ក្នុងដំណើរទស្សនកិច្ចដ៏កម្រនោះ ប្រមុខរដ្ឋចិន និងមេដឹកនាំកូរ៉េខាងជើង គីម ជុងអ៊ុន បានសម្រេចកិច្ចព្រមព្រៀងមួយចំនួន ជាមួយគ្នា ប៉ុន្តែអ្វីដែលពិភពលោក កត់សម្គាល់បំផុតគឺ លោកស៊ី មិនបានលើកឡើងពីបញ្ហារំសាយអាវុធនុយក្លេអ៊ែរទេ ក្នុងជំនួបកំពូលជាមួយ ប្រមុខដឹកនាំទីក្រុងព្យុងយ៉ាង ដែលផ្ទុយពីក្នុងជំនួបជាមួយប្រធានាធិបតីអាមេរិក កាលពីពាក់កណ្តាលខែឧសភា ដែលលោកស៊ី និងលោក ដូណាល់ ត្រាំ បានលើកឡើងពីបញ្ហានេះ។

ដូច្នេះហើយ ទើបមានការចោទជាសំណួរថា តើហេតុអ្វីបានជាលោក ស៊ី មិនលើកពីបញ្ហារំសាយអាវុធនុយក្លេអ៊ែរកូរ៉េខាងជើង ក្នុងដំណើរទស្សនកិច្ចនៅទីក្រុង ព្យុងយ៉ាង?

តាមការផ្សាយរបស់ CNN កាលពីថ្ងៃអង្គារ ទី៩ ខែមិថុនា ឆ្នាំ២០២៦ ហេតុផលមួយ ក្នុងចំណោមហេតុផលជាច្រើន គឺដោយសារ ចិនកំពុងប្រើប្រាស់កូរ៉េខាងជើងជា «ល្បែងភូមិសាស្ត្រនយោបាយ» ដើម្បីប្រជែងឥទ្ធិពល ជាមួយអាមេរិក និងដើម្បីរក្សាស្ថិរភាព របបដឹកនាំក្រុងព្យុងយ៉ាង មិនឲ្យដួលរលំ។ 

ម្យ៉ាង CNN ផ្សាយថា ការរក្សាភាពស្ងៀមស្ងាត់ មិននិយាយពីអាវុធនុយក្លេអ៊ែរ និងការបន្តគាំទ្រសេដ្ឋកិច្ចដល់កូរ៉េខាងជើង គឺជាយុទ្ធសាស្ត្របង្ហាញទៅលោក ត្រាំ ថា ទីក្រុងប៉េកាំង គឺជាអ្នកកាន់កូនសោរតែម្នាក់គត់ ដែលអាចគ្រប់គ្រង ឬបញ្ចុះបញ្ចូលកូរ៉េខាងជើងបាន។ ចិន អាចប្រើប្រាស់ «សន្លឹកបៀកូរ៉េខាងជើង» នេះ ដើម្បីធ្វើជាថ្នូរ ក្នុងការចរចាជាមួយអាមេរិក លើបញ្ហាធំៗផ្សេងទៀត ដូចជា ពន្ធពាណិជ្ជកម្ម និងកោះតៃវ៉ាន់។

ចំណែកបើយោងតាមអ្នកជំនាញរបស់ BBC, មូលហេតុគឺ ការពារកូរ៉េខាងជើង កុំឲ្យរុញទូកបណ្តោយទឹកទៅរក រុស្ស៊ី ខ្លាំងពេក។ ប្រសិនបើលោក ស៊ី លើកឡើងពីការប្រឆាំងនុយក្លេអ៊ែរចំៗ វានឹងធ្វើឲ្យលោក ជុងអ៊ុន អាក់អន់ចិត្ត ហើយកាន់តែងាកទៅរកទីក្រុងមូស្គូ។

អ្នកវិភាគភូមិសាស្ត្រនយោបាយ យល់ឃើញថា ទាំងចិន និងរុស្ស៊ី សុទ្ធតែទទួលស្គាល់ជាសម្ងាត់ រួចទៅហើយថា កូរ៉េខាងជើង មិនអាចបោះបង់ចោលអាវុធនុយក្លេអ៊ែរបានឡើយ ដោយសារវា ជាឧបករណ៍តែមួយគត់ ដើម្បីការពារការរស់រានមានជីវិត នៃរបបរបស់ខ្លួន។

