ប្រទេសណាខ្លះ ដែលអាចទូទាត់ឆ្លងដែន​ជាមួយកម្ពុជា?

កម្ពុជា បានពង្រីក​ប្រព័ន្ធប្រតិបត្តិការទូទាត់ឆ្លងដែន តាមរយៈការស្កេន QR Code ឬ KH QR ជាមួយប្រទេសថៃ និងម៉ាឡេស៊ី ខណៈ​បាននិងកំពុងពង្រីកការអភិវឌ្ឍប្រព័ន្ធទូទាត់ឆ្លងដែន ជាមួយប្រទេសចំនួន៦បន្ថែមទៀត រួមមាន ប្រទេសវៀតណាម, ឡាវ, មីយ៉ាន់ម៉ា, ចិន ឥណ្ឌា និង​ Rwanda ដើម្បីជំរុញការប្រើប្រាស់រូបិយវត្ថុក្នុងស្រុក ជំនួស​ប្រាក់ដុល្លារក្នុងពាណិជ្ជកម្ម និងការវិនិយោគរវាងបណ្តាប្រទេសដៃគូពាណិជ្ជកម្ម។

សម្រាប់កម្ពុជា​ និងថៃ បានដាក់ឲ្យប្រើប្រាស់​នូវ​ប្រព័ន្ធប្រតិបត្តិការទូទាត់ឆ្លងដែន តាមរយៈការស្កេន QR  Code បានជាងរយៈពេល៣ឆ្នាំហើយ ពោលចាប់ពីខែកុម្ភៈ ឆ្នាំ២០២០មក។​​ ការដាក់ឱ្យដំណើរការនូវប្រព័ន្ធឌីជីថលនេះ បានធ្វើឲ្យអ្នកប្រើប្រាស់អេស៊ីលីដាម៉ូបាលនៅកម្ពុជា អាចស្កេនទូទាត់​ប្រាក់នៅប្រទេសថៃ បានរហូតដល់៥២លានរៀល​នៅក្នុងមួយថ្ងៃ។  ដោយឡែកពេលពលរដ្ឋថៃ មកកម្ពុជា អាចទូទាត់ចំណាយនានា តាមរយៈការស្កេនលើ KHQR នៃពាណិជ្ជកររបស់ធនាគារដែលជាសមាជិករបស់បាគង( Bakong)។ ចំណេកកម្ពុជា និង​ម៉ាឡេស៊ី បានប្រកាស​ដាក់ឱ្យ​ដំណើរការ​ជា​ផ្លូវការ​នូវ​ការទូទាត់​ឆ្លងដែន​ តាមរយៈ​ប្រព័ន្ធ​បាគង​របស់​ធនាគារជាតិ​នៃ​កម្ពុជា (NBC) ​ជាមួយ​ធនាគារ​ Maybank កាលពីឆ្នាំ ២០២១ ដែល​អនុញ្ញាត​ឱ្យ​មានការ​ផ្ទេរប្រាក់​រវាង​ប្រទេស​ទាំង​ ២ កាន់តែ​រហ័ស ងាយស្រួល និង​ទទួលបាន​ភ្លាមៗ​។

លោកស្រី ជា សិរី ទេសាភិបាលរងធនាគារជាតិនៃកម្ពុជា ​បានលើកឡើងថា កម្ពុជាបានតភ្ជាប់ជាមួយប្រទេសថៃ និងម៉ាឡេស៊ី ដោយប្រជាជនកម្ពុជា អាចស្កេនទូទាត់នៅប្រទេសទាំងពីរនេះ ចេញពីគណនីលុយរៀលរបស់ខ្លួន​នៅកម្ពុជាបាន ហើយប្រជាជនថៃ និងម៉ាឡេស៊ី ក៏អាចស្កេនទូទាត់ជាប្រាក់រៀលនៅកម្ពុជាផងដែរ។

លោកស្រី បន្តដូច្នេះថា «យន្តការនេះតម្រូវឱ្យអ្នកទិញ និងអ្នកលក់ មានគណនីជាប្រាក់រៀល ដោយនេះក៏ជាកត្តាជំរុញ​ការប្រើប្រាស់ប្រាក់រៀលនៅកម្ពុជាផងដែរ»។

លោកស្រី ជា សិរី បានបន្ថែមថា ធនាគារជាតិនៃកម្ពុជា ក៏បាននិងកំពុងបង្កើនកិច្ចសហការជាមួយប្រទេសជាច្រើនទៀត នៅក្នុងតំបន់អាស៊ី ក៏ដូចជាទៅប្រទេស អាហ្វ្រិក អាមេរិកឡាទីន និងអឺរ៉ុបជាដើម ដើម្បីបង្កើនវិសាលភាព ក្នុងការប្រើ​ប្រាស់​ប្រព័ន្ធទូទាត់ដែលមានសុវត្ថិភាព ចំណាយទាប និងទទួលបានប្រាក់ឆាប់រហ័ស សំដៅគាំទ្រ និងជំរុញវិស័យ​ទេសចរណ៍ ការវិនិយោគ ពាណិជ្ជកម្ម និងការផ្ទេរប្រាក់របស់ប្រជាជនខ្មែរ ជាពិសេសពលករដែលកំពុង​បម្រើការនៅ​ក្រៅប្រទេស។

សូមបញ្ជាក់ថា បច្ចុប្បន្ន ធនាគារ ដែលជាសមាជិកបាគងរបស់ធនាគារជាតិនៃកម្ពុជា (NBC) មានចំនួន ៤៨ស្ថាប័ន នៅទូទាំងប្រទេស៕