កូរ៉េខាងជើង ចាប់ខ្លួនគ្រូរបាំ ដែលយកបទចម្រៀងបរទេស ទៅបង្រៀនសិស្ស (មានវីដេអូ)

តាមសេចក្តីរាយការណ៍ អាជ្ញាធរកូរ៉េខាងជើង បានចាប់ខ្លួនគ្រូបង្រៀនរាំម្នាក់ និងសិស្សជាច្រើ​ននាក់ ពីបទប្រើប្រាស់ប្រព័ន្ធផ្សព្វផ្សាយបរទេស ដើម្បីបង្រៀនក្បាច់រាំ “មូលធននិយម”។

គ្រូបង្ហាត់រាំនៅទីក្រុង Pyongsong ភាគពាយ័ព្យបានប្រើ Flash ដែលមានផ្ទុកបទចម្រៀងបរទេស និងវីដេអូរាំដើម្បីបង្រៀនដល់ក្មេងជំទង់។

អាជ្ញាធរបានរឹបអូស Flash និង​ចាប់​ខ្លួន​គ្រូបង្រៀនរូបនេះ។

ប្រទេសអាស៊ីដ៏សម្ងាត់មួយនេះ បានអនុម័តច្បាប់លុបបំបាត់គំនិត និងវប្បធម៌ប្រតិកម្មនៅចុងឆ្នាំ២០២០ ដើម្បីបង្ក្រាបការចែកចាយ និងការមើលប្រព័ន្ធផ្សព្វផ្សាយបរទេស ជាពិសេសពីប្រទេសមូលធននិយមដូចជាសហរដ្ឋអាមេរិក និងកូរ៉េខាងត្បូងជាដើម។

ជនជាតិកូរ៉េខាងជើងម្នាក់ បានប្រាប់វិទ្យុអាស៊ីសេរីប្រចាំនៅកូរ៉េថា “ក្រុមអធិការកិច្ចប្រឆាំងសង្គមនិយម បានចាប់គ្រូរបាំអាយុ៣០ឆ្នាំម្នាក់ ដែលកំពុងបង្រៀនរាំឌីស្កូបែបបរទេស ដល់សិស្សជំទង់នៅតំបន់ Yangji-dong នៃទីក្រុង Pyongsong”។

ស្ត្រីរូបនោះ មានបរិញ្ញាបត្រផ្នែកក្បាច់រាំ នៅសាកលវិទ្យាល័យសិល្បៈ Pyongsong ហើយនាងត្រូវបានចាត់តាំងឲ្យទៅបង្រៀនសិស្សនៅវិទ្យាល័យ Okchon ក្នុងទីក្រុង Pyongsong។

នាងត្រូវបានគេរាយការណ៍ថា កំពុងបើកសាលារបាំឯកជន ដើម្បីបំពេញបន្ថែមលើប្រាក់ខែដ៏តិចតួចរបស់នាង។

គួរបញ្ជាក់ថា ច្បាប់នេះ បានកំណត់ដាក់ទោសប្រហារជីវិតចំពោះបទល្មើសធ្ងន់ធ្ងរបំផុត។

ច្បាប់ដ៏តឹងរ៉ឹងនេះ ក៏ត្រូវបានប្រើប្រាស់ផងដែរដើម្បីដាក់ទណ្ឌកម្មលើអ្នកបើកបររូបណា ដែលបិទពណ៌កញ្ចក់រថយន្តរបស់ពួកគេ ឬប្រើប្រាស់ពាក្យស្លោក និងពាក្យពេចន៍តាមបែបកូរ៉េខាងត្បូង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ រឿងកម្រ! ជនជាតិកូរ៉េខាងត្បូង រត់ចោលជួរចូល កូរ៉េខាងជើង