រថយន្ដដឹកខ្សាច់បុករះផ្ទះពលរដ្ឋច្រើនកន្លែងនៅក្រុងតាខ្មៅ

រថយន្តដឹកខ្សាច់មួយគ្រឿងបើករេពេញផ្លូវជ្រុលចង្កូតបុករះផ្ទះប្រជាពលរដ្ឋ ហាងលក់ម្ហូបអាហារ តូបលក់កាហ្វេ និង បង្គោលអគ្គិសនី បណ្តាលអោយខូចខាត និងមានមនុស្សរងរបួស។ ហេតុការណ៍បុករះបង្កដោយរថយន្ដធុនធំនេះ បានកើតឡើងនៅថ្ងៃទី២៤ ខែមិថុនាឆ្នាំ២០២៥ នៅចំណុចផ្លូវ១១៥(ជិតស្តុបA9) ស្ថិតក្នុងភូមិព្រែកសំរោង៣ សង្កាត់តាខ្មៅមក្រុងតាខ្មៅ ខេត្តកណ្តាល ។

បើតាមប្រភពពីកន្លែងកើតហេតុបានអោយដឹងថា មុនពេលកើតហេតុគេបានឃើញបុរសម្នាក់វ័យប្រហែល៤០ឆ្នាំជាង បើកបររថយន្តមួយគ្រឿងម៉ាក Hyundai ពណ៌ស ពាក់ស្លាក ភ្នំពេញ 3E-2298 ជាប្រភេទរថយន្តធុនធំដឹកខ្សាច់ បើកបរក្នុងទិសដៅពីលេច មកកើត លុះជិតដល់កន្លែងកើតហេតុឃើញរថយន្តបើកធ្លាក់ផ្លូវម្ដងរួចហើយ ប៉ុន្តែនៅបន្តដំណើរមកមុខទៀត ខណៈមកដល់ចំណុចកើតហេតុ ក៏រេពេញផ្លូវម្ដងទៀតរួចបុកចូលកន្លែងលក់ម្ហូបអាហារ តូបលក់កាហ្វេ សំយាបផ្ទះ និងបង្គោលអគ្គិសនី បណ្ដាលឲ្យរងការខូចខាត និងមានមនុស្សរងរបួសផងដែរ។ ភ្លាមៗប្រជាពលរដ្ឋនៅក្បែរនោះបាននាំគ្នាឃាត់អ្នកបើកបររថយន្ត រួចរាយការណ៍ទៅសមត្ថកិច្ចមូលដ្ឋានអោយចុះអន្តរាគមន៍នៅទីតាំងកើតហេតុ។

ក្រោយពេលកើតហេតុសមត្ថកិច្ចផ្នែកចរាចរណ៍នៃអធិការក្រុងតាខ្មៅបានចុះមកដល់កន្លែងកើតហេតុធើ្វការវាស់វែង និងបានឃាត់ខ្លួនម្ចាស់រថយន្តយកទៅសួរនាំ៕

អត្ថបទ៖ ម៉េង