លោក ជួន ណារិន្ទ៖ កត្តាធំចំនួន៣ ដែលបង្កឲ្យមានគ្រោះថ្នាក់ចរាចរណ៍ញឹកញាប់ក្នុងភូមិ​សាស្ត្រ​រាជធានីភ្នំពេញ

លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនៃស្នងការដ្ឋាននគរបាលរាជធានីភ្នំពេញ កាលពីថ្ងៃទី៣ ខែមីនា ឆ្នាំ២០២៥ បានលើកឡើងថា ករណីគ្រោះថ្នាក់ចរាចរណ៍ដែលកើតឡើងជាញឹកញាប់នៅក្នុងភូមិសាស្ត្ររាជធានីភ្នំពេញ គឺកើតឡើងដោយសារកត្តាចម្បងធំៗចំនួន៣។ បើតាមលោក ជួន ណារិន្ទ កត្តាចម្បងធំៗចំនួន៣នោះរួមមាន កត្តាបើកបរមិនគោរពល្បឿន កត្តាមិនគោរពសិទ្ធិ និងកត្តាបើកបរក្នុងស្ថានភាពស្រវឹង។

លោកស្នងការបញ្ជាក់ថា កត្តាធំៗទាំង៣នេះ បានកើតឡើងជាញឹកញាប់នៅក្នុងភូមិសាស្រ្តរាជធានីភ្នំពេញដែលបណ្ដាលឲ្យមានមនុស្សស្លាប់ជាច្រើន ជាពិសេសនៅដើម២០២៥នេះ ករណីគ្រោះថ្នាក់ចរាចរណ៍មានការកើនឡើងជាង៧០​ភាគរយ គឺកើតឡើងនៅពេលរាត្រី។

ជាមួយនឹងការកើនឡើងនៃករណីគ្រោះថ្នាក់ចរាចរណ៍នេះ លោកក៏បានដាក់បទបញ្ជាដល់អធិការខណ្ឌទាំង១៤ និងប៉ុស្តិ៍រដ្ឋបាលទាំង១០៥ ក្នុងរាជធានីភ្នំពេញ បន្តយកយន្តការផ្សព្វផ្សាយអប់រំ ការយល់ដឹងពីច្បាប់ចរាចរណ៍ឲ្យបានច្រើនដល់ទីសាធារណៈ ក៏ដូចជាសាលារៀនឲ្យសិស្សានុសយុវជនបានយល់ពីច្បាប់ចរាចរណ៍ដើម្បីចូលរួមគោរពច្បាប់ចរាចរណ៍ទាំងអស់គ្នា និងឈានទៅដល់ការកាត់បន្ថយគ្រោះថ្នាក់ចរាចរណ៍៕

អត្ថបទ៖ សុភា