អាជីវករវៀតណាមបិទតូបជិត ៣ ០០០ កន្លែងនៅហាណូយ ខណៈអាជ្ញាធរបង្រ្កាបទំនិញក្លែងក្លាយ

អាជីវករវៀតណាមនៅទីក្រុងហាណូយ បាន​បិទដំណើរការតូបអាជីវកម្មរបស់ខ្លួនជិត ៣ ០០០ កន្លែង នៅខែឧសភា និងមិថុនា ដោយសារ​ភ័យខ្លាចរងការត្រួតពិនិត្យរកទំនិញក្លែងក្លាយ ដែលអាជ្ញាធរ​វៀតណាម​បង្កើនការបង្រ្កាប​មួយរយៈចុង​ក្រោយ​នេះ​។ នេះបើតាមការចុះផ្សាយរបស់កាសែត Viet Nam News។

​យោងតាមនាយកដ្ឋានពន្ធដារក្នុងតំបន់ តូបអាជីវកម្មចំនួន ២ ៩៦១ ​កន្លែង បានផ្អាកប្រតិបត្តិការ​របស់ខ្លួន ដោយអាជីវករ​ព្រួយបារម្ភខ្លាំង ​ចំពោះលទ្ធភាពនៃការត្រួតពិនិត្យការលក់ទំនិញក្លែងក្លាយ គ្មានស្លាកសញ្ញា ឬទំនិញខូចគុណភាព ជាពិសេសនៅតាមទីផ្សារធំៗក្នុងក្រុងហាណូយ ដូចជា Ninh Hiệp, Đồng Xuân, Long Biên, La Phù និងផ្លូវពាណិជ្ជកម្មដូចជា Hàng Ngàng និង Hàng ជាដើម​។

តំបន់ទាំងនេះត្រូវបានគេស្គាល់ខាងលក់សម្លៀកបំពាក់ ក្រណាត់ គ្រឿងសំអាង និងទំនិញប្រើប្រាស់ផ្សេងៗទៀត។

អ្នកតំណាងមកពីការិយាល័យពន្ធដារ បាននិយាយថា៖ «ម្ចាស់អាជីវកម្មមិនបិទតូបរបស់ពួកគេ ដោយសារតែតម្រូវការវិក័យប័ត្រអេឡិចត្រូនិកនោះទេ។ ពួកគេព្រួយបារម្ភអំពីសកម្មភាពអនុវត្តច្បាប់ និងការតាមដានទំនិញរបស់ពួកគេ ជាពិសេសទំនិញដែលមានប្រភពដើមមិនច្បាស់លាស់»។ វិក័យប័ត្រអេឡិចត្រូនិកសំដៅលើតម្រូវដែលអាជីវករត្រូវ​មាន តាមគោលនយោបាយ​របស់នាយកដ្ឋានពន្ធដារវៀតណាម។

គួរគូសបញ្ជាក់ថា អាជ្ញាធរវៀតណាមបើកបង្រ្កាបលើការចែកចាយទំនិញក្លែងក្លាយ និងគ្មានប្រភពមិនច្បាស់លាស់ ក្នុងរយៈពេលប៉ុន្មានសប្ដាហ៍ចុង​ក្រោយ ដើម្បី​កែលម្អ​ជំហរ​ពាណិជ្ជកម្ម​​និង​បំពេញ​តាម​ស្តង់ដារ​អន្តរជាតិ ជាពិសេស​ជាមួយ​សហរដ្ឋអាមេរិក ដែលបាន​ដាក់សម្ពាធលើវៀតណាមតាមរយៈពេលពន្ធគយបដិការ ៣៦ ភាគរយ​។

កិច្ចខិតខំប្រឹងប្រែងនេះ ក៏មានគោលបំណងផងដែរ ក្នុងការការពារកម្មសិទ្ធិបញ្ញា ​ការពារអ្នកប្រើប្រាស់ពីផលិតផល​បង្កគ្រោះថ្នាក់ និងជំរុញបរិយាកាសអំណោយផលបន្ថែមទៀតសម្រាប់អាជីវកម្មស្របច្បាប់។

បើតាមការចុះផ្សាយរបស់កាសែត Hanoi Times កាលពីសប្ដាហ៍មុន បន្ទាប់ពីការបង្រ្កាបទំនិញក្លែងក្លាយទូទាំងប្រទេសរយៈពេល ១ ខែ​ អាជ្ញាធរវៀតណាម បានដោះស្រាយលើសំណុំរឿង ៣ ៤១១ ករណី ​ដោយបានចេញការផាកពិន័យ និងរឹបអូសទំនិញដែលមានតម្លៃសរុប ៦៣ ប៊ីលាន​ដុង (២,៤៧ លាន​ដុល្លារ)។ ​យុទ្ធនាការដែលដំណើរការ​ចន្លោះពីថ្ងៃ ១៥ ខែឧសភា ដល់ថ្ងៃទី១៥ ខែមិថុនា តាមបញ្ជារបស់នាយករដ្ឋមន្ត្រី ត្រូវបានដឹកនាំដោយនាយកដ្ឋានគ្រប់គ្រង និងអភិវឌ្ឍន៍ទីផ្សារក្នុងស្រុក ក្រោមក្រសួងឧស្សាហកម្ម និងពាណិជ្ជកម្ម៕