ព័ត៌មានអន្ដរជាតិ

លោកត្រាំ ប្រាប់ថាបើកចំហចំពោះកិច្ចសន្ទនាជាមួយលោកគីម ដោយគ្មានលក្ខខណ្ឌជាមុន

បានផុស

៥ ខែ មុន

នៅ

ថ្ងៃសុក្រ ២៧ កុម្ភៈ ២០២៦

ដោយ

Chheang

សេតវិមានបានប្រកាសកាលពីថ្ងៃព្រហស្បតិ៍ទី២៦ខែកុម្ភៈឆ្នាំ២០២៦ថា ប្រធានាធិបតីអាមេរិក ដូណាល់ ត្រាំ នៅតែបន្តបើកចំហចំពោះការចរចាជាមួយកូរ៉េខាងជើង «ដោយគ្មានលក្ខខណ្ឌកំណត់ជាមុន»អ្វីឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Yonhap ការឆ្លើយតបនេះបានធ្វើឡើងបន្ទាប់ពីមេដឹកនាំកូរ៉េខាងជើង លោក គីម ជុងអ៊ុន បានថ្លែងក្នុងមហាសន្និបាតបក្សនាពេលថ្មីៗនេះថា ទីក្រុងព្យុងយ៉ាងមានឆន្ទៈក្នុងការពិភាក្សាជាមួយអាមេរិក ប្រសិនបើវ៉ាស៊ីនតោនបោះបង់ចោលនូវគោលនយោបាយអរិភាព ចំពោះរបបរបស់លោក ដោយបញ្ជាក់ថា អនាគតនៃទំនាក់ទំនងនេះគឺ «អាស្រ័យទាំងស្រុងលើឥរិយាបថរបស់អាមេរិក»។

មន្ត្រីសេតវិមានបានរំលឹកថា ជំនួបកំពូលជាប្រវត្តិសាស្ត្រចំនួន៣លើករវាងលោកត្រាំ និងលោកគីម ក្នុងអាណត្តិដំបូង បានជួយឲ្យស្ថានភាពនៅឧបទ្វីបកូរ៉េមានស្ថិរភាព។ ខណៈមានការរំពឹងទុកថា លោកត្រាំអាចនឹងស្វែងរកការចរចាជាមួយលោកគីម ក្នុងអំឡុងពេលដំណើរទស្សនកិច្ចទៅកាន់ប្រទេសចិននាចុងខែក្រោយ មន្ត្រីអាមេរិកបានអះអាងថា គោលនយោបាយរបស់ខ្លួនមិនមានការផ្លាស់ប្តូរឡើយ ពោលគឺលោកត្រាំមិនបានកំណត់លក្ខខណ្ឌទុកជាមុនទេសម្រាប់ជំនួបដែលអាចកើតមានជាមួយលោកគីម។

សូមជម្រាបថា មេដឹកនាំទាំងពីរធ្លាប់បានជួបគ្នាដោយផ្ទាល់នៅប្រទេសសិង្ហបុរីក្នុងខែមិថុនាឆ្នាំ២០១៨ ទីក្រុងហាណូយនៃប្រទេសវៀតណាមនាខែកុម្ភៈឆ្នាំ២០១៩ និងភូមិ Panmunjom ដែលជាតំបន់គ្មានយោធារវាងកូរ៉េខាងជើងនិងកូរ៉េខាងត្បូង ក្នុងខែមិថុនាឆ្នាំ២០១៩៕

ប្រែសម្រួល៖ ឈាង