ព័ត៌មានអន្ដរជាតិ

បារាំងទទូចឱ្យអ៊ីស្រាអែលបំបាត់រាល់ឧបសគ្គក្នុងការផ្តល់ជំនួយមនុស្សធម៌ទៅតំបន់ហ្គាហ្សា

បានផុស

២ ខែ មុន

នៅ

ថ្ងៃពុធ ២៩ មេសា ២០២៦

ដោយ

តំណាងប្រទេសបារាំង បានអំពាវនាវឱ្យអ៊ីស្រាអែលលុបបំបាត់ឧបសគ្គទាំងអស់ ចំពោះជំនួយមនុស្សធម៌ទៅកាន់តំបន់ហ្គាហ្សា និងធានាសុវត្ថិភាពរបស់បុគ្គលិកនិងសម្ភារៈរបស់អង្គការសហប្រជាជាតិ (UN) ដោយព្រមានថា ស្ថានភាពនៅទីនោះនៅតែប្រឈមនឹងមហន្តរាយធ្ងន់ធ្ងរនៅឡើយ។ នេះបើយោងតាមភ្នាក់ងារសារព័ត៌មានតួកគី Anadolu ផ្សាយថ្ងៃទី២៨ ខែមេសា ឆ្នាំ២០២៦ ។

លោក Jerome Bonnafont បេសកជនអង្គការសហប្រជាជាតិប្រទេសបារាំង។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ (UNSC) លោក Jerome Bonnafont បេសកជនរបស់ប្រទេសបារាំងនៅអង្គការសហប្រជាជាតិ បានលើកឡើងថា៖ « បទឈប់បាញ់នៅតំបន់ហ្គាហ្សានៅតែផុយស្រួយណាស់ ទោះបីជាមានកិច្ចខិតខំប្រឹងប្រែងផ្នែកការទូតជាបន្តបន្ទាប់ក៏ដោយ។ ប្រទេសបារាំងអំពាវនាវឱ្យអ៊ីស្រាអែលលុបចោលឧបសគ្គទាំងអស់ ចំពោះការផ្តល់ជំនួយមនុស្សធម៌ ដើម្បីការពារបុគ្គលិកនិងសម្ភារៈរបស់អង្គការសហប្រជាជាតិ ដើម្បីសម្រួលដល់ការជម្លៀសផ្នែកវេជ្ជសាស្រ្តតាមរយៈអង្គការសុខភាពពិភពលោក(WHO)»។

លោក Bonnafont កត់សម្គាល់ថា ៦ខែ បន្ទាប់ពីការអនុម័តសេចក្តីសម្រេចរបស់អង្គការសហប្រជាជាតិគាំទ្រផែនការសន្តិភាពនិងមានសហរដ្ឋអាមេរិក ស្ថានភាពនៅហ្គាហ្សាមានភាពប្រសើរឡើងតិចតួច តែវិបត្តិមនុស្សធម៌នៅតែធ្ងន់ធ្ងរ។

លោកលើកឡើងថា៖ « បទឈប់បាញ់នៅតែមិនច្បាស់លាស់ ស្ថានភាពមនុស្សធម៌នៅតែមានភាពស្មុគស្មាញ។ ប្រទេសបារាំងរំពឹងថានឹងមានការកែលម្អជាក់ស្តែង ក្នុងស្ថានភាពរបស់ប្រជាជនប៉ាឡេស្ទីននៅដំណាក់កាលបន្ទាប់។ ការកែលម្អបែបនេះនឹងជាជំហានដំបូងឆ្ពោះទៅរកការកសាងឡើងវិញ និងការស្តាររចនាសម្ព័ន្ធអភិបាលកិច្ចនៅហ្គាហ្សា រួមទាំងការដាក់ពង្រាយគណៈកម្មាធិការរដ្ឋបាលជាតិ និងការវិលត្រឡប់របស់អាជ្ញាធរប៉ាឡេស្ទីន»។

ប្រទេសបារាំងក៏បានបញ្ជាក់ម្តងទៀតថា ការរំសាយអាវុធរបស់ក្រុមហាម៉ាសគឺមានសារៈសំខាន់ខ្លាំងណាស់។ ក្រុមនេះមិនអាចមានអនាគតនៅតំបន់ហ្គាហ្សា ឬនៅប៉ាឡេស្ទីនបានទេ។

លោក Bonnafont សង្កត់ធ្ងន់ថា៖ « ប្រទេសបារាំងរក្សាសិទ្ធិក្នុងការប្រតិកម្មបន្ថែមទៀត ប្រសិនបើការវិវត្តក្នុងរូបភាពអាក្រក់ៗនៅតែបន្ត ខណៈយើងក៏អំពាវនាវឱ្យអ៊ីស្រាអែលលុបចោលច្បាប់ដែលពង្រីកវិសាលភាពនៃទោសប្រហារជីវិត ការរើសអើង ដែលផ្ទុយនឹងគោលការណ៍ប្រជាធិបតេយ្យ»។

ប្រទេសបារាំងបានបញ្ជាក់ជាថ្មីនូវការគាំទ្ររបស់ខ្លួន លើដំណោះស្រាយចំពោះរដ្ឋពីរ ហើយគោលការណ៍នេះនៅតែជាមធ្យោបាយតែមួយគត់ ដើម្បីសម្រេចបាននូវស្ថិរភាពយូរអង្វែង៕

ប្រែសម្រួល៖ ណឺ មិនា