កីឡា

វិសាខា ឡើងវគ្គផ្តាច់ព្រ័ត្រ ពានសម្តេចតេជោ លើកទី៤ ក្នុងប្រវត្តិសាស្ត្ររបស់ខ្លួន

បានផុស

១ ខែ មុន

នៅ

ថ្ងៃព្រហស្បតិ៍ ៣០ មេសា ២០២៦

ដោយ

ក្រុមបាល់ទាត់ វិសាខា បានឡើងទៅកាន់វគ្គផ្តាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី១៩ បន្ទាប់ពីទទួលលទ្ធផលដ៏ធំធេងសម្រាប់ការប្រកួតវគ្គពាក់កណ្តាលផ្តាច់ព្រ័ត្រ ជាមួយ អាយអេសអាយ ដង្កោសែនជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅជើងទី១ វិសាខា បានយកឈ្នះ អាយអេសអាយ ដង្កោសែនជ័យ ដោយលទ្ធផល ៣-០ នៅកីឡដ្ឋានវិសាខា និងជើងទី២ ទទួលបានជ័យជម្នះដោយលទ្ធផល ៤-១ នៅកីឡដ្ឋាន ISI Park ដូច្នេះសរុបទាំងពីរជើង ពួកគេបានឈ្នះដោយលទ្ធផល ៧-១ ដើម្បីឡើងទៅកាន់វគ្គផ្តាច់ព្រ័ត្រ។

នេះជាការឡើងវគ្គផ្តាច់ព្រ័ត្រ លើកទី៤ សម្រាប់ វិសាខា បន្ទាប់ពីពួកគេបានឡើងវគ្គផ្តាច់ព្រ័ត្រក្នុងឆ្នាំ ២០២០ ២០២១ និង ២០២២។ រាល់ការឡើងវគ្គផ្តាច់ព្រ័ត្រទាំង ៣ លើកមុនគឺសុទ្ធតែឈ្នះជើងឯកទាំងអស់ ដូច្នេះពួកគេមិនធ្លាប់ចាញ់ក្នុងវគ្គផ្តាច់ព្រ័ត្រឡើយ។

រយៈពេល ២ រដូវកាលចុងក្រោយពោលគឺ ២០២៣-២៤ និង ២០២៤-២៥ ពួកគេមិនបានឡើងដល់វគ្គផ្តាច់ព្រ័ត្រទេ។ នៅរដូវកាល ២០២៣-២៤ ពួកគេបានឈានដល់វគ្គពាក់កណ្តាលផ្តាច់ព្រ័ត្រ ប៉ុន្តែបានចាញ់ ភ្នំពេញក្រោន ហើយបានធ្លាក់ទៅប្រកួតដណ្តើមលេខ ៣ ដោយទទួលបានចំណាត់ថ្នាក់លេខ ៣។

វិសាខា ត្រូវរង់ចាំដៃគូវគ្គផ្តាច់ព្រ័ត្រ រវាង ក្រុម បឹងកេត និង ព្រះខ័នរាជស្វាយរៀង បន្ទាប់ពីក្រុមទាំងពីរស្មើគ្នា ១-១ ក្នុងជើងទី១ កាលពីថ្ងៃទី២៩ ខែមេសា ឆ្នាំ ២០២៦ ហើយការប្រកួតជើងទី២ ធ្វើនៅថ្ងៃទី២០ ខែឧសភា ឆ្នាំ ២០២៦៕