ចិន អង្វរករមីយ៉ាន់ម៉ា សូមឈប់បាញ់លើក្បួនដឹកជំនួយ យកទៅជួយជនរងគ្រោះរញ្ជួយដី

ប្រទេសចិនបានអង្វរករដល់ភាគីទាំងអស់នៅក្នុងប្រទេសមីយ៉ាន់ម៉ា សូមឈប់បាញ់ប្រហារលើក្បួនដែលដឹកជំនួយសង្គ្រោះបន្ទាន់យកទៅជួយជនរងគ្រោះដោយរញ្ជួយដី តទៅទៀត។ នេះបើតាមការចុះផ្សាយរបស់ Xinhua។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងសន្និសីទកាសែតកាលពីថ្ងៃពុធទី២ខែមេសាឆ្នាំ២០២៥ អ្នកនាំពាក្យក្រសួងការពារជាតិចិនលោក Guo Jiakun និយាយថា រដ្ឋាភិបាលទីក្រុងប៉េកាំង សូមអំពាវនាវដល់ភាគីទាំងអស់នៅក្នុងប្រទេសមីយ៉ាន់ម៉ា ត្រូវធានាសុវត្ថិភាពដល់កម្មករសង្គ្រោះរញ្ជួយដី និងក្បួនដឹកគ្រឿងជំនួយពីរដ្ឋចិន និងប្រទេសផ្សេងទៀត ខណៈជំនួយដែលផ្តល់ដោយកាកបាទក្រហមចិន បានទៅដល់ប្រទេសមីយ៉ាន់ម៉ាហើយ និងកំពុងធ្វើដំណើរទៅកាន់តំបន់រងគ្រោះដោយគ្រោះមហន្តរាយនៅទីក្រុង Mandalay។

ការអង្វរកររបស់ចិន កើតឡើងមួយថ្ងៃបន្ទាប់ពីមានសេចក្តីរាយការណ៍ថា កងកម្លាំងរបបយោធានៅភាគខាងជើងរដ្ឋ Shan បានវាយប្រហារលើក្បួនរថយន្តជំនួយសង្គ្រោះ​​​​​​របស់​ចិន។

យោងតាមប្រភពពីកងទ័ពរំដោះជាតិតាអាំង (TNLA), ក្បួន​រថយន្តជំនួយមនុស្សធម៌ដែលមានរថយន្តចំនួន៩​គ្រឿងរៀបចំដោយកាកបាទក្រហមចិន ត្រូវបានវាយប្រហារដោយកងកម្លាំងរបបយោធាកាលពីយប់ថ្ងៃអង្គារនៅក្នុងភូមិ Ommathi សង្កាត់ Nawnghkio ភាគខាងជើងរដ្ឋ Shan។​

ក្រោយរងការវាយប្រហារ ក្បួន​រថយន្តត្រូវ​បង្ខំចិត្តវិល​ត្រឡប់​ទៅ​ក្រុង Nawnghkio ​ដែល​គ្រប់គ្រង​ដោយ TNLA វិញ។

កាលពីដើមសប្តាហ៍នេះដែរ លោក មីន អ៊ុងឡាំង ​បានបញ្ជាឲ្យកងទ័ពមីយ៉ាន់ម៉ា បើកការវាយប្រហារអាកាសនៅក្រុង Salin នៃតំបន់ Magway និងក្រុង Singu នៃតំបន់ Mandalay បណ្តាលឲ្យជនស៊ីវិលជាង៤០នាក់ស្លាប់ រួមមានទាំងកុមារផងដែរ។ លើសពីនេះក៏មានការវាយប្រហារលើភូមិចំនួន២នៅក្រុង Nawnghkio ភាគខាងជើងរដ្ឋ Shan បណ្តាលឲ្យជនស៊ីវិល៥នាក់រងរបួស និងខ្ទេចអស់ផ្ទះ២ខ្នងទៀតផង។

សូមជម្រាបថា យោងតាមសមាគម​សំឡេង​ប្រជាធិបតេយ្យ​ភូមា​ (DVB) គិតត្រឹមព្រឹកថ្ងៃព្រហស្បតិ៍ទី៣ខែមេសាឆ្នាំ២០២៥ តួលេខមនុស្សស្លាប់ដោយសារគ្រោះរញ្ជួយដីកម្រិតធ្ងន់៧.៧រ៉ិចទ័រដ៏សាហាវ បានកើនឡើងដល់ ៣ ៨៦៦នាក់ហើយ ខណៈ ៥ ៤៥៥នាក់របួសនិង៧១៩នាក់បាត់ខ្លួន៕

អត្ថបទ៖ សុខ សុវណ្ណ

ចុចអាន៖ កងកម្លាំងរបបយោធា វាយប្រហារ​លើ​ក្បួនរថយន្តជំនួយមនុស្សធម៌ចិន​​