាជាច្រើនដែលនឹងរារាំងសមាជិកទាំងអស់ ពីការឆ្លងជំងឺកូវីដ។ មានបញ្ហានៃកម្រិតភាពស៊ាំរបស់បុគ្គល ដែលធ្វើឲ្យមេរោគក្នុងខ្លួនថយចុះយ៉ាងឆាប់រហ័ស។ នេះអាចបណ្តាលមកពីការចាក់វ៉ាក់សាំង ឬតើវា អាចមានហ្សែនដែលអាចទប់ទល់នឹងវីរុសកូវីដ។

ចំពោះអ្នកដែលបានទទួលថ្នាំបង្ការ ជាពិសេសដូសជំរុញ ប្រសិនបើឆ្លង មេរោគនៅក្នុងប្រហោងច្រមុះ និងប្រព័ន្ធផ្លូវដង្ហើមនឹងថយចុះយ៉ាងឆាប់រហ័ស រហូតដល់ការឆ្លងមិនអាចរីករាលដាលបានទៀតទេ។

ដោយឡែកលោក Joseph McGargrill វេជ្ជបណ្ឌិតផ្នែកជំងឺឆ្លង នៅមជ្ឈមណ្ឌលវេជ្ជសាស្ត្រ MercyOne ពន្យល់ថា ការដែលមាននរណាម្នាក់នៅក្នុងគ្រួសារ មិនឆ្លង អាចដោយសារតែគាត់ធ្លាប់ឆ្លងមេរោគកូវីដពីមុន ធ្វើឲ្យគាត់មានភាពស៊ាំ ហើយមិនឆ្លងទៀតទេ បើទោះជាមានទំនាក់ទំនងជិតស្និទ្ធជាមួយមនុស្សនៅផ្ទះ ដែលមានជំងឺកូវីដក៏ដោយ។ ហើយក៏មានឱកាសដែលមនុស្សមួយចំនួននៅក្នុងផ្ទះ មិនបង្ហាញរោគសញ្ញា ឬមិនមានរោគសញ្ញាអ្វីឡើយ។ នេះគឺដោយសារតែ វាមិនត្រូវបានឆ្លងមេរោគ ក្នុងបរិមាណគ្រប់គ្រាន់។ ខណៈពេលដែលមនុស្សមួយចំនួន មានភាពធន់នឹងហ្សែនទៅនឹងវីរុស បណ្ដាលឲ្យឈឺតិចតួច ឬមិនបង្ហាញរោគសញ្ញាអ្វីទាំងអស់ ទោះបីជាលទ្ធផលតេស្តចេញមកវិជ្ជមានក៏ដោយ។

គួរបញ្ជាក់ថា កាលពីថ្មីៗនេះ ក្រុមអ្នកវិទ្យាសាស្ត្រអន្តរជាតិមួយក្រុម កំពុងស្វែងរកហ្សែននៅក្នុងមនុស្ស ដែលអាចប្រយុទ្ធប្រឆាំងនឹងវីរុសនេះ ដោយសង្ឃឹមថា ហ្សែនអាចកើតឡើងដោយធម្មជាតិ។ វានឹងឈានដល់ការអភិវឌ្ឍថ្នាំប្រឆាំងមេរោគ ដើម្បីការពារមនុស្សពីអនាគតនៃជំងឺកូវីដ-១៩៕

ប្រែសម្រួល៖ សាង ស្រីល័ក្ខ

ចុចអាន៖វេជ្ជបណ្ឌិតម្នាក់ ចែករំលែកវិធីព្យាបាលកូវីដ កម្រិតស្រាល នៅផ្ទះខ្លួនឯង

The post វេជ្ជបណ្ឌិតប្រាប់មូលហេតុ អ្នកខ្លះប៉ះពាល់អ្នកជំងឺកូវីដ តែមិនឆ្លង ឬមិនចេញរោគសញ្ញាទាល់តែសោះ appeared first on Kampuchea Thmey Daily.

