អាមេរិក ឲ្យអឺរ៉ុបចាប់ផ្ដើមដឹកប្រេងពី វ៉េណេស៊ុយអេឡា ជំនួសប្រេង រុស្ស៊ី (វីដេអូ)

ក្រុមហ៊ុនប្រេងចំនួន ២ គឺក្រុមហ៊ុន Eni SpA របស់អ៊ីតាលី និងក្រុមហ៊ុន Repsol SA របស់អេស្ប៉ាញ អាចនឹងចាប់ផ្តើមដឹកជញ្ជូនប្រេងឆៅពីប្រទេសវ៉េណេស៊ុយអេឡាទៅអឺរ៉ុបនៅខែក្រោយ បន្ទាប់ពីទទួលបានការយល់ព្រមពីក្រសួងការបរទេសសហរដ្ឋអាមេរិក ។

យោងតាមសារព័ត៌មាន Reuters បានឲ្យដឹង​ថា ​បរិមាណ​ប្រេង​ឆៅ​ដែល​នឹង​ត្រូវ​ដឹក​ជញ្ជូន​ទៅ​អឺរ៉ុប​​គឺ “មិន​ច្រើន​” នោះទេ ​ដូច្នេះហើយ​ផល​ប៉ះពាល់​លើ​តម្លៃ​ប្រេង​ពិភពលោកក៏​នឹង​មាន​កម្រិតតិចតួចផងដែរ ។

ទោះជាយ៉ាងណាក៏ដោយប្រភព ២ ផ្សេងទៀតបានឲ្យដឹងដែរថា គោលដៅមួយក្នុងចំណោមគោលដៅនៃការបង្វែរគោលដៅដឹកប្រេងនេះអាចជា “ការលួងលោមលោកប្រធានាធិបតី Nicolas Maduro ឲ្យចាប់ផ្តើមការចរចានយោបាយឡើងវិញជាមួយក្រុមប្រឆាំងរបស់វ៉េណេស៊ុយអេឡា” ។

ទន្ទឹមនោះការបង្វែរទិសដៅដឹកប្រេងនេះក៏កើតឡើង នៅពេលដែលអឺរ៉ុបចង់លុបបំបាត់ប្រេងឆៅ និងផលិតផលប្រេងរបស់រុស្ស៊ី ដោយសារការដាក់ទណ្ឌកម្មសេដ្ឋកិច្ចប្រឆាំងនឹងប្រទេស ជុំវិញប្រតិបត្តិការយោធាដែលកំពុងបន្តរបស់ទីក្រុងមូស្គូនៅអ៊ុយក្រែន ។

ស្របពេលជាមួយគ្នានេះ ប្រធានគណៈកម្មាការអឺរ៉ុបលោកស្រី Ursula von der Leyen ថែមទាំងបានសម្តែងក្តីសង្ឃឹមថា ការដាក់ទណ្ឌកម្មនេះនឹងអនុញ្ញាតឲ្យការនាំចូលប្រេងពីប្រទេសរុស្ស៊ីត្រូវបានកាត់បន្ថយចំនួន ៩០ ភាគរយនៅចុងឆ្នាំនេះ ៕

សូមទស្សនាវីដេអូ!

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ដឹងទេក្នុងមួយថ្ងៃៗ រុស្ស៊ី កើបលុយពីចំណូលប្រេងបានប៉ុន្មានលាន?