ចុងក្រោយ បើយោងតាមវិទ្យាស្ថានសិក្សាសង្គ្រាម, សម្រាប់ទីក្រុងប៉េកាំង សន្តិសុខ និងស្ថិរភាពនៃរបបដឹកនាំរបស់លោក ជុងអ៊ុន គឺមានសារៈសំខាន់ ជាងការរំសាយអាវុធនុយក្លេអ៊ែរ។ ប្រសិនបើចិន ដាក់សម្ពាធខ្លាំងពេកលើបញ្ហានុយក្លេអ៊ែរ វាអាចធ្វើឲ្យកូរ៉េខាងជើង ធ្លាក់ក្នុងវិបត្តិសេដ្ឋកិច្ច ឬនយោបាយរហូតដល់ដួលរលំ។ ករណីនេះ នឹងធ្វើឲ្យចិនបាត់បង់តំបន់ទ្រនាប់យុទ្ធសាស្ត្រ ហើយអាចបើកផ្លូវឲ្យកងទ័ពអាមេរិក ដែលឈរជើងនៅកូរ៉េខាងត្បូង មកកៀកនឹងព្រំដែនចិន ជាក់ជាមិនខានឡើយ៕

អត្ថបទ៖ សុខ សុវណ្ណ

The post ហេតុអ្វី លោក ស៊ី មិនលើកបញ្ហារំសាយអាវុធនុយក្លេអ៊ែរកូរ៉េខាងជើង ក្នុងដំណើរទស្សនកិច្ចនៅ ព្យុងយ៉ាង? appeared first on Kampuchea Thmey Daily.

សេចក្តីរាយការណ៍​​នោះ​​ បាន​កើត​មាន​​ ចំពេលដែលទីក្រុងប៉េកាំង និងទីក្រុងព្យុងយ៉ាង បានប្រកាសថា ប្រធានាធិបតីចិន ស៊ី ជីនពីង នឹងអញ្ជើញទៅបំពេញទស្សនកិច្ចនៅប្រទេសកូរ៉េខាងជើង ចាប់ពីថ្ងៃទី ៨ ដល់ថ្ងៃទី ៩ ខែមិថុនា បន្ទាប់ពី ប្រធានាធិបតី ស៊ី បាន​​​ទទួលស្វាគមន៍​កិច្ចប្រជុំ​​សំខាន់​​រហូត​ដល់​ទៅ​​ពីរ​ គឺ​​ជាមួយប្រធានាធិបតីអាមេរិក ដូណាល់ ត្រាំ និងប្រធានាធិបតីរុស្ស៊ី វ្ល៉ាឌីមៀ ពូទីន កាលពីខែមុន​នេះ​​។

នៅក្នុងរយៈពេលប៉ុន្មានឆ្នាំថ្មីៗនេះ លោក គីម ជុងអ៊ុន បានប្តេជ្ញាចិត្តយ៉ាងមុតមាំ ក្នុងការពង្រឹងសមត្ថភាពកងទ័ពជើងទឹករបស់កូរ៉េខាងជើង ហើយកាលពីខែឧសភាឆ្នាំមុន លោក បានចុះត្រួតពិនិត្យការដាក់​ដំណើរការ​នាវាពិឃាត Kang Kon ដែលធ្លាប់​មាន​​បញ្ហាបច្ចេកទេស ប៉ុន្តែត្រូវបានជួសជុល និងដាក់ឲ្យដំណើរការឡើងវិញនៅមួយខែបន្ទាប់។

​សារ​ព័ត៌មាន​កូរ៉េខាងជើង KCNA បានឲ្យដឹងទៀតថា នៅក្នុងដំណើរទស្សនកិច្ចកាលពីថ្ងៃព្រហស្បតិ៍ លោក គីម ជុងអ៊ុន បានសង្កត់ធ្ងន់​លើសារៈសំខាន់នៃការអភិវឌ្ឍកងកម្លាំងជើងទឹកយ៉ាងឆាប់រហ័ស ទៅជាកងកម្លាំងមួយដែល មានសមត្ថភាព​អាចទទួលខុសត្រូវដោយជឿជាក់លើផ្នែកមួយនៃការទប់ស្កាត់សង្គ្រាម​នុយក្លេអ៊ែរ។

