ក្រសួងយុត្តិធម៌អាមេរិក បញ្ចេញលិខិតបញ្ជាក់ ដែលឈានទៅដល់ការឆែកឆេរ លំនៅដ្ឋានលោក ត្រាំ 

ក្រសួងយុត្តិធម៌សហរដ្ឋអាមេរិក កាលពីថ្ងៃសុក្រទី២៦ខែសីហា​ បានបញ្ចេញលិខិតបញ្ជាក់ផ្លូវច្បាប់ដែលអនុញ្ញាតឲ្យ FBI រឹបអូសយកឯកសាររដ្ឋាភិបាលដែលចាត់ទុកថាសម្ងាត់ ពីលំនៅដ្ឋានរបស់អតីតប្រធានាធិបតី ដូណាល់ ត្រាំ ក្នុងរដ្ឋ Florida។

លិខិតនេះ នឹងជាការបំភ្លឺបន្ថែមលើភស្តុតាងដែលនាំទៅដល់ការឆែកឆេរ មិនធ្លាប់មានពីមុនមក។

ចៅក្រមអាមេរិក Bruce Reinhart ដែលយល់ព្រមលើដីកាឈានទៅដល់ការឆែកឆេររបស់ FBI លើលំនៅដ្ឋាន Mar-a-Lago របស់លោក ត្រាំ កាលពីថ្ងៃទី៨ខែសីហា បានបញ្ជាឲ្យបញ្ចេញលិខិតបញ្ជាក់នេះ នៅវេលាថ្ងៃត្រង់ ថ្ងៃសុក្រ​ (ពេលវេលានៅអាមេរិក)។

តើលិខិតបញ្ជាក់និយាយអ្វីខ្លះ?

លិខិតបញ្ជាក់កម្រាស់៣២ទំព័រនេះ បានចាប់ផ្តើមថា “រដ្ឋាភិបាលកំពុងធ្វើការស៊ើបអង្កេតព្រហ្មទណ្ឌ ទាក់ទងនឹងការយកចេញ និងការរក្សាទុកមិនត្រឹមត្រូវ នូវព័ត៌មានសម្ងាត់ នៅក្នុងកន្លែងដែលគ្មានការអនុញ្ញាត ក៏ដូចជាការលាក់បាំងដោយខុសច្បាប់ ឬការដកចេញនូវកំណត់ត្រារបស់រដ្ឋាភិបាលផងដែរ”។

លិខិតបញ្ជាក់បន្តថា “ការស៊ើបអង្កេតរបស់ FBI បានរកឃើញថា ឯកសារមានដាក់សញ្ញាសម្គាល់ថាសម្ងាត់ ដែលហាក់ដូចជាមានផ្ទុកព័ត៌មានការពារជាតិ (NDI) គឺស្ថិតក្នុងចំណោមសម្ភារដែលមាននៅក្នុងប្រអប់ចំនួន១៥ ហើយត្រូវបានរក្សាទុកនៅក្នុងទីតាំងដែលគ្មានការអនុញ្ញាត”។

យោង​តាម​ឯកសារ​បញ្ជាក់​នេះ, នៅ​ក្នុង​ប្រអប់​ទាំង​នោះ​ មន្ត្រី​បាន​រក​ឃើញ​​ឯកសារ​ចំនួន ១៨៤ ​ក្នុង​នោះ​មាន ២៥ ឯកសារ​ដែល​សម្គាល់​ថា​ជា​ការ​សម្ងាត់​កំពូល។ ភ្នាក់ងារដែលបានត្រួតពិនិត្យប្រអប់ ថែមទាំងបានរកឃើញព័ត៌មានរសើប អំពីអ្នកផ្តល់ព័ត៌មានរបស់រដ្ឋាភិបាល និងចារកម្មទៀតផង។

លិខិតនោះបន្ថែមថា មានហេតុផលដែលអាចជឿថា ឯកសារបន្ថែមដែលមានផ្ទុកព័ត៌មានសម្ងាត់ នៅតែមាននៅ Mar-a-Lago។ ក៏មានហេតុផលដែលអាចជឿផងដែរថា មានភស្តុតាងនៃការរាំងស្ទះនឹងត្រូវបានរកឃើញនៅ Mar-a-Lago៕

ប្រែសម្រួល៖ Vann Vann

ប្រភព៖ DW

ចុចអាន៖ លោក ត្រាំ ប្តឹងក្រសួងយុត្តិធម៌អាមេរិក ពាក់ព័ន្ធការឆែកឆេរនៅ Mar-a-Lago