កូរ៉េខាងជើងព្រមានថា ជប៉ុននឹងលិច​ក្រោម​​ទឹក បើហ៊ានដាក់ពង្រាយមីស៊ីលចម្ងាយឆ្ងាយ

ពិភពលោកកំពុងតាមដានមើលតំបន់អាស៊ីបូព៌ាយ៉ាងយកចិត្តទុកដាក់ បន្ទាប់ពីកូរ៉េខាងជើងបានចេញមុខព្រមានយ៉ាងចាស់ដៃ​នា​ថ្ងៃសុក្រ​​ទី​១៣​ខែ​មីនា​នេះថា ផែនការរបស់ប្រទេសជប៉ុនក្នុងការដាក់ពង្រាយមីស៊ីលរយៈចម្ងាយឆ្ងាយជំនាន់ថ្មី អាចនឹងក្លាយជាដើមហេតុដែលនាំ​ឲ្យ​មាន «ការលិចលង់នៃប្រជុំកោះជប៉ុនទាំងមូល»។

ទីភ្នាក់ងារសារព័ត៌មានមជ្ឈិមបក្សកូរ៉េខាងជើង (KCNA) បានចេញសេចក្តីថ្លែងការណ៍រិះគន់យ៉ាងធ្ងន់ៗទៅលើរដ្ឋាភិបាលទីក្រុងតូក្យូ ចំពោះការសម្រេចចិត្តដាក់ពង្រាយមីស៊ីលប្រភេទ Type 12 ដែលត្រូវបានកែលម្អ​ឲ្យ​មានសមត្ថភាពបាញ់បានឆ្ងាយជាងមុន នៅតាមតំបន់យុទ្ធសាស្ត្រមួយចំនួនដូចជា ខេត្ត Kumamoto, Shizuoka និង Miyazaki។ អ្វីដែលធ្វើ​ឲ្យ​ទីក្រុងព្យុងយ៉ាងក្តៅក្រហាយបំផុតនោះគឺ មីស៊ីលប្រភេទថ្មីនេះមិនត្រឹមតែបាញ់ចេញពីដីគោកបានប៉ុណ្ណោះទេ ប៉ុន្តែវាក៏អាចបាញ់ចេញពីលើអាកាស និងលើទឹក ដែលធ្វើឲ្យ​បណ្តាប្រទេសជិតខាងទាំងអស់ស្ថិតក្នុងរយៈចម្ងាយនៃការវាយប្រហាររបស់ជប៉ុន។

កូរ៉េខាងជើងបានលើកឡើងថា ទង្វើរបស់ជប៉ុនគឺជាល្បែងយោធាដ៏គ្រោះថ្នាក់ និងជាការរំលោភលើរដ្ឋធម្មនុញ្ញរបស់ខ្លួន ដែលធ្លាប់សន្យាថានឹងប្រើប្រាស់កម្លាំងយោធាត្រឹមតែក្នុងគោលបំណងការពារខ្លួនប៉ុណ្ណោះ។ ព្យុងយ៉ាងបានអះអាងថា ការដាក់ពង្រាយអាវុធវាយប្រហារទាំងនេះ គឺជាការត្រៀមលក្ខណៈយ៉ាងច្បាស់ក្រឡែតសម្រាប់ឈ្លានពានយោធានៅពេលអនាគត។

នៅក្នុងខ្លឹមសារនៃសេចក្តីថ្លែងការណ៍នោះ កូរ៉េខាងជើងបានព្រមានចំៗថា ជប៉ុនកំពុងដើរចូលទៅកៀកនឹង «បន្ទាត់ក្រហម» ហើយ។ KCNA បានបញ្ជាក់ថា «ប្រសិនបើផែនការនេះក្លាយជាការពិតមែននោះ ជប៉ុននឹងក្លាយជាឃ្លាំងមីស៊ីលដែលអាចកំណត់គោលដៅវាយប្រហារលើប្រទេសជិតខាងបានគ្រប់ពេលវេលា» ដែលវានឹងធ្វើឲ្យសន្តិសុខក្នុងតំបន់ទាំងមូលបាត់បង់ស្ថិរភាពយ៉ាងធ្ងន់ធ្ងរ៕

ប្រែសម្រួល៖ ឈាង