មេដឹកនាំកូរ៉េខាងជើងប្តេជ្ញាគាំទ្រលោកពូទីន «ដោយឥតលក្ខខណ្ឌ» និង «ជាអចិន្ត្រៃយ៍»

មេដឹកនាំកូរ៉េខាងជើង លោក គីម ជុងអ៊ុន បានប្តេជ្ញាគាំទ្រ «ដោយឥតលក្ខខណ្ឌ» និង «ជាអចិន្ត្រៃយ៍» ចំពោះគោលនយោបាយរបស់ប្រធានាធិបតីរុស្ស៊ី លោក វ៉្លាឌីមៀរ ពូទីន។ នេះបើយោងតាមរបាយការណ៍ពីប្រព័ន្ធផ្សព្វផ្សាយរដ្ឋរបស់ទីក្រុងព្យុងយ៉ាងនៅថ្ងៃសុក្រ​ទី​៩​ខែ​មករា​នេះ។

យោង​តាម KCNA នៅក្នុងលិខិតផ្ទាល់ខ្លួនផ្ញើជូនមេដឹកនាំរុស្ស៊ី លោកគីម​បានសង្កត់ធ្ងន់លើការប្តេជ្ញាចិត្តរបស់លោកក្នុងការឈរនៅក្បែរទីក្រុងមូស្គូ ដោយបានពិពណ៌នាអំពីចំណងទាក់ទងរវាងប្រទេសទាំងពីរថាជាទំនាក់ទំនងមិត្តភាពដ៏ «មានតម្លៃ» បំផុត។

ការសន្យានៃភក្តីភាពយ៉ាងមុតមាំនេះ បានបង្ហាញឲ្យឃើញពីការពង្រីកសម្ព័ន្ធភាពយ៉ាងឆាប់រហ័សរវាងកូរ៉េខាងជើង និងរុស្ស៊ី ដែលបានវិវត្តពីកិច្ចសហប្រតិបត្តិការការទូត ទៅជាការចូលរួមផ្នែកយោធាយ៉ាងសកម្ម។ របាយការណ៍ចារកម្មបានបង្ហាញថា ទីក្រុងព្យុងយ៉ាងបានពង្រឹងកិច្ចប្រឹងប្រែងរបស់រុស្ស៊ីយ៉ាងខ្លាំងនៅក្នុងជម្លោះអ៊ុយក្រែនដែលកំពុងបន្ត ដោយបានបញ្ជូនកងទ័ពប្រយុទ្ធប្រមាណ ១៥ ០០០​នាក់ និងវិស្វករយោធា ១ ០០០​នាក់ ដើម្បីជួយដល់ប្រតិបត្តិការនៅសមរភូមិមុខ រួមទាំងការបោសសម្អាតមីននៅក្នុងតំបន់ Kursk ផងដែរ។ បើ​តាមភ្នាក់ងារចារកម្មកូរ៉េខាងត្បូង ការបញ្ជូនកងទ័ពទាំងនេះបានបណ្តាល​ឲ្យ​ទាហានកូរ៉េខាងជើងប្រហែល ២ ០០០​នាក់បានបាត់បង់ជីវិត។

ទំនាក់ទំនងនេះត្រូវបានពង្រឹងបន្ថែមទៀតតាមរយៈសន្ធិសញ្ញាភាពជាដៃគូយុទ្ធសាស្ត្រឆ្នាំ​២០២៤ ដែលតម្រូវ​ឲ្យ​មានការផ្តល់ជំនួយយោធាទៅវិញទៅមក ក្នុងករណីមានការវាយប្រហារពីភាគីទីបី។ បណ្តាអ្នកវិភាគបានលើកឡើងថា ភាពជាដៃគូដែលកាន់តែស៊ីជម្រៅនេះ បានផ្តល់​ឲ្យកូរ៉េខាងជើងនូវដង្ហើមសេដ្ឋកិច្ច និងលទ្ធភាពទទួលបានបច្ចេកវិទ្យាយោធារបស់រុស្ស៊ី ខណៈដែលទីក្រុងមូស្គូទទួលបានកម្លាំងទ័ព និងគ្រាប់រំសេវយ៉ាងសំខាន់។

សារចុងក្រោយរបស់លោកគីម គឺជាសញ្ញាបង្ហាញថា ទីក្រុងព្យុងយ៉ាងមានបំណងបន្តធ្វើជាសម្ព័ន្ធមិត្តដ៏ស្មោះត្រង់របស់វិមានក្រឹមឡាំង ខណៈដែលប្រទេសទាំងពីរកំពុងប្រឈមមុខនឹងការរុញច្រាន​ឲ្យ​នៅឯកោ និងការដាក់ទណ្ឌកម្មបន្តបន្ទាប់ពីបស្ចិមប្រទេស៕

ប្រែសម្រួល៖ ឈាង