លោកលើកថា ការបង្កើតកងទ័ពជើងទឹកដែលអាចផ្តល់ការវាយប្រហារដ៏បំផ្លិចបំផ្លាញ ទៅលើសត្រូវទាំងនៅលើផ្ទៃទឹក និងក្រោមបាតសមុទ្រ គឺជាគោលដៅស្នូលនៃផែនការអភិវឌ្ឍន៍វិស័យការពារជាតិរយៈពេល ៥ ឆ្នាំបច្ចុប្បន្នរបស់គណបក្សកាន់អំណាច។

ដោយឡែក ចាប់តាំងពីកិច្ចប្រជុំកំពូលឆ្នាំ ២០១៩ រវាងមេដឹកនាំកូរ៉េខាងជើង និងលោក ត្រាំ បានដួលរលំជុំវិញវិសាលភាពនៃការរំសាយអាវុធនុយក្លេអ៊ែរ និងការបន្ធូរបន្ថយទណ្ឌកម្មមក ទីក្រុងព្យុងយ៉ាងបានប្រកាសម្តងហើយម្តងទៀតថា ខ្លួនជា រដ្ឋនុយក្លេអ៊ែរ «ដែលមិនអាចកែប្រែត្រឡប់ក្រោយបានឡើយ»។

មិនតែប៉ុណ្ណោះ លោក គីម ជុងអ៊ុន ក៏ទទួលបានភាពក្លាហាន និងកម្លាំងចិត្តបន្ថែមពីសង្គ្រាមនៅក្នុងប្រទេសអ៊ុយក្រែន ដោយទទួលបានការគាំទ្រយ៉ាងសំខាន់ពីទីក្រុងម៉ូស្គូ បន្ទាប់ពីបានបញ្ជូនកងទ័ពរាប់ពាន់នាក់ទៅចូលរួមប្រយុទ្ធជាមួយកងកម្លាំងរុស្ស៊ី។ កាលពីឆ្នាំមុន លោកក៏បានបង្ហាញខ្លួនរួមគ្នាជាមួយលោក ស៊ី ជីនពីង និងលោក ពូទីន នៅក្នុងពិធីព្យុហយាត្រាយោធាដ៏ប្រណីតមួយនៅក្នុងទីក្រុងប៉េកាំង ដែលនេះជាការបង្ហាញឲ្យឃើញយ៉ាងច្បាស់ពីស្ថានភាពថ្មី និងការកើនឡើងឥទ្ធិពលរបស់លោកនៅក្នុងឆាកនយោបាយសកល៕

អត្ថបទ ៖ សាង ស្រីល័ក្ខ

គីម ជុងអ៊ុន បង្ហាញរោងចក្របរមាណូថ្មី និង​ប្ដេជ្ញាបង្កើនអាវុធនុយក្លេអ៊ែរឱ្យលឿនបំផុត

The post ​លោក គីម ជុនអ៊ុន បញ្ជាឲ្យពង្រឹង​​កង​​ទ័ព​ជើង​ទឹកដែល​​​មានសមត្ថភាពបាញ់​នុយក្លេអ៊ែរ ​កម្ទេច​​សត្រូវ appeared first on Kampuchea Thmey Daily.

