បើករថយន្តក្នុងស្ថានភាពស្រវឹងបុកអ្នកជិះម៉ូតូខ្ទាតធ្លាក់ចូលស្ទឹងស្លាប់ភ្លាមៗ

ស្ត្រីម្នាក់បានស្លាប់ភ្លាមៗនៅមាត់ច្រាំងស្ទឹងសង្កែ បន្ទាប់ពីមានបុរសម្នាក់បើករថយន្តទាំងស្ថានភាពស្រវឹងក្នុងទិសដៅបញ្ច្រាសគ្នា និងមានល្បឿនយ៉ាងលឿនផងនោះបានរេទៅបុកម៉ូតូយ៉ាងពេញទំហឹងបណ្ដាលឱ្យស្ត្រីដែលបើកបរម៉ូតូប៉ើងពីលើស្ពានធ្លាក់ទៅស្លាប់នៅខាងក្រោមស្ពាន។

ហេតុការណ៍នេះបានកើតឡើងនៅវេលាម៉ោង៨និង១០នាទី យប់ថ្ងៃទី១៤ ខែមីនា ឆ្នាំ២០២៤ តាមបណ្ដោយផ្លូវជាតិលេខ ៥៧ ស្ថិតនៅកណ្ដាលស្ពានវត្តគរ ក្នុងភូមិវត្តគរ សង្កាត់វត្តគរ ក្រុងបាត់ដំបង ខេត្តបាត់ដំបង។

រថយន្តបង្កម៉ាក ហាយឡិនឌ័រ ពណ៌ស្ករ ពាក់ស្លាកលេខភ្នំពេញ 2AL-1648 ជាមួយម៉ូតូម៉ាក scoopy ពណ៌ស ពាក់ស្លាកលេខបាត់ដំបង1AR-8089 បើកបរដោយស្ត្រីម្នាក់មិនទាន់ស្គាល់អត្តសញ្ញាណ ក្នុងទិសដៅបញ្ច្រាសគ្នា។

បើតាមសាក្សីនៅក្បែរកន្លែងកើតហេតុបាននិយាយថា នៅមុនពេលកើតហេតុគេឃើញរថយន្តខាងលើបានបោះពួយយ៉ាងលឿនក្នុងទិសដៅពីកើតទៅលិច លុះដល់ពាក់កណ្ដាលស្ពានរថយន្តហាក់បាត់បង់ម្ចាស់ការក៏បានរ៉េចង្កូតទៅខាងឆ្វេងបុកបង្កាន់ដៃស្ពានហើយជ្រុលទៅបុកម៉ូតូ scoopy ដែលបើកបរដោយស្ត្រីម្នាក់ក្នុងទិសដៅបញ្ច្រាសគ្នា បណ្ដាលឲ្យស្ត្រីរងគ្រោះប៉ើងធ្លាក់ទៅលើច្រាំងស្ទឹងសង្កែស្លាប់ភ្លាមៗ ដោយឡែករថយន្តបានអូសជាមួយនឹងម៉ូតូទៅមុខប្រមាណជិត ១០០ម៉ែត្រ។ ភ្លាមៗនោះដែរ ខណៈដែលសមត្ថកិច្ចកំពុងធ្វើការល្បាតតាមដងផ្លូវបានចុះជួយអន្តរាគមន៍ និងឃាត់ខ្លួនអ្នកបើកបររថយន្តដែលមានសភាពស្រវឹងជោកជាំព្រមទាំងបានចុះទៅពិនិត្យស្ត្រីរងគ្រោះនៅលើច្រាំងស្ទឹងសង្កែដែលស្លាប់បាត់បង់ជីវិតទៅហើយ។

បច្ចុប្បន្នទាំងរថយន្ត និងម៉ូតូត្រូវបានប្រគល់ទៅសមត្ថកិច្ចនៃការិយាល័យចរាចរណ៍ផ្លូវគោកដើម្បីយកទៅរក្សាទុក និងដោះស្រាយតាមនីតិវិធីដោយឡែកអ្នកបើកបររថយន្តបង្កកំពុងអនុវត្តតាមនីតិវិធីច្បាប់ផងដែរ រីឯសពស្ត្រីរងគ្រោះសមត្ថកិច្ចកំពុងស្រាវជ្រាវរកអត្តសញ្ញាណ និងទីលំនៅដើម្បីប្រគល់សពយកទៅធ្វើបុណ្យតាមប្រពៃណី៕

អត្ថបទ៖ សោ និយមរ័ត្ន