តម្លៃហាងឆេងមាស​ បន្តបំបែកកំណត់ត្រាថ្មី សឹងតែរាល់ថ្ងៃ

អ្នកជំនាញនៅក្នុងវិស័យហិរញ្ញវត្ថុបានអះអាងថា តម្លៃហាងឆេងមាសបានបន្តហក់ឡើងបំបែកកំណត់ត្រាថ្មីសឹងតែរាល់ថ្ងៃ នៅក្នុងសប្ដាហ៍នេះ ដោយសារតែកត្តាភូមិសាស្ត្រនយោបាយ ស្ថានភាពសេដ្ឋកិច្ច និងការកាត់បន្ថយ​អត្រាការ​ប្រាក់នៅអាមេរិក​​​។

លោក ឡុង សំណាង ​ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន ​PP Link securities​ប្រាប់កម្ពុជាថ្មីនៅថ្ងៃទី ២៦ ខែកញ្ញា ឆ្នាំ ២០២៤នេះថា តម្លៃហាងឆេងមាសបានហក់ឡើងខ្ពស់ ដោយសារសន្ទស្សន៍​លុយដុល្លារ​អាមេរិក​​ធ្លាក់ចុះ ធ្វើឱ្យតម្លៃហាងឆេងមាសហក់ឡើង។

អ្នកជំនាញរូបនេះ បញ្ជាក់ថា កត្តាមួយទៀត អត្រាការប្រាក់របស់សហរដ្ឋអាមេរិក ធំជាងគេ ដែល​ធ្វើឱ្យលុយដុល្លាររបស់អាមេរិកធ្លាក់ចុះ ដែលធ្វើឱ្យទំនុកចិត្តអ្នកវិនិយោគលែងកាន់​លុយ​ដុល្លារ ទៅវិនិយោគលើភាគហ៊ុនផ្សេងៗ។

លោក ឡុង សំណាង បញ្ជាក់ថា៖ «ខ្ញុំគិតថា នៅក្នុងឆ្នាំ ២០២៤ តម្លៃមាស​នៅតែ​បន្ត​កើនឡើង​រហូត ដោយសារតែភូមិ​សាស្ត្រនយោបាយ ដោយសារស្ថានភាព​សេដ្ឋកិច្ច ដោយ​សារ​អត្រា​ការ​ប្រាក់ រួមចំណែកការបោះឆ្នោតនៅអាមេរិកផង»។

នៅយប់ថ្ងៃទី ២៥ ខែកញ្ញា តម្លៃហាងឆេងមាសបានឡើងដល់ ២៦៧០ ដុល្លារក្នុងមួយអោន នៅលើទីផ្សារអន្តរជាតិ ឬស្មើនឹង ៣ ២១៦ ដុល្លារក្នុងមួយតម្លឹង។

សម្រាប់ហាងឆេងក្នុងស្រុក នៅថ្ងៃទី ២៦ ខែកញ្ញា ឆ្នាំ ២០២៤ ហាងលក់មាស ដារ៉ា-ជាងរ៉ា លក់ចេញ ៣១៨ ដុល្លារក្នុងមួយជី៕

អត្ថបទ៖ ឡេង ដេត