ដីព្រៃលិចទឹកជុំវិញបឹងចំនួន ២​ កន្លែង ប្រមាណ​ជា ៤ ហិកតា ត្រូវបានឈូសឆាយទន្ទ្រានយកជាកម្មសិទ្ធិ

ដីព្រៃលិចទឹកនៅជុំវិញបឹងចំនួន ២ កន្លែងមានទំហំប្រមាណជា ៤ហិកតា  ក្នុងឃុំជ្រោយបន្ទាយ ស្រុកព្រែកប្រសព្វ ខេត្តក្រចេះ ត្រូវបានគេឈូសឆាយហ៊ុំពទ្ឋ័យកធ្វើជាកម្មសិទ្ធិ ។

យោងតាមប្រភពព័ត៌មានបានឲ្យដឹងថា ដីព្រៃលិចទឹកដែលជាជម្រកត្រីពងកូននៅជុំវិញបឹងចំនួន ២ កន្លែង គឺ បឹងក្បាលក្របី និងបឹងច្រកខ្ទែង ត្រូវបានគេឈូសឆាយហ៊ុំព័ទ្ធយកធ្វើស្រែ និងពង្រីកកាយប្រឡាយផ្លូវទឹកនៅក្នុងបឹង ខុសពីប្រឡាយ​ប្រព័ន្ធទឹក ដែលប្រជាពលរដ្ឋបានប្រើប្រាស់ពីដើមមក និងធ្វើឲ្យប៉ះពាល់ទៅដល់ជម្រកត្រីពងកូនទៀតផង។

ដីព្រៃលិចទឹកនៅតំបន់នោះត្រូវបានគេកាយ និងលើកភ្លឺស្រែពង្រួសស្រូវមួយចំនួន ហើយខ្លះទៀតបានចាក់ដីលុបនៅ មិនទាន់បង្កបង្កើនផលនៅឡើយ ក្រោយពីមានការរាយការណ៍ទៅអាជ្ញាធរមូលដ្ឋាន ក៏បានហៅប្រជាពលរដ្ឋនិងអ្នកពាក់ព័ន្ធ ដែលបានឈូសឆាយដីនោះទៅធ្វើការណែនាំ និងធ្វើកិច្ចសន្យាបញ្ឈប់ការទន្ទ្រានយកដីព្រៃទឹកនៅតំបន់នោះ។

ជាក់ស្ដែង នៅថ្ងៃទី១២ ខែឧសភា អាជ្ញាធរស្រុកព្រែកប្រសព្វ និងមន្ត្រីជំនាញខណ្ឌរដ្ឋបាលជលផលក្រចេះ ​នាយផ្នែករដ្ឋបាលជលផលព្រែកប្រសព្វ អាជ្ញាធរមូលដ្ឋាន និងសហគមន៍នេសាទចុះទៅត្រួតពិនិត្យមើលជាក់ស្តែងជាលើកទី២ នូវការឈូសឆាយទន្ទ្រានដីព្រៃលិចទឹក ធ្វើជាកម្មសិទ្ធិ​ទាំង ២ ទីតាំងនោះ។

ក្នុងកាចុះពិនិត្យជាក់ស្តែង មន្ត្រីជំនាញអះអាងថា នៅបឹងក្បាលក្របីមានការកាយស្រះចំនួន ៧ ហើយដីកំពុងអាស្រ័យ​ផល​ស្រូវទំហំប្រមាណជា ២ ហិកតា។ រីឯបឹងច្រកខ្ទែងវិញ មានដីស្រែ ចាប់ពីខាងលិចប្រឡាយដងធ្នស់ រហូតដល់ទួលផ្គូវ ស្ថិតនៅជាប់នឹងមាត់បឹងច្រកខ្ទែង គឺមានស្រះសម្រាប់បូមទឹកដាក់ស្រែចំនួន ១ ប្រវែង ៥០ ម៉ែត្រ និងមានការ​ឈូស​ឆាយ​​ដីមាត់បឹងធ្វើស្រែទំហំប្រហែល ២ ហិកតា ហើយមន្ត្រីជំនាញក៏បានយកនិយាមកា ចំនួន ១០ ចំណុចដើម្បីធ្វើផែនទី និងមានកាយក្រវ៉ាត់រំលោភយកដីបឹង ប្រវែងប្រហែល ១៥០ ម៉ែត្រ បន្ថែមទៀតផងដែរ។

ពាក់ព័ន្ធបញ្ហានេះ លោក ប៉ិច ងន់ស្រ៉ឺ មេឃុំជ្រោយបន្ទាយ បានឱ្យដឹងថា ដីតំបន់នោះបានចុះបញ្ជីអស់ហើយ ប៉ុន្តែមិនទាន់បានប័ណ្ណកម្មសិទ្ធិ។ ដោយឡែករឿងផ្សេងទៀត លោកសុំមិនអត្ថាធិប្បាយទេរង់ចាំក្រុមការងារថ្នាក់ខេត្តសម្រេចយ៉ាង​ម៉េចទើបលោកហ៊ាននិយាយ៕

អត្ថបទ៖ ប្រុញ វិធិន