ព្រឹត្តិការណ៍នេះបានកើតឡើង​នៅក្នុងកិច្ចប្រជុំពិសេសមួយកាលពីថ្ងៃអាទិត្យ ទី១៧ ខែឧសភា ឆ្នាំ២០២៦ រវាងលោក គីម ជុងអ៊ុន និងមេបញ្ជាការកងពលតូច និងកងពលធំមកពីទូទាំងប្រទេស ដែលត្រូវបានកត់ត្រាថាជាជំនួបជាមួយមេបញ្ជាការថ្នាក់ក្រោមលើកដំបូងបំផុត ចាប់តាំងពីលោកបានឡើងកាន់អំណាច។ យោងតាមការចុះផ្សាយរបស់ទីភ្នាក់ងារសារព័ត៌មាន Reuters។

ចំពោះមូលហេតុចម្បង ដែលនាំឲ្យមានការសម្រេចចិត្តយ៉ាងតក់ក្រហល់នាពេលនេះ គឺផ្តើមចេញពីការផ្លាស់ប្តូរទស្សនៈនយោបាយយ៉ាងគំហុករបស់ទីក្រុងព្យុងយ៉ាង ដែលបានលុបចោលរាល់ឃ្លាឃ្លោងនិយាយពី «ការបង្រួបបង្រួមជាតិ» នៅក្នុងរដ្ឋធម្មនុញ្ញ និងបានកែប្រែមកចាត់ទុកកូរ៉េខាងត្បូងជា «រដ្ឋដាច់ដោយឡែកមួយ» ព្រមទាំងជា «សត្រូវសួរពូជ» ដ៏ចម្បងបំផុត ។

ការប្រកាសកាត់ផ្តាច់ទំនាក់ទំនងនេះ តម្រូវឲ្យកូរ៉េខាងជើងត្រូវតែសម្រុកសាងសង់ជញ្ជាំង រនាំងការពារ និងបិទច្រកព្រំដែនគោកយ៉ាងណែនក្រាស់តាំងពីខែមីនាមកម្ល៉េះ។

ទន្ទឹមនឹងនេះ បញ្ជារបស់លោកក៏ជាការទាញយកមេរៀនយ៉ាងសំខាន់ពី «សង្គ្រាមទំនើប» ដែលកំពុងកើតឡើងនៅក្នុងប្រទេសអ៊ុយក្រែន និងតំបន់មជ្ឈិមបូព៌ា ។ តាមការវិភាគរបស់ក្រុមអ្នកស្រាវជ្រាវជាន់ខ្ពស់នៃវិទ្យាស្ថានកូរ៉េសម្រាប់ការបង្រួបបង្រួមជាតិ (KINU) បានបង្ហាញថា ទីក្រុងព្យុងយ៉ាងកំពុងផ្ដោតខ្លាំងលើការកែប្រែប្រព័ន្ធហ្វឹកហ្វឺន ដើម្បីបង្កើតខែលការពារខ្លួនពីបច្ចេកវិទ្យាយោធាថ្មីៗ ជាអាទិ៍ការវាយប្រហារដោយដ្រូន , មីស៊ីលនាំផ្លូវច្បាស់លាស់ និងសង្គ្រាមអេឡិចត្រូនិក។

ជាងនេះទៅទៀត សកម្មភាពពង្រឹងបន្ទាយសឹកនេះ បានធ្វើឡើងចំពេលដែលកងទ័ពកូរ៉េខាងត្បូងចាប់ផ្តើមធ្វើសមយុទ្ធយោធារយៈពេល ៥ថ្ងៃ តាមប្រព័ន្ធកុំព្យូទ័រ ដើម្បីត្រៀមលក្ខណៈឆ្លើយតបនឹងការគំរាមកំហែងនានា ។ ក្រៅពីការរៀបចំបន្ទាយការពារនៅលើដីគោក ក្រុមអ្នកជំនាញយោធាក៏បានព្រមានផងដែរថា កូរ៉េខាងជើងអាចនឹងពង្រីកឥទ្ធិពល និងបង្កើនវត្តមានយោធាយ៉ាងខ្លាំងក្លានៅលើ «ដែនទឹកជម្លោះ» នៅភាគខាងលិច ដើម្បីកាត់ផ្តាច់ការជ្រៀតចូល និងទំនាក់ទំនងពីភាគីខាងត្បូងទាំងស្រុង៕

អត្ថបទ៖ សាង ស្រីល័ក្ខ

លោក គីម ជុងអ៊ុន បញ្ជាឲ្យ​​ប្រែក្លាយ​ព្រំដែនជាប់កូរ៉េខាងត្បូង ទៅជា «បន្ទាយការពារដ៏រឹងមាំ​»

The post ​កូរ៉េខាងជើង​​ផ្លាស់ប្តូរសារនយោបាយ និង​ ​ពង្រឹង​បន្ទាត់​ព្រំដែនជាមួយកូរ៉េខាងត្បូង appeared first on Kampuchea Thmey Daily.

