លោក Honda, កីឡាករច្រើន​នាក់បានផ្ញើសារយ៉ាង​ក្រៀមក្រំបំផុត ពីមរណភាពរបស់ ទេស សម្បត្តិ

អតីតគ្រូបង្វឹកជម្រើសជាតិកម្ពុជា លោក Keisuke Honda និងកីឡាករបាល់ទាត់ជាច្រើន​នាក់​បានផ្ញើសារយ៉ាងក្រៀមក្រំ ក្រោយទទួលបានដំណឹងមរណភាពរបស់ខ្សែការពារក្លិប វិសាខា និងជម្រើសជាតិកម្ពុជា កីឡាករ ទេស សម្បត្តិ។

វាជាការសោកស្តាយមែនទែន ដែលនៅថ្ងៃ ចន្ទ ទី ២១ ខែ មេសា នេះ កម្ពុជា បានបាត់បង់កីឡាករ ទេស សម្បត្តិ ដែលជាធនធានដ៏ល្អរបស់បាល់ទាត់កម្ពុជា បន្ទាប់ពីរូបគេបានទទួលមរណភាព ដោយសារ​គ្រោះ​ថ្នាក់​ចរាចរណ៍​ធ្លាក់​ចូល​ទឹកស្ទឹង សាក់សំពៅ ដែលមានទីតាំងស្ថិតនៅ ភូមិកំរៃ​ សង្កាត់សាក់សំពៅ​ ខណ្ឌដង្កោ​ រាជធានីភ្នំពេញ បន្ទាប់ពីជិះម៉ូតូមួយគ្រឿងម៉ាក Honda ADV ពណ៌ខ្មៅ​ ពាក់ផ្លាកលេខ​ ភ្នំពេញ​ 1KY-4937​ ​នៅ​យប់ថ្ងៃអាទិត្យ ទី ២០ ខែ​មេសា​ ប៉ុន្តែទើបប្រទះឃើញសពនៅព្រឹកមិញនេះ។

ក្រោយទទួលបានដំណឹងមរណភាពនេះ លោក Keisuke Honda និងកីឡាករបាល់ទាត់ជាច្រើនបានផ្ញើសារយ៉ាងតក់ស្លុត និងសឹងតែទទួលយកពុំបានអំពីរឿងនេះ។ ខាងក្រោមនេះ គឺជាសាររបស់លោក Honda និងកីឡាករកម្ពុជាមួយចំនួន៖

លោក Honda៖ «សម្បត្តិ អ្នកបានស្លាប់ទាំងវ័យក្មេងណាស់ ខ្ញុំសឹងតែមិនអាចជឿបានទេ»។

កីឡាករចាន់ វឌ្ឍនាកា ៖«បងមិនដឹងនិយាយយ៉ាងដូចម្ដេចទេ ហែងចង់សុីធុរ៉េនអត់ចេះបកបងបកអោយបាន តែហែងអត់ចេះហែលទឹកបងមិនដឹងជួយហែងម៉េចទេ ហែងតែងតែនិយាយគ្រប់រឿងដែលមិនហ៊ាននិយាយប្រាប់អ្នកណាមកប្រាប់បង តើវាជាការពិតទេដែលហែងទៅមិនបានមកលាបងមួយម៉ាត់ បងទទួលមិនបានទេ។ សូមអោយឯងទៅអោយបានសុខប្អូនសម្លាញ់»។

សៀង ចន្ធា ៖ «លឿនពេកហើយសម្លាញ់។ សូមឱ្យវិញ្ញាណក្ខន្ធសម្លាញ់ទៅកាន់សុគតិភព»។

សារ ទី៖ «ប្អូនទទូលយកមិនបានទេបងប្រុសហេតុអ្វីទៅបង»។

លឹម ពិសុទ្ធ៖ «លឿនពេកហើយបង។ សូមឱ្យវិញ្ញាណក្ខន្ធបងទៅកាន់សុគតិភព»។

Nick Taylor៖ «សូមទៅកាន់សុគតិភពប្អូនប្រុស… ខ្ញុំកំពុងស្វែងរកពេលវេលាជួបអ្នកឆាប់ៗ។ សូមព្រះប្រទានពរដល់វិញ្ញាណក្ខន្ធរបស់អ្នក»។

អត្ថបទ៖ សេម កុសល