សន្និសីទអាហារូបករណ៍លើកទី៩ នឹងធ្វើឡើងនៅខែធ្នូ ចុងឆ្នាំនេះ

សន្និសីទអាហារូបករណ៍លើកទី៩ នឹងប្រារព្ធធ្វើឡើងនៅថ្ងៃទី១១ ខែធ្នូ ឆ្នាំ២០២២ខាងមុខនេះ វេលាម៉ោង១រសៀល ដល់ម៉ោង៦ល្ងាច នៅCJCC ក្រោមការរៀបចំរបស់ Anussa Conference។

កម្មវិធីនេះ ធ្វើឡើងក្នុងគោលបំណងចែករំលែកដំណឹងអាហារូបករណ៍ល្បីៗដែលផ្តល់ឲ្យតាមរយៈស្ថានទូត និងការណែនាំពីគន្លឹះក្នុងការដាក់ពាក្យ ការត្រៀមខ្លួនសម្រាប់ការដាក់អាហារូបករណ៍ដល់សិស្សនិស្សិត ព្រមទាំងណែនាំសម្រាប់អ្នកដែលដាក់អាហារូបករណ៍ច្រើនដងមកហើយ ប៉ុន្តែ មិនធ្លាប់ទទួលបានភាពជោគជ័យ។

សន្និសីទអាហារូបករណ៍នេះ មានវាគ្មិនកិត្តិយសដែលមកពីតំណាងស្ថានទូតបរទេស និងជាអតីតនិស្សិតដែលបានជាប់អាហារូបករណ៍ ធ្វើការចែករំលែកអំពីប្រភេទអាហារូបករណ៍ល្បីៗ ទៅកាន់ប្រទេសផ្សេងៗគ្នា។ វាគ្មិនកិត្តិយស នឹងបង្ហាញពីរបៀបត្រៀមខ្លួនសម្រាប់បំពេញពាក្យអាហារូបករណ៍ និងការត្រៀមខ្លួនសម្រាប់ការជួបសម្ភាសន៍ផ្ទាល់ ក៏ដូចជា របៀបនៃការសរសេរសំណើស្រាវជ្រាវ និងសំណេរពីខ្លួនឯងផងដែរ។ ទន្ទឹមនោះ វាគ្មិននឹងធ្វើការណែនាំនិស្សិតពីការធ្វើទំនាក់ទំនងជាមួយបណ្តា និស្សិតជាប់អាហារូបករណ៍ផ្សេងទៀត ដើម្បីមានបណ្តាញទទួលបានដំណឹង និងការប្រឹក្សាយោបល់ពីអាហារូបករណ៍ជាដើម។

គួរបញ្ជាក់ថា កម្មវិធីនេះអាចចូលរួមបានគ្រប់អាយុ មិនប្រកាន់ភេទ ឬ ពូជសាសន៍ឡើយ ក៏ប៉ុន្តែ តម្រូវឲ្យមានការជាវសំបុត្រសម្រាប់ចូលរួម។ តម្លៃសំបុត្រធម្មតា គឺ ៨ដុល្លារ សម្រាប់អ្នកជាវក្នុងខែធ្នូ ចំពោះអ្នកជាវក្នុងខែតុលាតម្លៃត្រឹមតែ ៦ដុល្លារ និងខែវិច្ឆិកា តម្លៃ៧ដុល្លារប៉ុណ្ណោះ។ កម្មវិធីអាហារូបករណ៍មួយនេះ មិនមានជាការផ្សាយផ្ទាល់នៅលើគេហទំព័រណាមួយឡើយ៕

ដោយ៖ អុន ស្រីមាន