គ្រោះរញ្ជួយដីដ៏ខ្លាំងក្លា កំពុងវាយប្រហារប្រទេស ប៉ាពួញូវហ្គីណេ (មានវីដេអូ)

តាមសេចក្តីរាយការណ៍​បញ្ជាក់​ថា ការរញ្ជួយដីកម្រិត ៧.៦ រ៉ិចទ័រ បានវាយប្រហារតំបន់ភាគ​ខាងកើត New Guinea ក្នុងប្រទេស ប៉ាពួញូវហ្គីណេ និង​​បំផ្លាញទ្រព្យសម្បត្តិ ហើយថែម​ធ្វើឲ្យ​ពលរដ្ឋ​ភ័យ​ស្លន់ស្លោខ្លាំងទៀតផង។

ទីភ្នាក់ងារ​ស្ទាបស្ទង់​ភូមិសាស្ត្រ​សហរដ្ឋអាមេរិក បាន​និយាយថា ការរញ្ជួយដី​បានវាយប្រហារ​នៅ​ជម្រៅ ៦១គីឡូម៉ែត្រ​ ឬ ប្រហែល៦៧ គីឡូម៉ែត្រ ពីទីក្រុង Kainantu ភាគខាងកើតកាល​ពីព្រឹកមិញនេះ។

ប្រព័ន្ធព្រមានរលកយក្សស៊ូណាមិរបស់សហរដ្ឋអាមេរិក​ បានចេញការព្រមានអំពីរលកយក្សស៊ូណាមិ ប៉ុន្តែក្រោយមកក៏និយាយថា ការគំរាមកំហែង “បានកន្លងផុតទៅហើយ” ។ ប៉ុន្តែទោះជាយ៉ាងណា គេ​បានកត់សម្គាល់ឃើញថា នៅតែមាន ការប្រែប្រួលកម្រិត​ទឹកសមុទ្រតិចតួច​ នៅក្នុងតំបន់ឆ្នេរមួយចំនួន។

យ៉ាងណាមិញ នៅពុំ​​​ទាន់​មាន​សេចក្ដី​រាយការណ៍​ភ្លាមៗ​អំពី​អ្នក​ស្លាប់​និង​របួស​នោះ​ទេ។ ខណៈអ្នកស្រុក ប៉ាពួញូវហ្គីណេបានយកបណ្តាញសង្គមចែករំលែករូបភាព និងវីដេអូនៃផ្លូវបំបែក អគារ និង​រថយន្ត​ដែលរងការខូចខាត និងរបស់របរដែលធ្លាក់ពីលើធ្នើរផ្សារទំនើប។

វីដេអូ​នៃ​ការ​ខូច​ខាត​របស់​សាកល​វិទ្យាល័យ​មួយ​ក្នុង​ទីប្រជុំជន Goroka ភាគ​ខាង​កើត​បាន​បង្ហាញ​ស្នាម​ប្រេះ​ធំៗ​ដែល​លេច​ឡើង​នៅ​តាម​ជញ្ជាំង និង​បង្អួច​ដែល​ធ្លាក់​ក្នុង​កំឡុង​ពេល​រញ្ជួយ​ដី។​ អ្នកស្រុកនៅ Lae និង Madang ដែលនៅជិតចំណុចកណ្តាលនៃគ្រោះរញ្ជួយដី បានប្រាប់ទីភ្នាក់ងារ​សារព័ត៌មាន AFP ថា ការរញ្ជួយគឺខ្លាំងជាងការរញ្ជួយដីមុនៗ។

គួរបញ្ចាក់ថា ការរញ្ជួយដីគឺជារឿងធម្មតានៅក្នុងប្រទេសប៉ាពួញូវហ្គីណេ ដែលស្ថិតនៅលើចិញ្ចៀនភ្លើង នៃមហាសមុទ្រប៉ាស៊ីហ្វិក ជាចំណុចក្តៅសម្រាប់សកម្មភាពរញ្ជួយដី ដោយសារការកកិតរវាងបន្ទះផែនដី។ ទន្ទឹមនោះដែរ ការរញ្ជួយដីកម្រិត ៧.៥ រិចទ័រ បានអង្រួនតំបន់ភ្នំដាច់ស្រយាលរបស់ប្រទេសកាលពីឆ្នាំ ២០១៨ ដោយបានសម្លាប់មនុស្សជាង១០០ នាក់ និងបំផ្លាញផ្ទះរាប់ពាន់ខ្នងថែមទៀត៕

សូមទស្សនាវីដេអូ

ប្រែសម្រួល៖ សាង ស្រីល័ក្ខ

ប្រភព៖Reuters

ចុចអាន៖ភាគខាងកើត ឥណ្ឌូណេស៊ី ជួបគ្រោះរញ្ជួយដីខ្លាំងក្លាកម្រិត ៦.២ រ៉ិចទ័រ