វិស័យកសិកម្មរំពឹងងើបឡើង១,១ភាគរយ ផ្អែកលើកំណើនការនាំចេញ និងអនុវិស័យផ្សេងៗ

វិស័យកសិកម្មរំពឹងថា នឹងមានកំណើនក្នុងរង្វង់ ១,១ភាគរយ ក្នុងឆ្នាំ ២០២៣ ធៀបនឹង ០,៧ភាគរយ ក្នុងឆ្នាំ ២០២២។ ការកើនឡើងនេះ ដោយរំពឹងទុកលើកំណើនល្អប្រសើរ​នៃអនុវិស័យដំណាំ និងការចិញ្ចឹមសត្វ ស្របពេលដែលអនុវិស័យ​នេសាទ ក៏បន្តងើបឡើងផងដែរ។

យោងតាមរបាយការណ៍របស់នាយកដ្ឋានថវិកានីយកម្មនៃអគ្គនាយកដ្ឋានថវិកា ក្រសួងសេដ្ឋកិច្ច បង្ហាញនៅក្នុងវេទិកា​សាធារណៈ​ស្ដីពីការ​គ្រប់គ្រង​ម៉ាក្រូសេដ្ឋកិច្ច​ និង​ច្បាប់​ថវិកា​ជាតិ​ឆ្នាំ២០២៣​ នៅថ្ងៃទី២៥ ​មករានេះ បានបង្ហាញថា អនុវិស័យដំណាំ ត្រូវបានរំពឹងថា ងើបឡើងដោយសារកំណើននៃការនាំចេញផលិតផលកសិកម្មល្អប្រសើរ ជាពិសេស​ដំណាំរួមផ្សំ និងឧស្សាហកម្មដែលនឹងបន្តជំរុញដោយកិច្ចព្រមព្រៀងពាណិជ្ជកម្មសេរី រួមផ្សំនឹងការបង្កើនការវិនិយោគ​របស់រាជរដ្ឋាភិបាល ពិសេសការផ្តល់ហិរញ្ញប្បទានក្នុងការជំរុញផលិតកម្មក្នុងស្រុក។

ទន្ទឹមនឹងនេះការចិញ្ចឹមសត្វ នៅបន្តរក្សាកំណើនខ្ពស់ ដូចជា ផលិតកម្មជ្រូក គួបផ្សំនឹងវិធានការអន្តរគមន៍របស់​រាជរដ្ឋាភិបាល និងការអនុវត្តគម្រោងរបស់ដៃគូអភិវឌ្ឍនានា។។ ជាមួយគ្នានេះ វិស័យនេសាទ ក៏បន្តងើបឡើងសន្សឹមៗ ទាំងផលចាប់ទឹកសាប និងផលិតកម្មវារីវប្បកម្ម ដោយការអនុវត្តរបស់រាជរដ្ឋាភិបាល និងដៃគូអភិវឌ្ឍ តាមរយៈ​ដោះស្រាយបញ្ហាប្រឈមជារចនាសម្ព័ន្ធ ការគាំទ្រផនែហិរញ្ញប្បទាន ការផ្សព្វផ្សាយបច្ចេកទេស និងប្រើប្រាស់ពូជ​ត្រីប្រកបដោយប្រសិទ្ធភាពខ្ពស់ និងគុណភាព។

លោក វង្សី វិស្សុត រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានឱ្យដឹងដឹងថា ផលិតផលកសិកម្ម នៅឆ្នាំ ២០២២ មានការកើនឡើងជាង ១០ភាគរយ ដែលធ្វើឱ្យវិស័យនេះ បន្តមានសញ្ញាល្អសម្រាប់ឆ្នាំ ២០២៣នេះ។

លោកបណ្ឌិត គី សេរីវឌ្ឍន៍ អ្នកជំនាញ​សេដ្ឋកិច្ច​នៃ​រាជបណ្ឌិត​សភា​កម្ពុជា មានវត្តមានក្នុងវេទិកាសាធារណៈរបស់ក្រសួង​សេដ្ឋកិច្ចនេះដែរ បានលើកឡើងថា វិស័យកសិកម្មគឺជាវិស័យស្នូល ដែលមិនអាចចោលបាន បើទោះជាវិស័យនេះ ផ្តល់តម្លៃបន្ថែមទាបសម្រាប់កម្ពុជាក៏ដោយ។ លោកបន្តថា វិស័យកសិកម្ម ដើរតួនាទីសំខាន់សម្រាប់បំពេញ​តម្រូវការស្បៀងក្នុងស្រុកជាចាំបាច់ ពិសេសប្រសិនបើមានការបិទព្រំដែនដោយប្រការណាមួយ។ បើទោះជាប្រទេស​អភិវឌ្ឍកម្រិតណា ក៏ត្រូវការវិស័យកសិកម្មជាមូលដ្ឋានដែរ។

សូមបញ្ជាក់ថា ការនាំចេញទំនិញស្រូវ-អង្ករ និងកសិផលផ្សេងទៀតរបស់កម្ពុជាក្នុងរយៈពេល១១ខែឆ្នាំ២០២២ មានទំហំទឹកប្រាក់ប្រមាណ ៣,៣៦២លានដុល្លារ។ ក្នុងនោះ ចំណូលពីការនាំចេញអង្ករ-ស្រូវ មានចំនួនជិត​៦០០លានដុល្លារ និងចំណូលបានមកពីការនាំចេញកសិផលក្រៅពីស្រូវអង្ករ មានចំនួនជាង ២០០លានដុល្លារ៕