សេដ្ឋកិច្ច

តម្លៃហាងឆេងមាសបានកើនឡើងដល់ជិត ៤៦០០ ដុល្លារ មួយតម្លឹង

បានផុស

៩ ខែ មុន

នៅ

ថ្ងៃចន្ទ ២៩ កញ្ញា ២០២៥

ដោយ

តម្លៃហាងឆេងមាសបន្តបំបែកកំណត់ត្រាថ្មីខ្ពស់បំផុតក្នុងប្រវត្តិសាស្ត្រមិនធ្លាប់មាន ដោយបានហក់ឡើងដល់ជិត ៤៦០០ ដុល្លារ ក្នុងមួយតម្លឹង នៅព្រឹកថ្ងៃច័ន្ទទី ២៩ ខែកញ្ញា ឆ្នាំ ២០២៥ ដោយសារអាមេរិកត្រៀមកាត់បន្ថយអត្រាការប្រាក់បន្ថែមទៀត នៅដំណាច់ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុនៅក្រុមហ៊ុន PP Link securities បានលើកឡើងនៅថ្ងៃច័ន្ទនេះថា ស្របពេលដែលពិភពលោកកំពុងតែមានភាពមិនប្រកដប្រជា ពាក់ព័ន្ធជាមួយពាណិជ្ជកម្ម ពាក់ព័ន្ធជាមួយទំនាក់ទំនង និងបច្ចេកវិទ្យាមួយចំនួនផងដែរបានរុញច្រានឱ្យតម្លៃមាសបន្តស្ទុះឡើង។

លោក ឡុង សំណាងបន្ថែមថា ពាក់ព័ន្ធជាមួយនឹងអត្រាការប្រាក់របស់ធនាគារកណ្ដាលអាមេរិក ដោយសារតែពេលវេលានៅសល់ខ្លី នៅក្នុងឆ្នាំ ២០២៥ ហើយនៅសល់ការកាត់បន្ថយអត្រាការប្រាក់ ២ ដងទៀត នៅឆ្នាំនេះ បន្ទាប់ពីកាត់នៅថ្ងៃទី ១៨ ខែកញ្ញា ហើយគ្រោងនឹងកាត់ ២ ដងទៀត ធ្វើឱ្យគេគិតថា ជាឱកាសក្នុងការទិញមាសគឺល្អ ដោយសារតែប្រាក់ដុល្លារនឹងធ្លាក់ថ្លៃ។

លោក ឡុង សំណាង យល់ឃើញថា៖ «មុនពេលការកាត់បន្ថយអត្រាការប្រាក់នៅថ្ងៃទី ១៨ ខែកញ្ញា ឆ្នាំ ២០២៥ តម្លៃមាសមានការកើនឡើងខ្លាំង ដោយសារតែឥទ្ធិពលនៃការបុកទិញច្រើនលើតម្លៃហាងឆេងមាស ហើយបន្ទាប់មកគឺមានការធ្លាក់ចុះបន្តិច ជាពិសេសគឺយប់ថ្ងៃ ១៨ ចំណុចនេះ គឺធនាគារ ឬវិនិយោគិនជាច្រើនគេកាត់យកផលចំណេញ គេលក់ចេញដើម្បីយកផលចំណេញ»។

គិតត្រឹមម៉ោង ៩៖៤៥ ថ្ងៃទី ២៩ ខែកញ្ញា ឆ្នាំ ២០២៥ មាសកំពុងជួញដូរក្នុងតម្លៃ ៤៥៧០ ដុល្លារ ក្នុងមួយតម្លឹង។ សម្រាប់ហាងឆេងនៅតាមបណ្ដារហាងនានាក្នុងរាជធានីភ្នំពេញ លក់ចេញក្នុងតម្លៃ ៤៥៦ ដុល្លារ ក្នុងមួយជី៕

អត្ថបទ៖ ឡេង ដេត