ថៃទម្លាក់ការព្យាករកំណើនសេដ្ឋកិច្ចទាបបំផុតត្រឹម ១,៣%​

ប្រទេសថៃបានបន្ទាបការព្យាករ​របស់ខ្លួនសម្រាប់កំណើនសេដ្ឋកិច្ចនៅឆ្នាំនេះ ដោយសារសង្គ្រាមពាណិជ្ជកម្ម​ពិភពលោកកាត់បន្ថយការវិនិយោគឯកជន និងការនាំចេញ ​ចំពេលដែលការប្រើប្រាស់ក្នុងស្រុកខ្សោយរួចស្រាប់ទៅហើយ។ នេះបើតាមការចុះផ្សាយរបស់សារព័ត៌មាន​ Bloomberg។

ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ (NESDC) បាន​ឱ្យដឹងកាលពីថ្ងៃចន្ទថា ផលិតផលក្នុងស្រុកសរុប(GDP) របស់​ថៃ នឹងកើនឡើងត្រឹមចន្លោះពី ១,៣-២,៣ ភាគរយ ក្នុងឆ្នាំ ២០២៥ ​ដោយនេះរាប់ទាំងផែនការវិធានការជំរុញសេដ្ឋកិច្ចរបស់ថៃ។

ការព្យាករចុងក្រោយនេះ ទាបជាង​អត្រា ២,៣-៣,៣ ភាគរយ ក្នុងការព្យាករ​កាលពីលើកមុន ហើយវាប្រហាក់ប្រហែលនឹង​ការ​ព្យាករ​របស់​​ធនាគារកណ្ដាល​ថៃ ធនាគារ​ពិភពលោក និង​មូលនិធិ​រូបិយវត្ថុ​អន្តរជាតិ។

ប្រសិនបើកំណើន GDP ឈានដល់ចំណុចពាក់កណ្តាលនៃការព្យាករ​ នោះវានឹងជាការធ្លាក់ចុះនៃកំណើនធំបំផុតរបស់​ថៃ រាប់ចាប់តាំងពីវិបត្តិកូវីដ១៩។ ​ប្រធាន NESDC លោក Danucha Pichayanan បាននិយាយថា វាអាចចំណាយពេលប្រហែល ២ ឆ្នាំ ​ដើម្បីឱ្យសេដ្ឋកិច្ច​ឡើងវិញពីផលប៉ះពាល់នៃពន្ធគយ ៣៦ ភាគរយ របស់សហរដ្ឋអាមេរិក និងការធ្លាក់ចុះនៃពាណិជ្ជកម្មសកល។

NESDC បាននិយាយ​ក្នុងសេចក្តីថ្លែងការណ៍​ថា​៖ «កំណើនសេដ្ឋកិច្ចនៅតែមានការរាំងស្ទះដោយបំណុលគ្រួសារ និង​សាជីវកម្មខ្ពស់ ហើយវាត្រូវបានគេរំពឹងថា កំណើនសេដ្ឋកិច្ចនឹង​ចុះខ្សោយនៅក្នុងឆមាសទី ២ នៃឆ្នាំនេះ បន្ទាប់ពីការធ្លាក់ចុះនៃសេដ្ឋកិច្ច និងពាណិជ្ជកម្មពិភពលោក និងផលប៉ះពាល់នៃវិធានការ​ពាណិជ្ជកម្មបែបការពារនិយម»។

គួរគូសបញ្ជាក់ថា ថៃ ដែលជាប្រទេសមាន​សេដ្ឋកិច្ចធំទី២របស់អាស៊ីអាគ្នេយ៍ កំពុងស្ថិតនៅក្នុងដំណាក់កាលចរចាពន្ធ ៣៥ ភាគរយ ជាមួយ​សហរដ្ឋអាមេរិក ដែលជាទីផ្សារនាំចេញដ៏សំខាន់របស់ខ្លួន។ កាលកំណត់នឹងផុតនៅដើមខែកក្កដា ខាងមុខនេះ៕

​