ម្ចាស់កសិដ្ឋាន​បង្ហើប ចិញ្ចឹម​ចៀមងាយស្រួល​ជាង​គោ ចំណេញ​មួយទ្វេជាពីរ

កសិករនៅក្នុងប្រទេសកម្ពុជានិយមចិញ្ចឹមសត្វគោជាងសត្វចៀម ប៉ុន្តែមិនដឹងទេថា ចៀមអាចលក់បានក្នុងតម្លៃថ្លៃជាង ងាយស្រួលក្នុងការថែទាំ វាស៊ីស្មៅ និងលូតលាស់លឿនជាងសត្វគោទ្វេដង។ នេះជាការបង្ហើបឲ្យដឹងពី លោកប៉ុន ចាន់វីរៈ ដែលជាម្ខាស់កសិដ្ឋាននៃភូមិខ្វិតទួលឃ្លាំង ឃុំក្បាលទឹក ស្រុកទឹកផុស ខេត្តកំពង់ឆ្នាំង។

លោក ប៉ុន ចាន់វីរៈ ម្ខាស់កសិដ្ឋានចិញ្ចឹមចៀមធម្មជាតិនៅ​ខេត្តកំពង់ឆ្នាំបានឲ្យ «កម្ពុជាថ្មី» ដឹងថា លោកចាប់ផ្តើមចិញ្ចឹមសត្វចៀមតាំងពីឆ្នាំ២០១៦មក រហូតដល់ពេលបច្ចុប្បន្ននេះ។ ដំបូងឡើយលោកបានសាកល្បងចិញ្ចឹមសត្វចៀមមានចំនួន​ត្រឹមតែ ១១ ក្បាលប៉ុណ្ណោះ ហើយចៀមទាំងនោះបាននាំចូលពីខេត្តកំពតក្នុងមួយក្បាលមានតម្លៃ ៣០០ ដុល្លារ។

ការចិញ្ចឹមសាកល្បងនោះជាលទ្ធផលទទួលបានលទ្ធផលល្អ លោក​ក៏សម្រេចពង្រីក​បន្ថែមដោយនាពេលបច្ចុប្បន្ននេះ​កើន​​ឡើង​ប្រហែល ១ពាន់កក្បាលនៅក្នុងកសិដ្ឋានរបស់លោក។

លោក ប៉ុន ចាន់វីរៈ ការចិញ្ចឹមសត្វចៀមមានភាពងាយស្រួលថែទាំ ព្រោះវាដើរជាក្រុម ស៊ីស្មៅជាក្រុម ​និងមិនបង្កគ្រោះថ្នាក់អ្វីទេ។ សត្វចៀម​វាអាចបង្កើតកូនបានលឿន ក្នុងមួយឆ្នាំចៀមកើតកូន ២ ដង និងពពោះរយះពេលត្រឹមតែ ៥ ខែប៉ុណ្ណោះ។

ក្នុងសត្វចៀមមួយក្បាលពពោះម្តងអាចកើតបានកូនភ្លោះ២ ទៅ ៣ ឯណោះក្នុងពេលតែមួយ។ លើសពីនេះ ចៀមកើត​មក​មានវ័យត្រឹម ៦ ខែ ទៅ ៨ខែ អាចពោពោះថ្មីទៀតបាន តែបើក្រឡេក​មើលទៅសត្វគោវិញត្រូវរងចាំ ១ ឆ្នាំទៅ ២ឆ្នាំ។

ទាក់ទង​ការ​លក់​ចេញ​វិញ​បើ​តាម​ម្ចាស់​កសិដ្ឋានរូបនេះ «បើយើងមើលទៅលើតម្លៃ​ សាច់គោរស់មួយគីឡូត្រឹមតែ ៣ ដុល្លារ​កន្លះ ​​តែចៀមវិញសាច់រស់មានតម្លៃ ៨ ដុល្លាក្នុង១គីឡូ ដូច្នេះវាលើសតម្លៃសាច់គោមួយគុណ​ជា​ពីរ បើប្រៀបធៀបនៃការចិញ្ចឹមដូចគ្នា»។

លោក ចាន់វីរៈ បានគូសបញ្ចាក់ឲ្យដឹងថា សត្វចៀម ចន្លោះត្រឹម ៨ខែ អាចលក់ចេញបាន ដែលមានទម្ងន់ប្រហែលជា​៣០ គីឡូ ក្នុងចៀមញីមួយក្បាលតម្លៃ ៣០០ដុល្លារ បន្ទាប់ពីការចាក់វ៉ាក់សាំង ទម្លាក់សត្វល្អិតចេញ ដែលចៀមឈ្មោលលក់បានក្នុងតម្លៃថោកជាងពី ២៤០ដុល្លារ ទៅ២៥០ដុល្លារក្នុងមួយក្បាល។  

យ៉ាងណាមិញ លោក ប៉ុន ចាន់វីរៈ ក៏​លើក​ការ​ប្រឈមនៅ​មូលដ្ឋាន​កសិដ្ឋាន​របស់​លោក ដោយសារតែប្រជាពលរដ្ឋដែលរស់នៅតំបន់ឃុំក្បាលទឹកចូលចិត្តដុតព្រៃនៅរដូវប្រាំងដើម្បីឲ្យស្មៅដុះ ដូច្នេះលោកអាចជួយបញ្ហាកង្វះស្មៅដល់សត្វចៀម បើទោះបីជានៅរដូវប្រាំងលោកមានផ្ទៃដីជាច្រើនឲ្យចៀមស៊ីស្មៅក៏ដោយ តែបញ្ហាខ្វះខាតនៅតែមាន និងលោកមិនបានត្រៀមទុកមុន​នោះទេ។

