ព័ត៌មានអន្ដរជាតិ

ចិន អំពាវនាវឱ្យមានតំណាងប្រទេសពីភាគខាងត្បូង បន្ថែមទៀត នៅកម្រិត UN

បានផុស

១១ វិនាទី មុន

នៅ

ថ្ងៃពុធ ១៧ មិថុនា ២០២៦

ដោយ

ពេលមានជម្លោះ ឬវិបត្តិក្នុងបណ្តាប្រទេសនៅក្នុងសកលលោក គេតែងឃើញអង្គការសហប្រជាជាតិ ដើរតួនាទី ដោះស្រាយបញ្ហាតាមរយៈភាសាកាទូតយ៉ាងមានប្រសិទ្ធភាព ប៉ុន្តែប៉ុន្មានឆ្នាំចុងក្រោយនេះ ស្ថាប័នកំពូលក្នុងពិភពលោកមួយនេះ ហាក់មិនបានបំពេញតួនាទីខ្លួនយ៉ាងពេញលេញ និង មានប្រសិទ្ធភាព ដើម្បីបញ្ចប់ជម្លោះ ឬវិបត្តិសកលឡើយ។

រដ្ឋមន្ត្រីការបរទេសចិន លោក វ៉ាង យី បានលើកឡើងនៅថ្ងៃពុធ ថា ប្រទេសឬតំបន់ដែលកំពុងរីកចម្រើន បានកំពុងរងទុក្ខដោយសារការតំណាងមិនគ្រប់គ្រាន់នៅឯអង្គការសហប្រជាជាតិ(UN) ហើយអំណាចរបស់ UN កំពុងប្រឈមកាន់តែខ្លាំងដោយសារជម្លោះនយោបាយ និងសេដ្ឋកិច្ចកំពុងកើនឡើងទូទាំងពិភពលោក។ នេះ បើយោងតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ នៅថ្ងៃទី១៧ ខែមិថុនា ឆ្នាំ២០២៦ ។

ការលើកឡើងរបស់អ្នកកាទូតកំពូលរបស់ចិនរូបនេះ បានកើតឡើង ក្នុងសន្និសីទសារព័ត៌មានដ៏កម្រមួយនៅទីក្រុងប៉េកាំង លើការចេញផ្សាយឯកសារមួយ ដើម្បីធានាថា អភិបាលកិច្ចសកលមានភាពយុត្តិធម៌ និងសមធម៌ជាងមុន។

រដ្ឋមន្ត្រីការបរទេសចិន លោក វ៉ាង យី ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក វ៉ាង ថា៖ « ប្រទេសនានា មិនថាធំឬតូច ខ្លាំងឬខ្សោយ អភិវឌ្ឍន៍ឬកំពុងអភិវឌ្ឍន៍ គឺសុទ្ធតែជាសមាជិកស្មើគ្នានៃសហគមន៍អន្តរជាតិ ហើយគួរមានសំឡេងពីតំបន់លោកខាងត្បូងបន្ថែមទៀត ត្រូវបានឮ»។

លោក វ៉ាង និយាយថា៖ « បញ្ហាប្រឈមថ្មីៗជាបន្តបន្ទាប់នាំមកនូវវិបត្តិសកលដែលជាប់ទាក់ទងគ្នា! កប៉ាល់មួយចូលទៅក្នុងដែនទឹកដ៏គ្រោះថ្នាក់ជាមួយនឹងថ្មប៉ប្រះទឹកដែលលាក់កំបាំង និងព្យុះដ៏ខ្លាំងក្លា។ ជម្លោះទាំងនេះ[សកល] បង្ហាញពីជម្លោះដ៏ជ្រៅ ខណៈព្រឹត្តិការណ៍ស្វាខ្មៅ និងសត្វរមាសពណ៌ប្រផេះលេចឡើងជាបន្តបន្ទាប់»។ ដោយអ្នកកាទូតចិនរូបនេះ សំដៅដល់ព្រឹត្តិការណ៍ ឬការគំរាមកំហែងដែលមិននឹកស្មានដល់និងមិនអើពើ ទោះបីជា មើលឃើញហើយក៏ដោយ។

លោកសំដៅដល់ជម្លោះមជ្ឈិមបូព៌ា និងអ៊ុយក្រែន ក្នុងសុន្ទរកថារបស់ខ្លួន ប៉ុន្តែសុំមិនលម្អិត។

លោក វ៉ាង និយាយថា ឯកសារទាំងនេះ[សំណើមួយដោយភាគីចិន] មានគោលបំណងកសាងការឯកភាពគ្នាជាអន្តរជាតិ ដើម្បីផ្តល់នូវការឆ្លើយតបកាន់តែមានប្រសិទ្ធភាព ចំពោះបញ្ហាប្រឈមសកល ហើយរក្សាសិទ្ធិអំណាច និងឋានៈរបស់អង្គការសហប្រជាជាតិជាមូលដ្ឋានគ្រឹះនៃភាពជោគជ័យនៃគំនិតផ្តួចផ្តើមណាមួយ៕

សម្រួល៖ ណឺ មិនា