តាមការផ្សាយរបស់សារព័ត៌មាន KCNA នៅថ្ងៃពុធទី១៨ខែមីនាឆ្នាំ២០២៦ ការបោះឆ្នោតសភាប្រជាជនកំពូលលើកទី១៥នេះ រៀបចំឡើងនៅថ្ងៃទី១៥ខែមីនា ដោយមានអ្នកចេញទៅបោះឆ្នោតរហូតដល់ទៅ៩៩.៩៩%ឯណោះ។

ដូចកាលពីឆ្នាំ២០១៩ដែរ លោកគីមខ្លួនឯង មិនឈរឈ្មោះជាបេក្ខជនសភាទេ ប៉ុន្តែលោកនៅតែរក្សាតំណែងជាមេដឹកនាំកំពូល តាមរយៈតំណែងជាអគ្គលេខាធិការបក្ស និងប្រធានគណៈកម្មាធិការកិច្ចការរដ្ឋ។

យ៉ាងណា លោកបានទៅបោះឆ្នោតផ្ទាល់ក្នុងតំបន់អណ្តូងរ៉ែធ្យូងថ្មយុវជន Sunchon ដោយបោះឲ្យបេក្ខជនឈ្មោះ Jo Chol Ho ដែលជាអ្នកគ្រប់គ្រងអណ្តូងរ៉ែនៅទីនោះ។

នៅក្នុងអាណត្តិថ្មីនេះ សមាជិកសភាចំនួន ៦៨៧ រូប ត្រូវបានជ្រើសរើស ហើយអ្វីដែលគួរឲ្យកត់សម្គាល់គឺថា មានការផ្លាស់ប្តូរសមាជិកសភាចាស់ៗចេញរហូតដល់ជាង៧០% ដើម្បីជំនួសមកវិញនូវមន្ត្រីក្មេងៗដែលស្មោះត្រង់នឹងលោក គីម។

ប្អូនស្រីរបស់លោកគីមគឺ គីម យូចុង ក៏ជាប់ឆ្នោតជាសមាជិកសភាដែរ និងត្រូវបានដំឡើងតំណែងសំខាន់ក្នុងបក្សទៀតផង។

សូមជម្រាបថា សភាអាណត្តិថ្មីនេះនឹងបើកសម័យប្រជុំដំបូងនៅថ្ងៃទី២២ខែមីនាខាងមុខ ដើម្បីបោះឆ្នោតជ្រើសរើសលោក គីម ជាប្រធានគណៈកម្មាធិការកិច្ចការរដ្ឋជាថ្មី៕

អត្ថបទ៖ សុខ សុវណ្ណ

The post គណបក្សលោក គីម ជុងអ៊ុន ឈ្នះការបោះឆ្នោតសភា ជាមួយសំឡេង ៩៩.៩៣% appeared first on Kampuchea Thmey Daily.

តាម​ការ​ផ្សាយ​របស់ Yonhap ការឆ្លើយតបនេះបានធ្វើឡើងបន្ទាប់ពីមេដឹកនាំកូរ៉េខាងជើង លោក គីម ជុងអ៊ុន បានថ្លែងក្នុងមហាសន្និបាតបក្សនាពេលថ្មីៗនេះថា ទីក្រុងព្យុងយ៉ាងមានឆន្ទៈក្នុងការពិភាក្សាជាមួយ​អាមេរិក ប្រសិនបើវ៉ាស៊ីនតោនបោះបង់ចោលនូវគោលនយោបាយអរិភាព ចំពោះរបបរបស់លោក ដោយបញ្ជាក់ថា អនាគតនៃទំនាក់ទំនងនេះគឺ «អាស្រ័យទាំងស្រុងលើឥរិយាបថរបស់អាមេរិក»។

