កូរ៉េខាងជើង ហៅកូរ៉េខាងត្បូង ថា «ប្រទេសអរិភាពលេខ១»

រូបថតដែលចេញផ្សាយដោយប្រព័ន្ធផ្សព្វផ្សាយកូរ៉េខាងជើងកាលពីថ្ងៃចន្ទទី១៩ ខែមករា បានបង្ហាញេូបភាព មជ្ឈមណ្ឌលអប់រំដសំខាន់មួយនៅក្នុងប្រទេសកូរ៉េខាងជើង ដែលដាក់បដាមួយហៅកូរ៉េខាងត្បូងថា ជា «ប្រទេសអរិភាពលេខ១» និងញុះញង់ឲ្យមានអរិភាពជាសាធារណៈប្រឆាំងនឹងទីក្រុងសេអ៊ូល។

យោងតាមទីភ្នាក់ងារសារព័ត៌មានកណ្តាលកូរ៉េ (KCNA) ដែលគ្រប់គ្រងដោយរដ្ឋបានបោះពុម្ពផ្សាយរូបថតទាំងនោះ ខណៈពេលកំពុងរាយការណ៍អំពីជនជាតិកូរ៉េខាងជើង កំពុងធ្វើដំណើរទៅកាន់អគារអប់រំថ្នាក់កណ្តាលនៅទីក្រុងព្យុងយ៉ាង ជាផ្នែកមួយនៃការប្រារព្ធខួបលើកទី៨០ នៃសម្ព័ន្ធយុវជនស្នេហាជាតិសង្គមនិយម ក៏ជាអង្គការយុវជនធំបំផុតក្នុងប្រទេស។

រូបថតរបស់ KCNA បង្ហាញពីជួរទាហានស្លៀកពាក់ឯកសណ្ឋានកំពុងស្តាប់មគ្គុទ្ទេសក៍នៅក្នុងសាលមួយ ដែលបង្ហាញបដា រូបថត និងសារប្រឆាំងនឹងកូរ៉េខាងត្បូង។ បដាទាំងនោះសរសេរថា «កូរ៉េខាងត្បូងគឺជាប្រទេសអរិភាពលេខ១ និងជាសត្រូវដ៏រឹងមាំដែលមិនផ្លាស់ប្តូរ» ហើយចោទប្រកាន់ទីក្រុងសេអ៊ូលថា បានបង្កើតភាពវឹកវរប្រឈមមុខដាក់គ្នា ដែលមានគោលបំណងផ្តួលរំលំកូរ៉េខាងជើង និង «បញ្ចប់របប»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារទាំងនោះរួមមានមាត្រាមួយនៃរដ្ឋធម្មនុញ្ញកូរ៉េខាងត្បូងដែលកំណត់ទឹកដីនៃប្រទេសថា ជាឧបទ្វីបកូរ៉េទាំងមូល ដែលហាក់ដូចជាការចោទប្រកាន់សេអ៊ូល មានបំណងបង្រួបបង្រួមភាគខាងជើងដោយការស្រូបយក។

ដោយឡែក នៅក្នុងកិច្ចប្រជុំគណបក្សចុងឆ្នាំមួយកាលពីខែធ្នូ ឆ្នាំ២០២៣ លោកគីម ជុងអ៊ុន បានប្រកាសពីទំនាក់ទំនងអន្តរកូរ៉េថា ជាទំនាក់ទំនងរវាង រដ្ឋពីរដែលមានអរិភាពចំពោះគ្នាទៅវិញទៅមក ហើយចាប់តាំងពីពេលនោះមក លោកបានបន្តគោលនយោបាយអរិភាពចំពោះទីក្រុងសេអ៊ូល រួមទាំងការសន្យាក្នុងអំឡុងពេលសុន្ទរកថាសភាក្នុងឆ្នាំ២០២៤ ដើម្បីពង្រឹងការអប់រំដែលមានគោលបំណងធ្វើឲ្យសាធារណជនចាត់ទុកកូរ៉េខាងត្បូង ជាប្រទេសអរិភាពលេខ១ និងជាសត្រូវដ៏សាហាវរបស់កូរ៉េខាងជើង៕

អត្ថបទ៖ សាង ស្រីល័ក្ខ

ចុចអានខាងក្រោមនេះ៖

គីម ជុងអ៊ុន ដកតំណែងឧបនាយករដ្ឋមន្ត្រីម្នាក់នៅនឹងកន្លែងតែម្តង ពេលចុះពិនិត្យរោងចក្រ ព្រោះធ្វើការយឺតយ៉ាវ