ភ្ញាក់ផ្អើល! រកឃើញសំបុកពីងពាងអាចទ្រចាបមួយក្បាល ដោយមិនដាច់រហែក

កាលពីថ្ងៃទី១៣ ខែកញ្ញា ឆ្នាំ២០២២ លោក Arty Schronce អ្នកជំនាញខាងធម្មជាតិ គាត់បានប្រទះឃើញសត្វស្លាបមួយក្បាលជាប់អន្ទាក់សំបុកពីងពាងពណ៌មាសនៅក្រៅបង្អួចរបស់គាត់។ ដោយសារតែការចាប់អារម្មណ៍ចំពោះព្រឹត្តិការណ៍នោះលោក Arty ក៏សម្រេចចិត្តទៅមើលឲ្យជិតទើបដឹងថា​​ ចាបនោះមិនមែនជាប់អន្ទាក់ទេគ្រាន់តែឈរលើសំបុកពីងពាង Trichonephila clavata ប៉ុណ្ណោះ។

បន្ទាប់ពីម្ចាស់សំបុកភ័យពេករត់បាត់ស្រមោល សត្វចាបក៏ចឹកស៊ីសត្វល្អិតតូចៗដែលជាប់សំបុកខ្លះ រួចហើរទៅបាត់ទៅ។ សាច់រឿងនេះមានរយៈពេលប្រហែលតែ ២នាទីទេ ប៉ុន្តែលោក Arty សង្ស័យថាប្រាកដជាមានអ្វីពិសេសហើយទើបគាត់ទៅពិនិត្យមើលម្ដងទៀតនៅថ្ងៃស្អែក ឃើញថាពីងពាងនៅទីនោះដដែលជាមួយនឹងសំបុកដ៏រឹងមាំមិនដាច់រហែករបស់វា។ លោក Andy Davis ជាអ្នកជំនាញពីងពាងនៅសាកលវិទ្យាល័យ Georgia លាន់មាត់ “វាពិតជាអស្ចារ្យមែន” ចំពោះព្រឹត្តិការណ៍ចាបឈរលើសំបុកពីងពាងនេះ។ សត្វចាបខាងលើជាប្រភេទសត្វចាប Cardinals មានទម្ងន់ប្រហែល ៤៩ក្រាម មានន័យថាសំបុកពីងពាងនោះអាចទ្រទ្រង់ទម្ងន់យ៉ាងហោចណាស់ ៦៩ក្រាម គឺច្រើនជាងសំបុកពីងពាងធម្មតា។

លើសពីនេះគេដឹងថា សត្វចាបប្រភេទ Cardinals មិនមែនជាប្រភេទសត្វចូលចិត្តលួចអាហាររបស់អ្នកដទៃទេ ព្រោះវាចំណាយពេលប្រមាញ់យូរៗណាស់ ដូច្នេះហើយព្រឹត្តិការណ៍លើកនេះវាពិសេសជាងរាល់ដងបន្តិច ដោយសារតែអាកប្បកិរិយារបស់វាជារឿងថ្មីសម្រាប់អ្នកស្រាវជ្រាវ៕

ប្រែសម្រួលដោយ៖ វារី

ចុចអាន៖ ពីងពាង ក្នុងក្ដីសុបិន ជាសារសំខាន់រំលឹកឲ្យប្រយ័ត្នខ្លួន