ព័ត៌មានអន្ដរជាតិ

អត្រាអត់ការងារធ្វើនៅថៃ កើនឡើង ជាពិសេសអ្នកទើបបញ្ចប់ការសិក្សា

បានផុស

១ year មុន

នៅ

ថ្ងៃអង្គារ ១១ មីនា ២០២៥

ដោយ

អត្រាអ្នកអត់ការងារធ្វើនៅថៃកំពុងកើនឡើង ជាពិសេសអ្នកទើបបញ្ចប់ការសិក្សា ដែលបន្ថែមបន្ទុកសេដ្ឋកិច្ច ដែលកំពុងដើរអូសជើងរួចស្រាប់ទៅហើយ។ នេះបើតាមការចុះផ្សាយរបស់កាសែត The Nation។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមរបាយការណ៍ចេញផ្សាយកាលពីថ្ងៃចន្ទ របស់ក្រុមប្រឹក្សាអភិវឌ្ឍន៍សេដ្ឋកិច្ច និងសង្គមជាតិថៃ (NESDC) ភាគច្រើននៃបុគ្គលដែលគ្មានការងារធ្វើនៅក្នុងត្រីមាសទី ៤ ឆ្នាំ ២០២៤ គឺជានិស្សិតទើបបញ្ចប់ការសិក្សាថ្មី ដែលមានអាយុចន្លោះពី ២០ ដល់ ២៤ ឆ្នាំ។

របាយការណ៍ដដែលបង្ហាញថា មនុស្ស ៣៦០ ០០០ នាក់ គ្មានការងារធ្វើនៅក្នុងត្រីមាសចុងក្រោយនៃឆ្នាំ ២០២៤ ពោលគឺកើនឡើង ៨,៨ ភាគរយ ធៀបនឹងរយៈពេលដូចគ្នាកាលពីឆ្នាំមុន។ អត្រាគ្មានការងារធ្វើប្រចាំឆ្នាំ បានកើនឡើងដល់ ០,៨៨ ភាគរយ ធៀបនឹងកំណើន ០,៨១ ភាគរយ នៅឆ្នាំ ២០២៣។

NESDC បាននិយាយយ៉ាងដូច្នេះថា៖ «ក្រុមអ្នកអត់ការងារធ្វើច្រើនជាងគេ គឺនិស្សិតបញ្ចប់ការសិក្សាថ្មីៗដែលមានអាយុពី ២០-២៤ ឆ្នាំ រួមទាំងអ្នកដែលមានបទពិសោធន៍ការងារពីមុន និងអ្នកដែលចូលបម្រើការងារជាលើកដំបូង»។

របាយការណ៍ក៏បានគូសបញ្ជាក់ផងដែរថា កម្មករដែលមានបទពិសោធន៍ជាច្រើននាក់ដែលក្លាយជាអ្នកអត់ការងារធ្វើ បានធ្វើការក្នុងវិស័យផលិតកម្ម និងលក់ដុំ/លក់រាយពីមុនមក។

យ៉ាងណាមិញ ទោះបីជាមានកំណើននៃភាពអត់ការងារធ្វើក៏ដោយ ក៏អត្រាការងារសរុបក្នុងឆ្នាំ ២០២៤ នៅតែមានស្ថិរភាពត្រឹម ៩៨,៦ ភាគរយ។ ប៉ុន្តែ ចំនួនសរុបនៃបុគ្គលដែលមានការងារធ្វើ បានធ្លាក់ចុះបន្តិចមកត្រឹម ៣៩,៨ លាននាក់ ដោយធ្លាក់ចុះ ០,៣ ភាគរយ ពីឆ្នាំ ២០២៣។

អ្នកជំនាញមើលឃើញថា កំណើនអត់ការងារធ្វើនៅថៃ គឺជាបន្ទុកសេដ្ឋកិច្ចដ៏ធំមួយសម្រាប់ប្រទេស ដែលកំពុងប្រឈមមុខនឹងកម្សោយតម្រូវការ/ការចំណាយរបស់អ្នកប្រើប្រាស់ បំណុលគ្រួសារខ្ពស់ និងការបិទរោងចក្រជាដើម។ បញ្ហានេះ ជះឥទ្ធិពលដោយផ្ទាល់ដល់កំណើនសេដ្ឋកិច្ចដើរអូសជើងរបស់ប្រទេសថៃ៕