មន្ត្រីសេតវិមានបានរំលឹកថា ជំនួបកំពូលជាប្រវត្តិសាស្ត្រចំនួន៣​លើករវាងលោក​ត្រាំ និងលោក​គីម ក្នុងអាណត្តិដំបូង បានជួយ​ឲ្យ​ស្ថានភាពនៅឧបទ្វីបកូរ៉េមានស្ថិរភាព។ ខណៈមានការរំពឹងទុកថា លោកត្រាំអាចនឹងស្វែងរកការចរចាជាមួយលោកគីម ក្នុងអំឡុងពេលដំណើរទស្សនកិច្ចទៅកាន់ប្រទេសចិននាចុងខែក្រោយ មន្ត្រីអាមេរិកបានអះអាងថា គោលនយោបាយរបស់ខ្លួនមិនមានការផ្លាស់ប្តូរឡើយ ពោល​គឺ​លោកត្រាំ​មិន​បានកំណត់​លក្ខខណ្ឌ​ទុក​ជា​មុន​ទេ​សម្រាប់​ជំនួប​ដែល​អាច​កើត​មាន​ជាមួយ​លោក​គីម។

សូម​ជម្រាប​ថា មេដឹកនាំទាំងពីរធ្លាប់បានជួបគ្នាដោយផ្ទាល់​​​នៅប្រទេសសិង្ហបុរីក្នុង​ខែ​មិថុនា​ឆ្នាំ​២០១៨ ទីក្រុងហាណូយ​នៃ​ប្រទេស​វៀតណាម​នា​​ខែ​កុម្ភៈ​ឆ្នាំ​២០១៩ និងភូមិ Panmunjom ដែល​ជា​តំបន់​គ្មាន​យោធា​រវាង​កូរ៉េ​​ខាង​ជើង​និង​កូរ៉េ​ខាង​ត្បូង ក្នុង​ខែ​មិថុនា​ឆ្នាំ​២០១៩៕

ប្រែសម្រួល៖ ឈាង

The post លោកត្រាំ ប្រាប់​ថា​បើកចំហចំពោះកិច្ចសន្ទនាជាមួយ​លោកគីម ដោយគ្មានលក្ខខណ្ឌជាមុន appeared first on Kampuchea Thmey Daily.

កូនស្រីវ័យជំទង់របស់លោកគីម បានបង្ហាញខ្លួនយ៉ាងលេចធ្លោនៅក្នុងរូបថតរបស់រដ្ឋ ដែលបានបោះពុម្ពផ្សាយ ដើម្បីសម្គាល់​ដំណាក់កាលបិទនៃសមាជគណបក្សពលករដែលកំពុងកាន់អំណាច។ អ្នកទាំងពីរបានពាក់អាវស្បែក ដែលដូចគ្នា ខណៈពេលដែលពួកគេឈរក្បែរគ្នាដើម្បីមើលក្បួនដង្ហែរយោធាដ៏ធំមួយ។ ចំណែកឯ ភរិយាគឺលោកស្រី Ri Sol Ju ក៏បានបង្ហាញខ្លួនជាមួយអ្នកទាំងពីរក្នុងសម្លៀកបំពាក់ស្រដៀងគ្នាផងដែរ។

ទោះជាយ៉ាងនេះក្ដី ការបង្ហាញរូបភាពនិងសកម្មភាពរបស់ Ju Ae នៅលើប្រព័ន្ធផ្សព្វផ្សាយដែលចេញដោយរដ្ឋ វាលែងជារងចម្លែកទៀតហើយ បន្ទាប់ពីរូបនាងត្រូវបានគេមើលឃើញជាយូរមកហើយថា មានភាគរយខ្ពស់ក្នុងនាមជាអ្នកស្នងតំណែងបន្ត។

