សម្ដេចតេជោ ៖ សុវត្ថិភាពពលរដ្ឋនៅសៀមរាប កាន់តែត្រូវបានធានាពីព្រោះប្រព័ន្ធកាមេរ៉ាសុវត្ថិភាព ត្រូវបានដាក់ជាច្រើនទីតាំង  

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានលើកឡើងថា សុវត្ថិភាពរបស់ប្រជាពលរដ្ឋនៅខេត្តសៀមរាប គឺកាន់តែត្រូវបានធានាពីព្រោះប្រព័ន្ធកាមេរ៉ាសុវត្ថិភាព ត្រូវបានដាក់ជាច្រើនទីតាំង។

ការលើកឡើង របស់សម្ដេចតេជោនាយករដ្ឋមន្ត្រី បានធ្វើឡើងនៅក្នុងពិធីសម្ពោធដាក់ឲ្យប្រើប្រាស់ជាផ្លូវការនូវផ្លូវចំនួន ៣៨ខ្សែ ព្រមទាំងហេដ្ឋារចនាសម្ព័ន្ធរូបវន្តមួយចំនួនទៀត ក្នុងក្រុងសៀមរាប នៅព្រឹកថ្ងៃទី ៤ ខែមេសា ឆ្នាំ ២០២២នេះ។

នៅក្នុងឱកាសនោះសម្ដេចតេជោ ហ៊ុន សែន បានថ្លែងថា «នៅទីរួមខេត្តសៀមរាប អ្នកដែលប្រព្រឹត្តិអាណាចា ឬចោរ លួចចោរប្លន់ គួរតែត្រូវឈប់ទៅ ព្រោះសេវាកាមេរ៉ាសុវត្ថិភាពពេញណែន កុំគិតថា ជួនកាលខ្លួនទៅបំផ្លាញៗកាមេរ៉ាសុវត្ថិភាពមួយ ដើម្បីធ្វើសកម្មភាព ស្មានតែគេរកមិនឃើញ ព្រោះអានេះបាញ់ភ្ជាប់គ្នារហូតៗ»។

ជាមួយគ្នានេះសម្ដេចតេជោនាយករដ្ឋមន្ត្រី បានបង្ហាញក្ដីសង្ឃឹមថា សុវត្ថិភាពរបស់ប្រជាពលរដ្ឋនៅខេត្តសៀមរាប នឹងត្រូវបានធានាបន្ថែមទៀត តាមរយៈឧបករណ៍បច្ចេកទេសកាន់តែទំនើប ដែលធ្វើឲ្យកម្លាំងមានសមត្ថកិច្ចជាពិសេសនគរបាលជាតិ អាចបង្រ្កាបបទល្មើសនានាកាន់តែលឿនរហ័ស៕

អត្ថបទ៖ ឃួន សុភ័ក្រ