ព័ត៌មានអន្ដរជាតិ

អាមេរិកបារម្ភខ្លាំង ជុំវិញការសាកល្បងមីស៊ីលរបស់ចិន នៅ មហាសមុទ្រប៉ាស៊ីហ្វិក

បានផុស

២១ ម៉ោង មុន

នៅ

ថ្ងៃអង្គារ ៧ កក្កដា ២០២៦

ដោយ

សហរដ្ឋអាមេរិក នៅថ្ងៃចន្ទ បានសម្តែងការព្រួយបារម្ភលើកម្មវិធីនុយក្លេអ៊ែររបស់ទីក្រុងប៉េកាំង បន្ទាប់ពីប្រទេសចិន បានសាកល្បងបាញ់ក្បាលគ្រាប់នុយក្លេអ៊ែរសប្បនិម្មិតចូលទៅក្នុងមហាសមុទ្រប៉ាស៊ីហ្វិក ដែលជាការវិវត្តន៍ចុងក្រោយបំផុតក្នុងការធ្វើទំនើបកម្មយោធាយ៉ាងឆាប់រហ័សរបស់ទីក្រុងប៉េកាំង។

ភ្នាក់ងារសារព័ត៌មាន AFP ចេញផ្សាយនៅថ្ងៃទី៧ ខែកក្កដា ឆ្នាំ២០២៦ បានឲ្យដឹងថា ការសាកល្បងកាលពីថ្ងៃចន្ទនោះ បានកើតឡើងពីរឆ្នាំ បន្ទាប់ពីប្រទេសចិន បានបាញ់មីស៊ីលផ្លោងអន្តរទ្វីបចូលទៅក្នុងដែនទឹកក្បែរ Polynesia បារាំង ភាគខាងត្បូងមហាសមុទ្រប៉ាស៊ីហ្វិក ដែលជាការបាញ់មីស៊ីលបែបនេះលើកដំបូងលើដែនទឹកអន្តរជាតិក្នុងរយៈពេលជាង ៤០ឆ្នាំ។

អ្នកនាំពាក្យក្រសួងការបរទេសអាមេរិក លោក Tommy Pigott ។ រូបភាព៖ WIBC

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកវិភាគលើកឡើងថា ការសាកល្បងនេះបានបង្ហាញពីសមត្ថភាពរបស់ចិនកាន់តែខ្លាំងឡើងក្នុងការវាយប្រហារលើដីគោកសហរដ្ឋអាមេរិក បង្ហាញពីមហាអំណាចនៅអាស៊ីនិងជាសត្រូវរបស់ទីក្រុងវ៉ាស៊ីនតោន ទោះបីជាមានការជំរុញផ្សះផ្សាក្រោមការដឹកនាំរបស់ប្រធានាធិបតីអាមេរិក លោក ដូណាល់ ត្រាំ ក៏ដោយ។

អ្នកនាំពាក្យក្រសួងការបរទេសអាមេរិក លោក Tommy Pigott និយាយថា៖ « នៅពេលដែលសហរដ្ឋអាមេរិកកំពុងខិតខំប្រឹងប្រែង ដើម្បីទប់ស្កាត់ការរីកសាយភាយអាវុធនុយក្លេអ៊ែរជាងពេលណាៗទាំងអស់ តែប្រទេសចិនកំពុងធ្វើផ្ទុយទៅវិញ»។

លោក រៀបរាប់ក្នុងសេចក្តីថ្លែងការណ៍មួយថា៖ « ការបង្កើនអាវុធនុយក្លេអ៊ែរយ៉ាងឆាប់រហ័ស និងមិនច្បាស់លាស់របស់ទីក្រុងប៉េកាំង គឺជាក្តីបារម្ភយ៉ាងខ្លាំងក្នុងតំបន់ និងពិភពលោក»។

កាលពីខែកុម្ភៈ សហរដ្ឋអាមេរិកសម្រេចឱ្យផុតកំណត់នៃសន្ធិសញ្ញា New START ដែលជាសន្ធិសញ្ញាគ្រប់គ្រងអាវុធសំខាន់ចុងក្រោយជាមួយរុស្ស៊ី ខណៈទីក្រុងវ៉ាស៊ីនតោនទទូចលើកិច្ចព្រមព្រៀងថ្មី រួមបញ្ចូលទាំងចិនផងដែរ។

សំណើទាំងនេះត្រូវបានបដិសេធដោយចិន ព្រោះឃ្លាំងអាវុធនុយក្លេអ៊ែររបស់ខ្លួនមានទំហំតូចជាងរុស្ស៊ីច្រើន ប៉ុន្តែកំពុងរីកចម្រើនយ៉ាងឆាប់រហ័ស។

ក្រសួងការបរទេសអាមេរិកជំរុញឱ្យប្រទេសចិនចូលរួមក្នុងការពិភាក្សាអំពីការគ្រប់គ្រងអាវុធនិងប្តេជ្ញាចិត្ត ចំពោះការរៀបចំការជូនដំណឹងជាប្រចាំសម្រាប់ការបាញ់មីស៊ីលផ្លោងអន្តរទ្វីប និងការបាញ់បង្ហោះអវកាសទាំងអស់៕

សម្រួល៖ ណឺ មិនា