មិនតែប៉ុណ្ណោះ អ្នកវិភាគ Lim Eul-chul បាននិយាយថា អាវធំដែលជាសម្លៀកបំពាក់សំខាន់របស់មេដឹកនាំគីម ជាពិសេសក្នុងអំឡុងពេលបង្ហាញខ្លួនជាសាធារណៈសំខាន់ៗ គឺជានិមិត្តរូបនយោបាយរបស់កូរ៉េខាងជើង រូបរាងនោះមានទម្ងន់ វាត្រូវបានភ្ជាប់ទៅនឹងរូបភាពរបស់មេដឹកនាំជាអ្នកធានាចុងក្រោយនៃសន្តិសុខជាតិ និងវិបុលភាពនាពេលអនាគត។ ដូច្នេះនៅពេលដែលសម្លៀកបំពាក់និមិត្តរូបដូចគ្នានេះ ត្រូវបានពាក់លើកូនស្រីរបស់គាត់ វាពិបាកក្នុងការមើលឃើញថាវាជារឿងចៃដន្យណាស់។

ជាក់ស្ដែង សូម្បីតែអ្នកជំនាញកិច្ចការកូរ៉េ Leif-Eric Easley ក៏បានលើកឡើងដែរថា ការបង្ហាញខ្លួនចុងក្រោយរបស់យុវតីរូបនេះ បានបង្ហាញពីឋានៈខ្ពស់របស់នាង ក្នុងនាមជាកូនស្រីរបស់មេដឹកនាំខាងជើង។ ក្មេងនេះប្រហែលជាមិនទាន់គ្រប់អាយុដើម្បីចូលរួមក្នុងសមាជ ជាមួយនឹងតំណែងគណបក្សផ្លូវការនៅឡើយទេ។ ដូច្នេះលោកគីម ដាក់កូនស្រីឲ្យនៅអមៗដើម្បីត្រៀមបើកផ្លូវឲ្យ​កូន និងពង្រឹងអំណាចត្រកូលគីមជំនាន់ទី៤ ឲ្យកាន់តែរឹងមាំកាន់តែខ្លាំងជាងមុន៕

អត្ថបទ៖ សាង ស្រីល័ក្ខ

The post កូនស្រី​របស់​ គីម ជុងអ៊ុន​ ស្លៀកឈុតស្បៀក​ដូចឪ ចំពេល​សង្ស័យថា ត្រៀមស្នងតំណែងបន្ត appeared first on Kampuchea Thmey Daily.

ថ្លែងសុន្ទរកថានៅក្នុងពិធីដ៏ឱឡារិក មេដឹកនាំកូរ៉េខាងជើងអះអាងថា «ប្រព័ន្ធរ៉ុក្កែតបាញ់ច្រើនគ្រាប់ដែលមានភាពជាក់លាក់ខ្ពស់នេះ គឺជាអាវុធតែមួយគត់នៅលើពិភពលោក ដោយផ្លាស់ប្តូរតួនាទី និងគំនិតនៃកាំភ្លើងធំដែលទទួលយកដោយសង្គ្រាមសម័យទំនើប។ ខ្ញុំហ៊ាននិយាយថា នៅពេលដែលអាវុធមួយនេះត្រូវបានប្រើប្រាស់ ហេដ្ឋារចនាសម្ព័ន្ធយោធា និងប្រព័ន្ធបញ្ជារបស់សត្រូវរបស់យើង នឹងបែកបាក់គ្នាក្នុងពេលតែមួយ»។

លោកក៏បានអះអាងបន្ថែមទៀតថា ទាំំងនេះគឺជាអាវុធវាយប្រហារដ៏មានឥទ្ធិពលបំផុត ហើយវាបានបំពាក់ដោយបច្ចេកវិទ្យាបញ្ញាសិប្បនិម្មិត និងប្រព័ន្ធណែនាំស្មុគស្មាញ ដែលមានគោលបំណង «រារាំងសត្រូវ» ប៉ុន្តែលោកមិនបានដាក់ឈ្មោះប្រទេសជាក់លាក់ណាមួយទេ។ ជាពិសេស ភាពជាក់លាក់ និងអំណាចនៃមីស៊ីលផ្លោងយុទ្ធសាស្ត្រ និងមុខងារបាញ់ច្រើននៃបំពង់ត្រូវបានរួមបញ្ចូលគ្នាយ៉ាងល្អឥតខ្ចោះនៅក្នុងអាវុធនេះ ដោយមេដឹកនាំបានសាទរវាថាជា «អាវុធដ៏អស្ចារ្យ និងទាក់ទាញបំផុត»។

