ចិន​ ផលិតកប៉ាល់កុងតឺន័រចំនួន ១៦ គ្រឿងសម្រាប់ បារាំង

សាជីវកម្មសាងសង់នាវារដ្ឋរបស់ប្រទេសចិន បានចុះហត្ថលេខាលើកិច្ចព្រមព្រៀងសហប្រតិបត្តិការជាមួយក្រុមហ៊ុន CMA CGM Group របស់ប្រទេសបារាំង ដើម្បីផលិតកប៉ាល់កុងតឺន័រធំចំនួន ១៦ គ្រឿង ដែលមានតម្លៃជាង ៣ ពាន់លានដុល្លារ ។

ការបញ្ជាទិញក្នុងទំហំទឹកប្រាក់ដ៏ធំបំផុតពីសំណាក់ប្រទេសបារាំង គឺជាកំណត់ត្រាថ្មីមួយសម្រាប់ការផលិតកប៉ាល់កុងតឺន័រដែលបានចុះហត្ថលេខាដោយឧស្សាហកម្មសាងសង់កប៉ាល់របស់ប្រទេសចិន ។ ​ក្នុងចំណោមកប៉ាល់ទាំង ១៦ គ្រឿង​ មាន ១២ គ្រឿង មានចំណុះ ១៥,០០០-TEU ប្រើសារធាតុមេតាណុល ខណៈ ៤ គ្រឿងទៀតមានចំណុះ ២៣,០០០-TEU ដំណើរការដោយឧស្ម័នធម្មជាតិរាវ (LNG) ។

TEU គឺជាឯកតានៃសមត្ថភាពដឹកទំនិញសម្រាប់កុងតឺន័រ និងកំពង់ផែកុងតឺន័រ ដោយផ្អែកលើបរិមាណកុងតឺន័រប្រវែង ៦.១ ម៉ែត្រ ហើយក្នុងមួយ TEU ស្មើនឹង ១២ ម៉ែត្រ ។

ទន្ទឹមនោះ ក្រុមហ៊ុនផលិតកប៉ាល់ចិនបាននិយាយថា កប៉ាល់ដើរដោយថាមពលមេតាណុលនីមួយៗមានប្រវែង ៣៦៦ ម៉ែត្រ និងទទឹង ៥១ ម៉ែត្រ ជាមួយនឹងសមត្ថភាពផ្ទុកទំនិញបាន ១៥៦,០០០ តោន ។

គួរបញ្ជាក់ថា នេះ​គឺ​ជា​ការ​បញ្ជា​ទិញលើក​ដំបូងទៅកាន់ក្រុមហ៊ុន​ចិន ​ក្នុង​ការ​ផលិត​កប៉ាល់​កុងតឺន័រ​ដែល​ប្រើ​ប្រេង​មេតាណុល​បែប​នេះ ខណៈការផលិតនាវានេះឡើង អាចសម្រេចបាននូវការបំភាយកាបូនសុទ្ធ ឲ្យស្ថិតនៅក្នុងកម្រិតសូន្យ ក្នុងអំឡុងពេលធ្វើដំណើរទាំងមូល ៕

ប្រែសម្រួលដោយ ៖ នាង រតនៈ

ប្រភព ៖​ Xinhua    

ចុចអាន ៖ នាវាពិឃាដអាមេរិក ចូលជិតកោះគ្រប់គ្រងដោយ ចិន ចំពេលតៃវ៉ាន់ ត្រូវឡោមព័ទ្ធដោយសមយុទ្ធ