ព័ត៌មានជាតិ

អភិបាលខេត្តពោធិ៍សាត់ ចុះត្រួតពិនិត្យបទល្មើសនេសាទក្នុងរដូវបិទ រកឃើញមានត្រីកើនឡើងជាងឆ្នាំមុន

បានផុស

៥ ខែ មុន

នៅ

ថ្ងៃសៅរ៍ ២៨ មិថុនា ២០២៥

ដោយ

ពោធិ៍សាត់ ៖ នៅព្រឹកថ្ងៃទី ២៨ ខែមិថុនា ឆ្នាំ២០២៥ លោកខូយ រីដា អភិបាលខេត្តនៃគណៈអភិបាលខេត្តពោធិ៍សាត់ បានដឹកនាំក្រុមការងារចុះត្រួតពិនិត្យស្ថានភាពនេសាទក្នុងតំបន់បឹងទន្លេសាបនៅក្នុងទឹកដីខេត្តពោធិ៍សាត់ ក្នុងរដូវបិទនេសាទ។ ក្រោមការសហការរបស់អាជ្ញាធរមូលដ្ឋាន និងកងកម្លាំងសមត្ថកិច្ច ការត្រួតពិនិត្យនេះមានគោលបំណងបង្ការ និងទប់ស្កាត់បទល្មើសនេសាទខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងពេលចុះត្រួតពិនិត្យ អាជ្ញាធរ លោកបានរកឃើញថា បរិមាណត្រីនៅក្នុងតំបន់បឹងទន្លេសាបមានការកើនឡើង ប្រៀបធៀបនឹងរដូវបិទឆ្នាំមុន។ ភាពចម្រើននៃធនធានត្រីនេះ គឺជាលទ្ធផលមួយនៃការអនុវត្តយុទ្ធនាការពង្រឹងការការពារ ចុះបង្រ្កាបបទល្មើសនេសាទខុសច្បាប់និងអប់រំនេសាទឱ្យគោរពប្រើឧបករណ៍ត្រូវតាមច្បាប់ជាលក្ខណៈគ្រួសារ។

ជាពិសេស ឱ្យប្រជាពលរដ្ឋនេសាទបានចូលរួមសកម្មក្នុងការរស់នៅដោយផ្អែកលើអាជីពនេសាទតាមរបៀបប្រពៃណី ដោយប្រើប្រាស់ឧបករណ៍ចាប់ត្រីសាមញ្ញក្នុងគ្រួសារ។ ពួកគេបានបញ្ចេញថា ដំណើរការនេសាទក្នុងរដូវនេះចំណាយដើមទុនតិចជាងមុន ប៉ុន្តែទទួលបានត្រីច្រើនជាងឆ្នាំមុនផងដែរ។

លោកអភិបាលខេត្តបានអំពាវនាវឱ្យប្រជាជនបន្តគោរពច្បាប់នេសាទ និងចូលរួមក្នុងការការពារធនធានធម្មជាតិ ដើម្បីធានាបាននូវស្ថិរភាពក្នុងជីវភាពសេដ្ឋកិច្ច និងបរិស្ថានប្រកបដោយចីរភាពសម្រាប់ជំនាន់ក្រោយ។

សូមជម្រាបជូនផងដែរថា លោក ខូយ រីដា អភិបាលខេត្តពោធិ៍សាត់ និងជាប្រធានគណៈបញ្ជាការឯកភាពរដ្ឋបាលខេត្ត នាព្រឹកថ្ងៃសៅរ៍ ទី២៨ ខែមិថុនា ឆ្នាំ២០២៥ នៅឃុំកំពង់លួង ស្រុកក្រគរ ក៏បានអញ្ជេីញចុះសួរសុខទុក្ខសមត្ថកិច្ចដែលឈរជេីងប្រចាំការទប់ស្កាត់បទល្មេីសនេសាទក្នុងដែនសមត្ថកិច្ចខេត្តពោធិ៍សាត់ ដោយបាននាំយកគ្រឿងឧបភោគ បរិភោគចែកជូនដល់កម្លាំងសមត្ថកិច្ច៕

ដោយ ៖ លាន គ្រន