សេដ្ឋកិច្ច ចិន មិនសម្រេចតាមការព្យាករណ៍ឡើយ ស្របពេលយុវជនគ្មាន​ការងារធ្វើក៏កើនឡើង

សេដ្ឋកិច្ចចិនមិនអាចសម្រេចបានតាមការព្យាករណ៍ទុកនោះឡើយនៅក្នុងត្រីមាសទី ២ នៃឆ្នាំនេះ ស្របពេលដែល​អត្រាយុវជនអត់ការងារធ្វើនៅក្នុងប្រទេសក៏កាន់តែកើនឡើងខ្ពស់ផងដែរ ។

យោងតាមការព្យាករណ៍ពីសេដ្ឋវិទូបានឲ្យដឹងថា សេដ្ឋកិច្ចចិនរំពឹងនឹងមានកំណើនលើសពី ៧ ភាគរយនៅក្នុងត្រីមាសទី ២ ប៉ុន្តែកំណើនផលិតផលក្នុងស្រុកសរុប (GDP) សម្រេចបានត្រឹមតែ​ ៦.៣ ភាគរយប៉ុណ្ណោះ ដោយកើន ០.៨ ភាគរយក្នុងអំឡុងខែមេសាដល់ខែមិថុនា ចំពេលតម្រូវការក្នុងស្រុក និងក្រៅប្រទេសមានភាពខ្វះខាត ។

សម្រាប់ការលក់រាយនៅក្នុងប្រទេសចិនកាលពីខែមិថុនា បានកើនឡើង ៣.១ ភាគរយ បើប្រៀបធៀបនឹងឆ្នាំមុន ខណៈដែលទិន្នផលផលិតកម្មឧស្សាហកម្មបានកើនឡើង ៤.៤ ភាគរយ ។

ទោះបីជាមិនអាចសម្រេចបានតាមគោលដៅក៏ដោយ ប៉ុន្តែអ្នកនាំពាក្យការិយាល័យស្ថិតិជាតិចិន (NBS) លោក Fu Linghui បាននិយាយថា លទ្ធផលបែបនេះក៏បានបង្ហាញពីសន្ទុះងើបឡើងវិញដ៏ល្អនៃសេដ្ឋកិច្ចចិន ក្រោយរោគរាតត្បាតកូវីដ ១៩ ខណៈគិតត្រឹមត្រីមាស​ទី ១ GDP បានកើនឡើង ៤.៥ ភាគរយ និង ៦.៣ ភាគរយនៅក្នុងត្រីមាសទី ២ បើប្រៀបធៀបនឹងឆ្នាំមុន ។

លោក Fu បានលើកឡើងទៀតថា ដោយឡែកចំពោះទិន្នន័​យបង្ហាញពីអត្រាគ្មានការងារធ្វើរបស់យុវជនចិនវិញ ស្ទុះងើបឡើងខ្ពស់រហូតដល់ ២១.៣ ភាគរយនៅក្នុងខែមិថុនា ដោយកើនឡើងពី ២០.៨ ភាគរយនៅក្នុងខែឧសភា។

គួរបញ្ជាក់ថា គ្រាន់តែទីក្រុងប៉េកាំងតែឯងបានកំណត់ទិសដៅកំណើនសេដ្ឋកិច្ចសម្រាប់ឆ្នាំ ២០២៣ នេះប្រហែល ៥ ភាគរយ ខណៈកាលពីឆ្នាំ ២០២២ កំណើនសេដ្ឋកិច្ចចិន សម្រេចបានត្រឹមតែ ៣ ភាគរយប៉ុណ្ណោះ ៕

ប្រែសម្រួល ៖ នាង រតនៈ

ប្រភព៖ Al Jazeera

ចុចអាន ៖ ទេសចរ កម្ពុជា សម្រុកទៅលេងនៅ វៀតណាម ខណៈម្នាក់ៗចំណាយ ៨០០ ទៅ ៩០០ ដុល្លារ