ទោះជាយ៉ាងណា វិទ្យាស្ថាន RAND នៅសហរដ្ឋអាមេរិកក្នុងឆ្នាំ ២០២០ បានចេញផ្សាយរបាយការណ៍មួយដែលនិយាយថា ប្រព័ន្ធកាំភ្លើងធំកូរ៉េខាងជើងអាចបណ្តាលឲ្យមានមនុស្សស្លាប់ចំនួន ១ម៉ឺននាក់ក្នុងរយៈពេលមួយម៉ោង ប្រសិនបើវាកំណត់គោលដៅទីក្រុងធំៗនៅក្នុងប្រទេសកូរ៉េខាងត្បូង ដូចជាទីក្រុងសេអ៊ូល។ តួលេខនេះគិតគូរតែចំពោះកាំភ្លើងធំធម្មតាប៉ុណ្ណោះ ដោយមិនរាប់បញ្ចូលកាំភ្លើងធំយន្តហោះចម្បាំងធុនធ្ងន់ និងប្រព័ន្ធរ៉ុក្កែតដែលមានក្បាលគ្រាប់នុយក្លេអ៊ែរនោះទេ៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

កូរ៉េខាងជើង ហៅកូរ៉េខាងត្បូង ថា «ប្រទេសអរិភាពលេខ១»

The post លោកគីម បង្អួតឧបករណ៍បាញ់រ៉ុក្កែតមានសមត្ថភាពនុយក្លេអ៊ែរ ថាជា «អាវុធដ៏អស្ចារ្យ» appeared first on Kampuchea Thmey Daily.

តាមការផ្សាយរបស់ KCNA នៅថ្ងៃអង្គារទី២០ខែមករាឆ្នាំ២០២៦ លោកគីម បានសម្រេចដកតំណែងលោក Yang Sung-ho ដោយបន្ទោសឧបនាយករដ្ឋមន្ត្រីរូបនេះថា ធ្វេសប្រហែសនិងមិនយកចិត្តទុកដាក់ ក្នុងការអនុវត្តគម្រោងធ្វើទំនើបកម្មរោងចក្រ ដែលបណ្តាលឲ្យដំណើរការទាំងមូលមានភាពយឺតយ៉ាវនិងជាប់គាំង។

លោក គីម បានប្រើពាក្យធ្ងន់ៗថា ការតែងតាំងមន្ត្រីបែបនេះ ប្រៀបដូចជាយកសត្វពពែមកអូសរទេះគោអ៊ីចឹង ដែលជាកំហុសក្នុងការជ្រើសរើសកម្មាភិបាល។

ស្របពេលជាមួយគ្នានោះ មេដឹកនាំកូរ៉េខាងជើងបានព្រមានថា អ្នករៀបចំគោលនយោបាយសេដ្ឋកិច្ចដែលមានរបៀបធ្វើការបែបនេះ នឹងមិនអាចដឹកនាំកំណែទម្រង់ឧស្សាហកម្មជាតិបានឡើយ។

សូមជម្រាបថា ក្នុងរយៈពេលប៉ុន្មានសប្តាហ៍ថ្មីៗនេះ ថ្នាក់ដឹកនាំកូរ៉េខាងជើងបានចុះទៅពិនិត្យរោងចក្រជាច្រើន និងបានចូលរួមក្នុងការសាកល្បងអាវុធ មុនពេលឈានដល់មហាសន្និបាតលើកទី៩ នៃគណបក្សពលករ ដែលត្រូវបានគេរំពឹងថានឹងត្រូវកោះប្រជុំក្នុងពេលឆាប់ៗនេះ ដើម្បីកំណត់គោលដៅគោលនយោបាយសំខាន់ៗសម្រាប់ប្រទេសជាតិ៕

អត្ថបទ៖ សុខ សុវណ្ណ

The post គីម ជុងអ៊ុន ដកតំណែងឧបនាយករដ្ឋមន្ត្រីម្នាក់នៅនឹងកន្លែងតែម្តង ពេលចុះពិនិត្យរោងចក្រ ព្រោះធ្វើការយឺតយ៉ាវ appeared first on Kampuchea Thmey Daily.