តម្លៃហាងឆេងមាសក្នុងស្រុកបន្តហក់ឡើងខ្ពស់នៅថ្ងៃនេះ

អ្នកជំនាញនៅក្នុងវិស័យហិរញ្ញវត្ថុ បានលើកឡើងថា តម្លៃហាងឆេងមាសបានបន្តហក់ឡើងដល់ ៤០៧០​ដុល្លារក្នុងមួយតម្លឹងនៅព្រឹកថ្ងៃអង្គារនេះ ដោយសារព័ត៌មាននៃ​អត្រា​​ការងារកើន​ឡើង​តិចតួចនៅសហរដ្ឋអាមេរិក។​

សម្រាប់តម្លៃមាសនៅតាម​បណ្ដាហាង​នានា​នៅរាជធានីភ្នំពេញ លក់ចេញក្នុងតម្លៃ ៤០៣ ដុល្លារ ក្នុងមួយជី នៅថ្ងៃច័ន្ទទី ០៥ ខែសីហា ឆ្នាំ ២០២៥​។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities មាន​ប្រសាសន៍ថា តម្លៃ​ហាងឆេងមាសបានហក់ឡើងកាលពីថ្ងៃសុក្រសប្ដាហ៍មុន រហូតមក​ដល់​ពេលនេះ ដោយសារតែព័ត៌មាន នៃ​កំណើនអត្រាការងារនៅសហ​រដ្ឋអាមេរិក មិនមាន​ការ​កើន​ឡើងនៅក្នុងខែកក្កដានេះ។

លោក ឡុង សំណាងយល់ថា៖ «ស្ថានភាពឥឡូវនេះ កត្តាច្រើន​ណាស់ដែល​អាចឱ្យតម្លៃ​មាស​មាន​​ការ​កើនឡើង មានបរិបទ២ គឺ ស្ថិតនៅក្នុងសង្គ្រាម ឬក៏សេដ្ឋកិច្ចមិនល្អ បានន័យថា វិបត្តិ​សេដ្ឋ​កិច្ច ដូចជារាល់ថ្ងៃនេះ យើងទើបងើបចេញ​ពីកូវីដ១៩ផង ហើយសេដ្ឋកិច្ច អចលន​ទ្រព្យ​ក៏ងើប​អត់​រួច​ដែរ។ បើស្ថិតនៅក្នុងស្ថានភាពមិនច្បាស់លាស់ ពិភពលោកស្ថិតនៅក្នុង​ភាពមិន​ច្បាស់​លាស់​​ណា​មួយ ហាងឆេងមាសប្រាកដណាស់នៅតែឡើង»។

បើតាមលោក ឡុង សំណាង ប្រសិនបើស្ថានភាពសេដ្ឋកិច្ចល្អប្រសើរ មាស​អាចធ្លាក់​ចុះតិចតួច ប៉ុន្តែបើពិភលោកដំណើរការស្រួលបួលហើយ តម្លៃមាសរឹតតែកើនឡើងបន្ថែមទៀត៕

អត្ថបទ៖ ឡេង ដេត