កូនស្រី​របស់​ គីម ជុងអ៊ុន​ ស្លៀកឈុតស្បៀក​ដូចឪ ចំពេល​សង្ស័យថា ត្រៀមស្នងតំណែងបន្ត

យោងតាមរូបថតពីប្រព័ន្ធផ្សព្វផ្សាយរដ្ឋ នៅ​​ថ្ងៃព្រហស្បតិ៍ទី ២៦ខែកុម្ភៈនេះ បានបង្ហាញ​​​​​កូនស្រី​របស់​​លោក​ គីម​ ជុងអ៊ុន ​គឺ​យុវតី​ គីម ជូអេ ( Kim Ju Ae)​ ស្ថិតក្នុង​ឈុត​សម្លៀក​បំពាក់​អាវធំដូច​លោក គីម ជុង​អ៊ុន​ ដែរ​នៅក្នុងក្បួនដង្ហែរយោធាមួយ ខណៈគេដាក់ការសង្ស័យថា ក្មេងជំទង់រូបនេះ កំពុងត្រូវបានរៀបចំជាអ្នកស្នងតំណែងបន្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កូនស្រីវ័យជំទង់របស់លោកគីម បានបង្ហាញខ្លួនយ៉ាងលេចធ្លោនៅក្នុងរូបថតរបស់រដ្ឋ ដែលបានបោះពុម្ពផ្សាយ ដើម្បីសម្គាល់​ដំណាក់កាលបិទនៃសមាជគណបក្សពលករដែលកំពុងកាន់អំណាច។ អ្នកទាំងពីរបានពាក់អាវស្បែក ដែលដូចគ្នា ខណៈពេលដែលពួកគេឈរក្បែរគ្នាដើម្បីមើលក្បួនដង្ហែរយោធាដ៏ធំមួយ។ ចំណែកឯ ភរិយាគឺលោកស្រី Ri Sol Ju ក៏បានបង្ហាញខ្លួនជាមួយអ្នកទាំងពីរក្នុងសម្លៀកបំពាក់ស្រដៀងគ្នាផងដែរ។

ទោះជាយ៉ាងនេះក្ដី ការបង្ហាញរូបភាពនិងសកម្មភាពរបស់ Ju Ae នៅលើប្រព័ន្ធផ្សព្វផ្សាយដែលចេញដោយរដ្ឋ វាលែងជារងចម្លែកទៀតហើយ បន្ទាប់ពីរូបនាងត្រូវបានគេមើលឃើញជាយូរមកហើយថា មានភាគរយខ្ពស់ក្នុងនាមជាអ្នកស្នងតំណែងបន្ត។

មិនតែប៉ុណ្ណោះ អ្នកវិភាគ Lim Eul-chul បាននិយាយថា អាវធំដែលជាសម្លៀកបំពាក់សំខាន់របស់មេដឹកនាំគីម ជាពិសេសក្នុងអំឡុងពេលបង្ហាញខ្លួនជាសាធារណៈសំខាន់ៗ គឺជានិមិត្តរូបនយោបាយរបស់កូរ៉េខាងជើង រូបរាងនោះមានទម្ងន់ វាត្រូវបានភ្ជាប់ទៅនឹងរូបភាពរបស់មេដឹកនាំជាអ្នកធានាចុងក្រោយនៃសន្តិសុខជាតិ និងវិបុលភាពនាពេលអនាគត។ ដូច្នេះនៅពេលដែលសម្លៀកបំពាក់និមិត្តរូបដូចគ្នានេះ ត្រូវបានពាក់លើកូនស្រីរបស់គាត់ វាពិបាកក្នុងការមើលឃើញថាវាជារឿងចៃដន្យណាស់។

ជាក់ស្ដែង សូម្បីតែអ្នកជំនាញកិច្ចការកូរ៉េ Leif-Eric Easley ក៏បានលើកឡើងដែរថា ការបង្ហាញខ្លួនចុងក្រោយរបស់យុវតីរូបនេះ បានបង្ហាញពីឋានៈខ្ពស់របស់នាង ក្នុងនាមជាកូនស្រីរបស់មេដឹកនាំខាងជើង។ ក្មេងនេះប្រហែលជាមិនទាន់គ្រប់អាយុដើម្បីចូលរួមក្នុងសមាជ ជាមួយនឹងតំណែងគណបក្សផ្លូវការនៅឡើយទេ។ ដូច្នេះលោកគីម ដាក់កូនស្រីឲ្យនៅអមៗដើម្បីត្រៀមបើកផ្លូវឲ្យ​កូន និងពង្រឹងអំណាចត្រកូលគីមជំនាន់ទី៤ ឲ្យកាន់តែរឹងមាំកាន់តែខ្លាំងជាងមុន៕

អត្ថបទ៖ សាង ស្រីល័ក្ខ