អ្នកជំងឺកូវីដ-១៩ ក្រជាសះស្បើយ អាចលេចចេញរោគសញ្ញាទាំងនេះ

សាង ស្រីល័ក្ខ — Thu, 03 Feb 2022 01:41:03 +0000

ឥឡូវនេះ អ្នកជំងឺកូវីដ-១៩នឹងដឹងភ្លាមៗថា ខ្លួនអាចមានរោគសញ្ញាធ្ងន់ធ្ងរក្រោយវីរុសកូវីដ-១៩ ក៏ដូចជាត្រូវព្យាបាលរយៈពេលយូរឬយ៉ាងណា នេះបើយោងតាមការចេញផ្សាយរបស់ Nature Communications។

លោកវេជ្ជបណ្ឌិត Onur Boyman ជាសហនិពន្ធនៃនាយកដ្ឋានភាពស៊ាំនៃសាកលវិទ្យាល័យ University Hospital Zurich មានប្រសាសន៍ថា៖ «យើងចង់ដឹង និងកំណត់ឲ្យបានឆាប់តាមដែលអាចធ្វើទៅបាន ថាតើអ្នកណាដែលមានហានិភ័យក្នុងការវិវត្តទៅជាជំងឺកូវីដ-១៩ ដែលមានរោគសញ្ញារយៈពេលវែង»។

រោគសញ្ញាញឹកញាប់បំផុតនៃអ្នកកើតជំងឺកូវីដ-១៩ រយៈពេលវែង

លោកបានបន្ថែមថា រោគសញ្ញាដែលកើតញឹកញាប់បំផុតលើអ្នកជំងឺកូវីដ-១៩ រយៈពេលវែង មានដូចជាអស់កម្លាំង ដកដង្ហើមខ្លីៗ និងថយចុះនៃការយល់ដឹង រួមមានការបាត់បង់ការផ្ដោតអារម្មណ៍ និងការចងចាំ ឈឺចាប់នៅបរិវេណផ្សេងៗគ្នា ក្អក បាត់បង់ក្លិន ឬរសជាតិ និងរាករូសជាដើម។

ជាក់ស្ដែង ប្រមាណជា១០% ទៅ៣០% នៃអ្នកដែលឆ្លងវីរុសកូវីដ-១៩ អាចនឹងមានរោគសញ្ញារយៈពេលវែង។ អង្គការសុខភាពពិភពលោកបានកំណត់រោគសញ្ញានេះថា ជារោគសញ្ញាដែលបន្តយ៉ាងហោចណាស់៣ខែ បន្ទាប់ពីអ្នកជំងឺឆ្លងវីរុសកូវីដ-១៩។ ចំណែកឯមជ្ឈមណ្ឌលត្រួតពិនិត្យ និងបង្ការជំងឺឆ្លង (CDC) អាមេរិក បានកំណត់ថា អ្នកជំងឺកូវីដ-១៩ រយៈពេលវែង អាចមានរោគសញ្ញារយៈពេល៤ ឬច្រើនសប្ដាហ៍ក្រោយការឆ្លងកូវីដ។

ទន្ទឹមនឹងនេះដែរ ក្រុមគ្រូពេទ្យបានរកឃើញថា អ្នកជំងឺដែលមានរោគសញ្ញាកូវីដរយៈពេលវែងមានកម្រិតអង់ទីគ័រ IgM និងIgG3ទាប ក្នុងការប្រយុទ្ធប្រឆាំងនឹងការឆ្លងមេរោគក្នុងចរន្តឈាម បើប្រៀបធៀបនឹងអ្នកដែលឆ្លងមេរោគកម្រិតស្រាល។ ទោះជាយ៉ាងនេះក្ដី ការសិក្សាត្រូវបានធ្វើឡើងនៅចន្លោះខែមេសា និងសីហា ឆ្នាំ២០២១ មុនពេលដែលកូវីដបំប្លែងថ្មី អូមីក្រុងរាតត្បាត។ ដូច្នេះហើយ យើងនៅមិនទាន់ដឹងច្បាស់ថា ការរកឃើញទាំងនេះ មានភាពត្រឹមត្រូវ១០០% ចំពោះអ្នកជំងឺបច្ចុប្បន្ននេះឬអត់ទេ ហើយការសិក្សានេះក៏មិនបានផ្ដោតទៅលើអ្នកដែលចាក់វ៉ាក់សាំងនោះដែរ៕

