ជម្រើសជាតិកម្ពុជា ស្ថិតនៅពូល A ជួប​ក្រុមខ្លាំង​ថៃ នៃពានបាល់ទាត់អាស៊ាន ឆ្នាំ២០២២

ក្រុមបាល់ទាត់ជម្រើសជាតិកម្ពុជា ត្រូវបានចាប់ឆ្នោតចូលពូល A ជាមួយក្រុមខ្លាំងថៃ ក្នុងពានរង្វាន់ជើងឯកប្រចាំតំបន់អាស៊ី​អាគ្នេយ៍ (AFF Mitsubishi Electric Cup 2022) ឆ្នាំ២០២២។

យោងតាមលទ្ធផលនៃការចាប់ឆ្នោតដែលបានធ្វើឡើងនៅរសៀលថ្ងៃទី៣០ ខែសីហា ឆ្នាំ២០២២ នេះ នាប្រទេសថៃ ក្រុមជម្រើសជាតិកម្ពុជា ត្រូវបានចាប់ឆ្នោតស្ថិតនៅពូល A ជាមួយក្រុមខ្លាំងថៃ, ហ្វីលីពីន, ឥណ្ឌូនេស៊ី និងទីម័រខាងកើត ឬក៏ព្រុយណេ (២ក្រុមនេះត្រូវប្រកួតជម្រុះសិន)។ ខណៈពូល B វិញមានវៀតណាម, ម៉ាឡេស៊ី, សិង្ហបុរី, មីយ៉ាន់ម៉ា និងឡាវ។

ក្រោយការចាប់ឆ្នោតនេះរួច ការប្រកួតនឹងធ្វើឡើងពីថ្ងៃទី២៣ ខែធ្នូ ឆ្នាំ២០២២ ដល់ថ្ងៃទី១៥ ខែមករា ឆ្នាំ២០២៣ ក្រុមលេខ១ និងលេខ២ បានឡើងទៅវគ្គពាក់កណ្ដាលផ្ដាច់ព្រ័ត្រ។ ចំពោះការបែងចែកជា ២ ពូល ក្នុងមួយពូលមាន ៥ ក្រុម​នេះ ក្រុមនីមួយៗលេង ២ ប្រកួតក្នុងដី និង ២ ប្រកួតក្រៅដី។

បន្ទាប់មកក្រុមកំពូលទាំងពីរ នៃពូលនីមួយៗនឹងឈានទៅវគ្គជម្រុះចាញ់ធ្លាក់ ដែលមាន២ជើង គឺវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ៕

អត្ថបទ៖ មន្នីរ័ត្ន