ព័ត៌មានជាតិ

យកចំបើងនៅវាលស្រែទៅបណ្តុះផ្សិត រកចំណូលបានប្រមាណ៣ម៉ឺនដុល្លារ ក្នុងមួយឆ្នាំ

បានផុស

៥ years មុន

នៅ

ថ្ងៃសៅរ៍ ៥ ធ្នូ ២០២០

ដោយ

កសិករនៅស្រុកសូទ្រនិគម ខេត្តសៀមរាប និយាយថា នៅលើវាលស្រែចម្រូត ចំបើងគឺជាមាសប្រាក់ បើសិនជាមានការប្រមូលទុកដាក់តាមបច្ចេកទេសត្រឹមត្រូវ យ៉ាងហោចណាស់ចំបើងអាចមានតម្លៃក្នុង១ហិចតា ជិត៥០០ដុល្លារ ហើយបើមានការកែច្នៃចេញជាផលិតផលផ្សិត នឹងអាចរកប្រាក់ចំណូលបានច្រើនជាងនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅលើវាលស្រែដែលកសិករច្រូតកាត់រួច ច្បាស់ណាស់ថា ចំបើងត្រូវបានគេបោះបង់ចោល ដោយមិនបានគិតឡើយអំពីតម្លៃនៃសារប្រយោជន៍របស់វា ដោយសារតែការធ្វើកសិកម្មបច្ចុប្បន្ននេះ មិនសូវបានពឹងផ្អែកលើកម្លាំងសត្វពាហនៈ ដូច្នេះហើយ ចំបើងដែលធ្លាប់តែត្រូវបានកសិករប្រមូលទុកដាក់ជាចំណីគោក្របីនោះ ក៏លែងមានតម្រូវការផងដែរ ក៏ប៉ុន្តែអាចចាត់ទុកថា វាចម្លែកខ្លាំងណាស់ ដែលមានកសិករម្នាក់ព្យាយាមប្រមូលយកចំបើងទាំងនោះ ហើយសកម្មភាពទាំងនោះដែរ ត្រូវបានធ្វើឡើងដោយប្រើបច្ចេកទេសគ្រឿងចក្រទៀតផង។

កាលពីរសៀលថ្ងៃទី០៤ ខែធ្នូនេះ លោក សង ស៊ីន អាយុ៣៣ឆ្នាំ ជាកសិកររស់នៅក្នុងសហគមន៍កសិកម្មសំរោងមានជ័យ ឃុំសំរោង ស្រុកសូទ្រនិគម ខេត្តសៀមរាប ក្នុងពេលដែលលោកកំពុងប្រមូលចំបើងនៅតាមវាលស្រែ ក្បែរកសិដ្ឋានរបស់លោកនោះ បានឲ្យដឹងថា លោកប្រមូលចំបើង ដើម្បីអាជីវកម្មរបស់លោក បណ្តុះផ្សិតចំបើង និងចិញ្ចឹមមេគោ។ រយៈពេល២ឆ្នាំមកហើយ ដែលលោកបានចាប់មុខរបរជាអ្នកបណ្តុះផ្សិតចំបើង។ មន្ទីរកសិកម្មខេត្ត និងអង្គការដៃគូផងដែរ បានជួយណែនាំបណ្ដុះបណ្ដាលលើផ្នែកបច្ចេកទេស។មកដល់ពេលនេះ លោកមានរោងបណ្តុះផ្សិតចំបើង២ខ្នង ស្មើនឹង១៨បន្ទប់ ក្នុងមួយបន្ទប់មាន៥គ្រែ និងមួយគ្រែស្មើនឹង៥ថ្នាក់ សរុបទាំងអស់នោះ គឺវាស្មីនឹង ៤៥០ថ្នាក់។

ការបែងចែកឲ្យមានជាបន្ទប់យាំងដូច្នេះ គឺដើម្បីដំណើរការបណ្តុះផ្សិតតាមលំដាប់ថ្ងៃ ប្រដេញគ្នាជាលក្ខណៈវិលជុំ ធានាបានការប្រមូលផលប្រចាំថ្ងៃ គិតជាមធ្យមក្នុងថ្ងៃ ទទួលផលបាន៣០គីឡូក្រាម ហើយតម្លៃរបស់វាក្នុង១គីឡូក្រាមស្មើនឹង ៣ដុល្លារ។ ការគណនាអំពីការលក់ផ្សិតចំបើងបានឲ្យឃើញថា ចំណូលក្នុង១ឆ្នាំ បានជាង៣ម៉ឺនដុល្លារ ក្នុងនោះកាត់ចេញទៅលើការចំណាយផ្សេងៗប្រមាណជា៦០% នៅសល់ប្រាក់ចំណេញប្រមាណជា ១ម៉ឺន៣ពាន់ដុល្លារ។

លោក សង ស៊ីន ឲ្យដឹងទៀតថា ចំបើងទាំងនេះ លោកប្រមូលចេញពីស្រែផលិតស្រូវពូជរបស់លោកប្រមាណជា៣ហិចតា ក្នុងមួយហិចតាអាចប្រមូលចំបើងបានប្រហែលជា៦០០ដុំ ដែលក្នុងមួយដុំមានទម្ងន់១០គីឡូក្រាម។ ដុំរមូរចំបើងទាំងនេះ បើសិនជាមានការទិញលក់ ក៏មានតម្លៃ៣០០០រៀលដែរ ដូច្នេះលើវាលស្រែក្នុងមួយហិចតា បើមិនមានការកែច្នៃចំបើងទាំងនេះទេនោះ គឺវាស្មើនឹងការបោះចោលទឹកប្រាក់យ៉ាងហោចណាស់ក៏ជិត២លានរៀលដែរ បើគិតទូទាំងប្រទេស អាចនិយាយបានថា រាប់ពាន់លានរៀល។

លោកបន្ថែមទៀតថា ក៏ចេញពីផលចំបើងនេះដែរ ឆ្នាំនេះលោកចិញ្ចឹមគោមេបានចំនួន៧ក្បាល ឆ្នាំក្រោយលោកបន្ថែមគោមេឲ្យបាន២០ក្បាល និងគោសាច់៤០ក្បាលទៀត ហើយសំណល់ចេញពីការបណ្តុះផ្សិត និងទទួលបានជីកំប៉ុស ដូច្នោះហើយលោកគ្រោងនឹងដាំបន្លែសុវត្ថិភាពបន្ថែមទៀត ដែលគម្រោងទាំងនេះនឹងត្រូវបានប្រើប្រាស់ទុន ចេញពីការរកប្រាក់ចំណេញ ដែលបានមកពីការបណ្តុះផ្សិតចំបើង៕

អត្ថបទ៖ គឿនវេត

សូមចុចអាន៖ ភាពខុសគ្នារវាងឃ្មុំចិញ្ចឹមនិងឃ្មុំធម្មជាតិ របស់ប្រជាពលរដ្ឋនៅប៉ៃលិន