អត្ថបទផ្ដល់ដោយ៖ Hello Krupet

ចុចអាន៖វីរុសអូមីក្រុងបំប្លែង BA.2 អាចវាយលុកខ្លាំង លើសុខភាពមនុស្សចាស់

ចុចអាន៖វដ្ដរដូវ អាចប្រែប្រួលរយៈពេលខ្លី ក្រោយស្រីៗចាក់វ៉ាក់សាំងកូវីដ-១៩

The post អ្នកជំងឺកូវីដ-១៩ ក្រជាសះស្បើយ អាចលេចចេញរោគសញ្ញាទាំងនេះ appeared first on Kampuchea Thmey Daily.

ត្រូវតាមដានរោគសញ្ញា អូមីក្រុង ទាំង៨នេះ ក្រោយកម្ពុជារកឃើញថ្មី ១៥ករណី

Sok Sovann — Mon, 27 Dec 2021 03:47:13 +0000

កាលពីយប់មិញនេះ សម្តេចតេជោ ហ៊ុន សែន បានបញ្ជាក់តាមរយៈសារពិសេសមួយថា ប្រទេសកម្ពុជា បានរកឃើញករណីវិជ្ជមានវីរុសបំប្លែងខ្លួន អូមីក្រុង រហូតដល់ទៅ១៥ករណី។

ទោះបីជាយ៉ាងណាក៏ដោយ ទាំងនេះសុទ្ធតែជាករណីនាំចូល ហើយករណីថ្មីនេះបានធ្វើឲ្យ កម្ពុជា មានអូមីក្រុង សរុប៣១ករណី។

បើងាកទៅមើលប្រទេសអង់គ្លេសឯណោះវិញ វីរុសបំប្លែងខ្លួនអូមីក្រុង កំពុងវាយលុកធ្ងន់ធ្ងរ ហើយបង្កការចម្លងរីករាលដាល។

លោកសាស្ត្រាចារ្យ Tim Spector ដែលដឹកនាំកម្មវិធីសិក្សារោគសញ្ញាកូវីដ ZOE បានបញ្ជាក់អំពីរោគសញ្ញាចំនួន៨ នៃវីរុសបំប្លែងខ្លួន អូមីក្រុង ដែលមួយចំនួនដូចជាជំងឺផ្តាសាយ។

រោគសញ្ញាទាំង៨នោះមានដូចជា៖

រមាស់បំពង់ក
ហៀរសំបោរ
អស់កម្លាំង
កណ្តាស់
ឈឺខ្នងផ្នែកខាងក្រោម
ឈឺក្បាល
បែកញើសពេលយប់
ឈឺសាច់ដុំ

យ៉ាងណាក្តី ទិន្នន័យបានបង្ហាញថា វ៉ាក់សាំងដូសជំរុញ គឺជាការការពារដ៏ល្អបំផុតប្រឆាំងនឹង អូមីក្រុង ហើយថ្នាំបង្ការដូសទី៣ អាចជំរុញប្រសិទ្ធភាពរហូតដល់៧៥ភាគរយ៕

ប្រែសម្រួល៖ Vann Vann

ប្រភព៖ Mirror

ចុចអាន៖ សង្កេតខ្លួនឯង! រោគសញ្ញា ៣ របស់ Omicron ខុសពីកូវីដបំប្លែងខ្លួន ប្រភេទផ្សេង

The post ត្រូវតាមដានរោគសញ្ញា អូមីក្រុង ទាំង៨នេះ ក្រោយកម្ពុជារកឃើញថ្មី ១៥ករណី appeared first on Kampuchea Thmey Daily.