ដោយយល់ពីបញ្ហាទាំងអស់នោះ លោក៏បានដូរវិធីសាស្រ្តថ្មីពីការឲ្យចៀមស៊ីស្មៅដែលដុះដោយធម្មជាតិ មកជាការដាំស្មៅខ្លួន​ឯងវិញ។ បច្ចុប្បន្ននេះ លោកបានដាំស្មៅទៅលើផ្ទៃដី ២០ ហិកតា និង​បានប្រើប្រព័ន្ធសូឡា​ស្រោចស្រព​ទឹកពេញ​មួយឆ្នាំ ដែលអាចធានាបានថា មានស្មៅគ្រប់គ្រាន់សម្រាប់ផ្គត់ផ្គង់ទៅដល់សត្វចៀម បើទោះបីជាស្ថិតក្នុងរដូវប្រាំងឬរដូវវស្សា។ ម្យ៉ាងវិញទៀតតាមរយះការដាំស្មៅដោយខ្លួនឯង វាមានការលូតលាស់ខ្ពស់ មានប្រូតេអ៊ីនច្រើនជាងស្មៅ​ធម្មជាតិ ហើយការធ្វើបែបនេះ អាចជួយកាត់បន្ថយពលកម្មជាងពីមុនរហូតដល់ ៧៥ ភាគរយ។

លោកចាន់ វីរៈ បាន​ឲ្យ​ដឹង​បន្ថែម​ទៀត​ថា លោក​បាន​រៀននិង​​ដកស្រង់​បច្ចេកទេស​ចិញ្ចឹម​ចៀមនេះ​នៅប្រទេសមួយចំនួនដូចជា ប្រទេសថៃ​ វៀតណាម ហ្វីលីពីន សីងហ្គាពួ ម៉ាឡេស៊ី ឥណ្ឌូនេស៊ី និងប្រទេសមួយចំនួនទៀត ដើម្បី​ទាញ​យក​បទពិសោធន៍​ទាំងការចិញ្ចឹមសត្វ និងការងារកសិកម្ម។

លោកចាន់ វីរៈ បានសម្លឹងមើលទៅលើទីផ្សារនាពេលអនាគតថា «នៅប្រទេសកម្ពុជាគេនិយមបរិភោគសាច់គោច្រើន ជាង​សាច់ចៀម ប៉ុន្តែនៅក្រៅប្រទេសវិញសាច់ចៀមមានតម្លៃថ្លៃជាង ដូច្នេះលោកជឿជាក់ថា នាពេលខាងមុខ ពលរដ្ឋ​កម្ពុជា​នឹង​ងាក​មក​បរិភោគសាច់ចៀមច្រើនដូចប្រទេសគេដែរ ដោយក្នុងនោះលោកបានលើកឡើងថា« ពីមុនមានតែមនុស្ស​ចាស់ទេដែលអង្គុយញាំកាហ្វេ តែបច្ចុប្បន្ននេះសម្បូរ​ទៅដោយយុវជនញាំកាហ្វេដែរ ដូច្នេះប្រទេសយើងនឹង​វិវឌ្ឍទៅជាបន្តបន្ទាប់»។

​លោកក៏មើលឃើញ​ជោគជ័យពីការចិញ្ចឹមចៀម ហើយ​ក៏​​មិនព្រួយបារម្ភ​លើទីផ្សារដែរ ដោកលើក​ហេតុផល​ថាសាច់គោគេអាចលក់ចំណេញ តែចៀមវិញចិញ្ចឹមក៏លឿន និងលក់ចំណេញជាងគោទៀត។

លោកក៏​មិន​ភ្លេច​​អតិថិជន​ដែលបានជាវសាច់ចៀមពីកសិដ្ឋានរបស់លោកនិងបាននិយាយថា «សាច់ចៀមអូស្រ្តាលី ដែលធ្លាប់បានញាំ វាមិនឆ្ងាញ់ដូចចៀមដែលផលិតក្នុងស្រុកកសិដ្ឋាន​របស់​លោក» ដែលពាក្យទាំងអស់នេះបាន​ធ្វើឲ្យ​លោកអាចជោគជ័យមកដល់ពេលបច្ចុប្បន្ននេះ។

ខណៈ​កសិដ្ឋានរបស់​លោក​ វីរៈ​ជាង ៣០ ហិកតា ​គ្រោងពង្រី​បន្ថែម​ទៀត នាពេលខាងមុខម្ចាស់​កសិដ្ឋាន​វ័យ​ក្មេង​រូបនេះ ក្រៅ​ពី​ចិញ្ចឹមផ្គត់ផ្គង់​ទីផ្សារ​ក្នុង​ស្រុក ក៏​សម្លឹងលទ្ធភាព​ពង្រីក​នាំ​ចេញទៅកាន់ទីផ្សារក្រៅប្រទេសផងដែរ៕

អត្ថបទ៖ ឌឿនចាន់ ថារី