រថយន្តដឹកទំនិញពាក់ស្លាកលេខ ខេមរៈភូមិន្ទ​បើកកិនគម្របលូបាក់ ខណៈដឹកទំនិញចេញពីឃ្លាំង

រថយន្តដឹកទំនិញធុនធ្ងន់មួយគ្រឿងពាក់ស្លាកលេខ ខេមរៈភូមិន្ទ បើកចេញពីឃ្លាំងទម្លាក់ទំនិញបត់ចេញមកក្រៅកិនចំគម្របលូបណ្ដាលឲ្យបាក់ផុងជាប់កង់ទៅមុខលែងរួច។

ហេតុការណ៍នេះកើតឡើងកាលពីវេលាម៉ោង១២និង៤០នាទី ថ្ងៃទី២៨ ខែកញ្ញា ឆ្នាំ២០២៤ នៅត្រង់ចំណុចកែងស្តុបបឹងកេងកង៣ តាមបណ្តោយផ្លូវលេខ១៦៣ កែងផ្លូវ ៣៦០ ស្ថិតក្នុងសង្កាត់ទួលស្វាយព្រៃទី០២ ខណ្ឌបឹងកេងកង រាជធានីភ្នំពេញ។

បើតាមប្រភពពីកន្លែងកើតហេតុបានឲ្យដឹងថា មុនពេកើតហេតុគេឃើញមានរថយន្តធុនធំមួយគ្រឿងម៉ាក ហ៊ីណូ ពណ៍បៃតងចាស់ ពាក់ស្លាកលេខ ខេមរភូមិន្ទ 3-0900 បើកបរតាមបណ្តោយផ្លូវលេខ៣៦០ ក្នុងទិសដៅពីកើតទៅលិច ខណៈបើកមកដល់ចំណុចស្តុបបឹងកេងកង៣ បានបត់ឆ្វេងគោលដៅឡើងតាមបណ្តោយផ្លូវ១៦៣ ស្របពេលនោះរថយន្តបានបួងចង្កួតបត់ និងដោយសាររថយន្តវែងផង ក៏ស្រាប់តែបួងជ្រុលទៅកិនគម្របលូបណ្តាលអោយផុងបាក់ផ្លូវ កល់ទៅមុខលែងរួចតែម្តង។

ក្រោយពេលកើតហេតុ សមត្ថកិច្ចមូលដ្ឋានបានចុះមកដល់រួចយករថយន្តខាងលើទៅរក្សាទុកនៅអធិការដ្ឋាននគរបាលខណ្ឌបឹងកេង រង់ចាំដោះស្រាយពេលក្រោយ៕

អត្ថបទ៖ ម៉េង