កូវីដទម្រង់ដើម និង Delta ចេញរោគសញ្ញាថ្មី

Sok Sovann — Sun, 24 Oct 2021 04:45:00 +0000

គ្រប់គ្នាប្រហែលដឹងហើយថា រោគសញ្ញាកូវីដ-១៩ ទូទៅមានដូចជា ក្ដៅខ្លួន ក្អក ឈឺបំពង់ក ឬបាត់បង់រសជាតិនិងក្លិនជាដើម។

ប៉ុន្តែកាលពីពេលថ្មីនេះ ក្រុមអ្នកវិទ្យាសាស្រ្តអង់គ្លេស បានបញ្ជាក់ពីរោគសញ្ញាថ្មីបន្ថែមទៀត ដែលកើតឡើងលើអ្នកឆ្លងកូវីដទម្រង់ដើម និងវីរុសបំប្លែងខ្លួនប្រភេទ Delta។

រោគសញ្ញាថ្មីជាចម្បងនោះគឺ ការក្អកញយដងក្នុងរយៈពេល១ម៉ោង ឬក្អកជាប់៣ដង ឬលើសនេះក្នុងរយៈពេល២៤ម៉ោង។

បន្ថែមលើសពីនេះ ក៏មានរោគសញ្ញាផ្សេងទៀតផងដែរ ដូចជា ក្តៅខ្លួនលើសពី ៣៧.៨ អង្សាសេ និងផ្លាស់ប្តូរក្លិននិងរសជាតិ។

សេវាសុខភាពសាធារណៈអង់គ្លេស និយាយថា ប្រហែល ៨៥% នៃអ្នកឆ្លងកូវីដ នឹងមានរោគសញ្ញាយ៉ាងតិចមួយ ក្នុងចំណោមរោគសញ្ញាទាំងនេះ។

ក្រោពីនេះ អ្នកឆ្លងមេរោគបំប្លែងខ្លួនប្រភេទថ្មីដូចជា Delta ផងដែរ ទំនងជាមានរោគសញ្ញាផ្សេងទៀតដូចជា ឈឺក្បាល ឈឺបំពង់ក ឬហៀរសំបោរជាដើម។

គួរបញ្ជាក់ថា ជាមធ្យម វាមានរយៈពេល៥ថ្ងៃក្នុងការចេញរោគសញ្ញា បន្ទាប់ពីអ្នកឆ្លងវីរុស៕

ប្រែសម្រួល៖ Vann Vann

ប្រភព៖ BBC

ចុចអាន៖ ខុសគ្នាដាច់! រោគសញ្ញា Delta ចំពោះអ្នកចាក់វ៉ាក់សាំងហើយ និងអ្នកមិនទាន់ចាក់

The post កូវីដទម្រង់ដើម និង Delta ចេញរោគសញ្ញាថ្មី appeared first on Kampuchea Thmey Daily.

រោគសញ្ញាកូវីដ១៩ Archives - Kampuchea Thmey Daily

អូមីក្រុង កើតលើទារក មានរោគសញ្ញាអ្វីខ្លះ? គួរការពារបែបណា?

គ្រូពេទ្យព្រមានជាថ្មី! អ្នកឆ្លងកូវីដពីមុន អាចអូសបន្លាយជិតមួយឆ្នាំ ប្រសិនបើប្រហែសខ្លួន

ដុកទ័របកស្រាយលម្អិត Omicron ឆ្លងប៉ុន្មានថ្ងៃ ទើបបង្ហាញរោគសញ្ញាឲ្យដឹងខ្លួន

រោគសញ្ញានៃជំងឺទូទៅមួយលើក្មេង អាចជា​​វីរុស អូមីក្រុង ប៉ាម៉ាក់មិនគួរមើលរំលង

វេជ្ជបណ្ឌិតប្រាប់មូលហេតុ អ្នកខ្លះប៉ះពាល់អ្នកជំងឺកូវីដ តែមិនឆ្លង ឬមិនចេញរោគសញ្ញាទាល់តែសោះ

អ្នកជំងឺកូវីដ-១៩ ក្រជាសះស្បើយ អាចលេចចេញរោគសញ្ញាទាំងនេះ

ត្រូវតាមដានរោគសញ្ញា អូមីក្រុង ទាំង៨នេះ ក្រោយកម្ពុជារកឃើញថ្មី ១៥ករណី

កូវីដទម្រង់ដើម និង Delta ចេញរោគសញ្ញាថ្មី

រោគសញ្ញានៃជំងឺទូទៅមួយលើក្មេង អាចជាវីរុស អូមីក្រុង ប៉ាម៉ាក់មិនគួរមើលរំលង